[多奇出品] - 般奴與普巴之葡法大戰前瞻

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

歐國盃F組分組賽將迎來葡萄牙對法國的大戰,將影響2隊是否能晉級16強嘅關鍵之戰,陣中嘅般奴及普巴將各為其主,但大戰前我哋先嚟睇下首2輪二人嘅表現先:

般奴: 第一輪 - 葡萄牙對匈牙利
表現:6分 (10分為滿分)
般奴頭80分鐘被安排喺進攻中場嘅位置,但又唔係俾佢hold波控制節奏,而係俾佢接應一啲高空波後上插入攻擊,間中隊友先至俾波佢做駁腳嘅工作,所以佢整體上嘅表現係唔起眼,除咗開角球同罰球係有一定威脅外。直到下半場般奴先至有一球遠射中龍門機會,嗰球威脅都好大,對方門將要撲盡先至救到球波。到80分鐘領隊見球隊無咩起色就作換人調動,而且將般奴移後一格打中場中,負責控波同派牌工作,依個調動令葡萄牙形勢改變,而般奴亦都能夠發揮佢原有嘅威力。球隊入嘅第一球,都係般奴交球靚直線俾隊友組織攻勢,先至有入波機會。
其實般奴嘅優點係好明顯,就係hold波、分波、遠射同處理死球,而筆者最欣賞佢係就算領隊安排一個佢唔係發揮得最好嘅位置同工作俾自己,佢都會沉着應戰,做到最好。俾時間領隊去思考同安排對策,可見佢對自己班波都好有信心,而作調動後短短十分鐘就切低匈牙利。當然筆者亦都明白葡萄牙球員技術水平高,個個都有盤扭過人同數胡能力,唔一定要將葡萄牙變成一人球隊,圍繞般奴而建立。不過經過今場嘅經驗,相信般奴會負起更大嘅責任。

般奴: 第二輪 - 葡萄牙對德國
表現:3分(10分為滿分)
今場德國隊球員明顯喺平均技術同身體條件都好過葡萄牙,令到德國隊佔盡優勢,雖然球隊能夠藉住一個快速反擊領先,但之後就連失兩球烏龍波,球隊最終輸4:2。
般奴今場雖然非常努力跑上跑落,但好似無太大嘅貢獻,原因係葡萄牙俾德國隊㩒住嚟打,無咩控球嘅機會,就算中後場攞到個波,都好少直接交俾般奴,而賓拿度施華同祖達攞到個波都有能力自己去策動攻勢,所以未必吓吓都需要般奴派牌。如果般奴無咩波掂,咁佢喺隊中嘅作用就會減少好多,始終佢球場閱讀能力好強同埋傳啲波好毒,不過身體條件就唔夠出眾,跑步速度同攞身位都係一般,對比德國隊中後場,全無優勢可言,所以最後製造唔到好入肉嘅攻勢,自己連射門機會都無。咁般奴一啲對應方法都無呢?其實都幾難攪,因為隊友唔係太想完全倚靠佢,而防中嘅搶截能力又好似無曼聯嗰班隊友咁好,要般奴吓吓無球走動唔係唔得,佢都可以走到靚位,但接應之後嘅follow up動作就爭啲,始終佢速度同身型有限制。除非般奴擺喺後備做秘密武器或者真係排個陣係佢做主導,專門餵波俾C朗,咁就仲有轉機。

普巴: 第一輪: 法國對德國
表現:8分
普巴雖然要面對同組實力最強嘅對手德國但都毫無懼色,表現得非常淡定,同時亦都發揮到自己創造力,交出好多球靚直線威脅德國嘅後防,最後佢亦都當選今場最佳球員。
其實好多球迷會問,點解普巴喺曼聯同喺法國國家隊嘅表現點解爭咁遠,筆者認為:

第一個原因係對手陣式唔同。英超大部份球隊對住曼聯採取嘅策略都會係打穩守突擊,因為對方睇準麥佳亞同連迪洛夫依對後防拍擋防守不穩嘅弱點。對方只要做好防守,再配合預先訓練過嘅反擊,攻陷曼聯嘅防線唔難。對方塞死晒啲空間,就算普巴想傳有質素嘅波都唔容易。

第二個原因係隊友質素差距。喺曼聯提起對中堅拍擋已對令隊友唔放心,再加上前鋒線福仔同格連活特,根本未去到法國隊前鋒麥巴比嘅級數,而法國隊亦都有簡迪幫普巴做埋防守依啲粗重工作,普巴係國家隊只需要專心一致做佢自己鍾意嘅組織進攻嘅工作,所以佢自自然然會踢得放好多。

