[多奇出品] - 熱刺對曼聯賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


今場曼聯作客熱刺喺佔有較多有威脅嘅埋門底下以1:1逼和對手,有部份球迷會覺得好唔抵,而你哋又點睇呢?依度有三點值得討論下:

1)究竟馬斯亞、占士值唔值得打正選,而拉舒福特又應唔應該打晒全場呢?

2)中場可以有多個組合,但究竟可否打全攻型陣式(即係同時出般奴同普巴加一個防中)定係都係打雙防中加般奴或普巴?

3)防線雲拜沙卡同梳爾嘅表現對版,但麥佳亞同連迪路夫依對組合係咪要堅持呢?

1)如果以今場表現去睇,我認為馬斯亞同占士未必值得打正選。首先講馬斯亞,佢實在太冷靜,冷靜到一個地步係球迷感受唔到佢有鬥心去做前場搶逼,當冇波在腳時佢又冇適當嘅走位製造埋門嘅機會,而當有五五波時佢又少同對手爭奪,唯一強項都係速度同最後一腳射波,但馬斯亞次次都係得依一招,實俾對方後衛睇通晒,所以佢最有威脅嘅埋門就係禁區內左腳射嗰一球,得嗰一腳。其次係占士,佢又係好易俾後衛睇通,一嚟佢冇身型,二嚟佢地波傳送技術仲未純熟,今場有幾球傳波都俾對手截到,佢都係得速度快,但當敵方冇空位俾佢爆,佢就會無晒威脅。就算有些少位俾佢爆,但因為身位唔夠強而俾對方食位。當然英超停賽咁耐加上熱刺防守嚴密,都需要時間適應,不過,我覺得佢哋兩個踢法係定時需要變吓,好似馬斯亞同福仔調位做較炮,占士亦都要多做小組入涉。福仔就因傷冇比賽好耐而缺乏比賽狀態,射門觸覺都要慢慢建立,不過佢上半場開始都有一球近射,可惜俾洛里斯擋出。不過我認為佢應該要被換出,始終佢需要調整狀態,佢今場其餘時間都冇建樹,而且容易失去控球權,失第一球都係因為佢控失第一腳先再俾人打反擊。
2)以今場攻擊線嘅表現,普巴唔應該打中場咁浪費,而應該打前一格。中場就出番般奴、麥湯文尼加費特。因為其實今場嘅中場線打得相當好,無論係般奴、麥湯文尼定60分鐘就被換出嘅費特。麥湯文尼同費特喺保持中場控球權做得好好,地波嘅傳送亦都好穩陣,唔容易俾對方搶到個波。中場遮線同攔截亦都做得稱職,成功延遲對方攻勢,有時甚至搶到對方腳下球。般奴除咗射入12碼嗰球係靚之外,佢進攻亦都極具侵略性,尤其係當普巴後備落場,有兩個組織係好靚。不過,前線始終爭一個可以停到波嘅前線,恩哈路可能係一個較適合嘅人選,另外一個我覺得可以做到就係普巴。當福仔慢慢回復狀態之後,福仔、普巴加多另一位攻擊球員就更加令人期待。普巴可以做頭搥攻門,亦都可以喺前線控定個波同做個人盤扭。另一個話題就係嗰兩個飲水休息時間幫咗熱刺好大忙,今場蘇B好明顯係人腳充足,尤其喺60分鐘嘅換人,換入普巴同格連活特嗰吓打到熱刺無從適應,可惜就係一個休息就俾摩佬喺給打法上做番適整,依個蘇B需要諗諗計。
3)今場梳爾同雲拜沙卡表現對版,除咗防守好少跟甩人之外,攔截、補位亦都做得好到位,尤其係雲拜沙卡防守到孫興慜冇辦法做個人突破,佢只係做到分波嘅工作。而佢哋兩個亦都好主動做助攻,威脅仲比占士同福仔大,令到對方後衛疲於奔命,如果前面有個高大嘅中鋒,我諗應該可以製造好多入球機會。不過,另外嗰兩個中堅麥佳亞同連迪路夫俾人感覺始終唔夠穩陣,簡單一兩個攻勢就好容易俾人攻破。麥佳亞全場表現尚算及格,當然失第一球有好大嘅責任,咁簡單就俾人推過。其餘時間主動攔截搶番控球權,或者應付高空波亦都做得出色,守角球亦都好穩健。不過連迪路夫始終都有啲驚惶失措,當然佢嘅控球同傳送係做得唔錯,但始終中堅首要條件係防守要穩陣。可能中堅人選始終有限,但俾我選擇我會用拜利夾麥佳亞,因為拜利有主動作出攔截嘅能力,連埋麥佳亞嘅包抄,相信個防守更加有效率。龍門迪基亞失第一球個反應係遲咗一啲,最終擋唔正個波入網,其餘時間表現都尚算合格。
雖然今場比賽贏唔到,但蘇B嘅調動極具心思,而球迷都睇到般奴同普巴係有正面嘅化學作用,依家係要解決前鋒線表現唔穩嘅問題,希望曼聯下場表現會更有進步。


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
如欲購買曼聯官方產品,可到RS與曼聯官方網店United Direct合作的連結: http://bit.ly/royceud1
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→