[多奇出品] - 進退兩難的蘭歷克

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


蘭歷克所帶領嘅曼聯喺近三場聯賽取得2和1負成績,對球迷嚟講當然唔收貨啦。除咗近排成績低迷之外,仲有球員對球會嘅不滿開始浮現出嚟,再加上其他英超對手嘅挑戰,新任領隊蘭歷克可謂腹背受敵,依家就同大家分析佢正面對嘅處境。
一、前領隊蘇B所留下嘅計時炸彈。球員對球會嘅不滿其實唔係蘭歷克嚟到先至出現,而係蘇B帶領球隊時就已經慢慢累積。好似前鋒線人腳過盛,好似卡雲尼、C朗拿度、拉舒福特、馬斯亞、連加特、辛祖同格連活特。球員缺乏足夠出場機會,球員自然開始對球會不滿。另外,蘇B時代鍾意用死勝利11人,佢哋無論踢得好定差,都永遠不乏出場機會,反而坐喺後備席嘅副選球員,好似馬達、雲迪碧克、拜利、達洛治、泰利斯同連加特。就永遠得個等字,就算佢哋幾努力去練習都好,再加上有部份球員因為蘇B嘅出場承諾而留隊,但最後蘇B並無兌現,依吓就真係令球員心淡。依個問題唔係話要解決就可以解決,人與人之間嘅關係同信任係需要用時間一小步一少步去建立,而建立之前仲需要解開佢哋嘅心結,依吓先至最攞命。
二、卡域克不接受蘭歷克嘅挽留。球隊搞到如斯田地,除咗蘇B之外,教練團亦都需要負上一定嘅責任。而教練團當中,睇嚟卡域克係最了解前任領隊所遺留下來嘅問題同埋最有能力去處理當前嘅危機。喺佢做看守領隊時,可以睇到佢有一定調兵遣將嘅能力,再加上最了解每位球員嘅心理同比賽狀態亦非卡域克莫屬。蘭歷克知道佢最能夠輔助自己去重建球隊,可惜卡域克為咗忠於蘇B而拒絕新任領隊嘅邀請,大家試諗吓兩位名宿都離開球隊,無人鎮住班長期累積怨氣嘅球員,佢哋仲唔趁機會對蘭歷克整個大爆發,將自己心中嘅不滿一口氣發洩出嚟。蘭歷克要執好依個爛攤子,就唯有靠其餘幾位助教嘞。
三、球迷、名宿對蘭歷克嘅期望同評價。其實除咗球員之外,球迷亦都忍咗蘇B好耐,當新任領隊蘭歷克到任後,總希望佢可以快啲幫球隊擺脫頹勢。不過,現實不似預期,球隊對住榜下游對手都贏得幾辛苦,再加上近三場嘅表現令球迷開始質疑,其實蘭歷克係咪真係可以幫到球隊上番前四,可唔可以再次帶領球隊捧杯?而名宿尤其係堅尼、史高斯同加利仔就特別多意見發表,當然佢哋所講嘅嘢係有一定見解,但另一方面亦都可以見到佢哋對蘇B同對其他領隊嘅要求同態度係有分別。依個因素亦都可能對蘭歷克嘅部署有唔同程度嘅影響。
四、球員未能適應蘭歷克嘅足球理念同戰術。蘭歷克始終都係季中執掌球隊,無太多時間去俾佢慢慢適應,但係依度所有嘅球員、教練團、其他對手同球會文化對佢嚟講仲係好新。各項客觀條件都唔係對佢太有利,所以佢想實踐自己嘅足球理念同戰術真係難關重重。舉個例子好似佢想實踐4222前場迫搶嘅陣式,但由於有部份球員唔適應,同埋再加上個效果未如理想,所以最後都係轉返4231,令到球隊好似兩頭唔到岸。另外,部份球員嘅比賽心態亦都令蘭歷克感到頭痛,例如:馬斯亞嘅鬥心、格連活特同拉舒福特嘅個人主義、普巴對球會嘅投入度等等。
其實球隊、球員嘅問題浮現晒出嚟,總好過收收埋埋唔去處理,但處理得合唔合宜就要睇天時、地利、人和,當然亦都要睇蘭歷克嘅能耐。依家正處於進退兩難嘅佢,筆者只有默默等待同支持。

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

留言


請按此登錄後留言。未成為會員? 立即註冊
    快捷鍵:←
    快捷鍵:→