第三個原因係球迷對普巴要求比較嚴格。當時摩連奴用成9000萬磅買佢返嚟,佢身價咁高,曼聯球迷自然會對佢有更高要求,再加上普巴管理自己情緒仍然有進步嘅空間,所以佢唔可以好輕鬆同隨心隨意地發揮。大家睇普巴踢波都知道佢心情越靚同輕鬆先至會發揮最強力量,而佢喺法國隊又唔洗理自己有幾多身價,班隊友又會錫住佢,佢自自然然個表現亦都提升幾個層次。

普巴: 第二輪法國對匈牙利
表現:3分
今場匈牙利嘅策略係屯重兵喺後防,再加上體力化嘅打法,只要有法國隊球員控住個波,佢哋就如狼似虎咁衝個嚟,就算攞唔到個波都會犯規阻止對手組織攻勢,所以唔好話普巴,連其他隊友想組織攻勢都難。
講番普巴嘅表現,點解我會俾依個分數佢呢?主要係對手令到佢暴露晒自己缺點出嚟。普巴係一個要hold住個波先至發揮到創造力嘅球員,你要佢做一啲無球走位嘅動作真係唔容易,更遑論一邊俾波一邊走空位,甚至係有時佢會企喺度等波到,咁樣對匈牙利隊球員嚟講簡直中正下懷。就算真係俾普巴控到個波,對手喺後防堆晒成村人喺禁區頂,自己又唔走位,係好難組織到一針見血嘅攻勢,除非對手進攻時交失波打反擊,情況就好似普巴踢曼聯時,對住中下游球隊死守你然後等反擊一樣。咁普巴有無啲對應方法呢?其實唔係無,筆者建議普巴可以走去接近禁區頂位置,用身位一邊頂住對手一邊攞波,盡量接近對方危險地帶,又或者可以多啲入禁區,憑身高優勢做頭搥攻門。其實能夠有效利用自己優勢都係成為球星嘅一個關鍵嘅因素,普巴暫時做唔到依點。

嚟緊呢場法國對葡萄牙,普巴同般奴會各為其主對戰,究竟邊個可以帶領自己國家隊可以喺歐國杯走得更遠呢?我哋從四方面去分析:

個人技術:普巴同般奴左右腳都可以純熟運用,而且大家傳球技巧亦都高,無論係長傳、短傳、罰球同傳直線波俾前鋒線單刀,射波方面大家都有遠射腳頭,但走位方面般奴比普巴靈活得多,啲傳波走位做得比較好,所以個人技術方面般奴稍勝。

身體條件:普巴身型同力量兼備,無論食身位同頭搥都不俗,而且佢手長腳長,但身手算係靈活,係速度有啲慢。般奴身型就較單薄,身高亦都唔算突出,力量就還可以,主要係頭腦清晰,球賽閱讀能力強,係派牌型中場,所以身體條件方面普巴勝。

心理質素:普巴心態上仲係一個大細路,踢波順境時可以踢到識飛,但當踢得唔順時心情即時受到極大影響,嚴重影響臨場表現。般奴就有擔起成隊球隊嘅心,佢亦都肯做一啲自己唔擅長嘅工作,例如:防守。佢亦都會帶頭鼓勵隊友,提升士氣,所以心理質素方面般奴勝。

隊友支持:普巴喺隊中比較多支持,啲隊友普遍都肯主動俾波佢,等佢有控球在腳嘅機會,發揮佢最擅長嘅技能,再加上前有麥巴比,後有簡迪支援,令佢踢得比較輕鬆。般奴就好似少啲隊友主動肯俾波佢派牌,主要原因係左右中場祖達同施華都有個人技術可以自己組織攻勢,唔需要完全倚賴佢,所以有好多時般奴都攤起雙手要波,咁佢喺隊中踢得會好辛苦,所以隊友支持方面普巴勝。

睇晒四方面普巴同般奴各勝兩項,但隊友支持方面個比重就比較大,因為踢波唔係一個人踢晒,所以筆者睇好法國隊多啲。唔知讀者又會點睇呢?


如果大家仍然未申請或想申請NowTV黎睇波,呢條連結有月費低至HK$268.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

留言


請按此登錄後留言。未成為會員? 立即註冊
    快捷鍵:←
    快捷鍵:→