[多奇出品] - 曼聯對般尼茅夫賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


今場比賽曼聯主場以5:2擊敗般尼茅夫,球迷有幸地欣賞到球隊中前場嘅亮麗表演,不過後防就打得一塌糊塗。究竟球隊發生咗啲咩事呢?
首先就分析佢哋攻擊線點解表現得咁出色先:

一、比賽中途落雨,場地濕滑。其實依個因素有好有唔好,唔好處係難於組織地面攻勢,好處係只要一起到腳,龍門想擋出個波就比較困難,所以球迷見到曼聯嘅入波有三球都喺禁區外,一球就係十二碼,另一球係禁區右邊。當然依個係外在因素,另外仲有配合埋以下一點。

二、攻擊線靈活走位、製造有利射門機會。比賽開始時,福仔打左邊、馬斯亞中間、格連活特就打右邊。依個平常進攻模式,對手好快就適應到。要到入第一球,馬迪交俾走咗去右邊嘅福仔(即係原本格連活特個位),當時對方後衛好明顯係適應唔到嗰吓嘅轉變,成個防守陣式亂咗。然後就俾到機會福仔傳俾般奴,般奴亦都好醒目,即刻卸身傳俾左邊嘅格連活特(反而佢走向福仔嗰個位),當然佢就唔會放過依個難得嘅機會用佢黃金左腳一射入網。另外,第三球就馬斯亞突然間過咗嚟左邊,梳爾一個叠瓦走位,分散咗對方後衛嘅注意力,製造到空位俾馬斯亞帶順起腳射門,個波飛向右上角入網。雖然睇落佢哋嘅走位好似好隨意,但如果冇咁上吓默契同時間嘅掌握係唔容易做到個效果。

三、格連活特把握力強。今場見到格連活特只要係有源源不絕嘅供應,就能夠將機會轉化成入球。好似第一球咁般奴卸身交個波俾佢,佢左腳一控一射,全無多餘動作同猶豫嘅心態,喺場地濕滑嘅狀態下個難度係好高。而佢入嘅第二球無論係控同射都做得出色,馬迪傳咗個波俾佢後,佢係用左腳一控,然後再用右腳射門,佢以依種難度極高同較少見方式去攻門亦都令對方後衛無所適從。所以球迷唔好單單睇佢右腳射門嗰吓,仲有留意佢射之前嗰腳控球。

四、般奴、普巴嘅配合,激發馬迪助攻能力。相信球迷對普巴同般奴依對組合所發揮嘅威力都毫不懷疑。佢哋兩個傳波嘅技術精湛,可以係明刀明槍傳啲地波,又或者傳啲陰濕嘅滲透性嘅波,所以單單應付佢哋兩個就已經用好多精神同集中力,係咁就好容易忽略咗馬迪依位中場大將,令到佢有更多機會做啲有威脅嘅傳送。例如:球隊入第一球就係馬迪喺中場即時傳波俾右路嘅福仔。仲有第四球都係由馬迪傳波俾格連活特。

五、般奴嘅出現,令處理死球更具威脅。今場球隊處理死球嘅變化同威脅比之前更大。球迷可以睇到般奴嚟咗曼聯之後,佢哋嘅角球同死球提升咗一個層次。例如:之前對曼城有球般奴即俾突然衝前嘅馬斯亞射入。今場就有般奴擺定個波,然後俾普巴射罰球,雖然係唔入,但都嚇一嚇個門將。而佢亦都可以親自處理死球,球隊5比2嗰球就係佢入。不過,無論個波入唔入都好,最緊要係俾到個威脅感門將,門將一感到有威脅就容易出錯。

講完進攻點樣出色後就不如講吓防守發生咗啲咩問題?

一、麥佳亞場場正選,缺乏休息。麥佳亞幾乎每場都係正選,就算係足總盃同歐霸都幾乎打足,直到依家復賽差唔多一周兩場都係咁,就算係一個頂級球員都會身心疲累啦,更何況佢未去到頂級。今場第一個失球就係佢擋完對方射門,個波喺左邊底線落比史坦尼斯拿斯,然後麥佳亞喺情急之下做咗個好輕率決定就係標波。佢唔係擅於主動攔截嘅球員,結果就俾人通坑渠過咗。而下半場失嘅第二球係由佢交波失誤先至有馬迪傳俾拜利嘅手球,好明顯當拜利換入嚟之後,麥佳亞未完全調節到自己而傳失波。對中堅嚟講,一個少少嘅失誤都可以造成失球,喺咁大壓力嘅情況下比賽,休息係非常重要。
二、後防隱憂連迪洛夫。佢好明顯適應唔到英超前鋒嘅進攻風格,特別係對身型高大同有速度嘅球員。其實如果有留意第一球失波,當對方翼鋒斬個波過嚟,連迪洛夫係頂個波頂得唔正,落喺對方腳下俾佢射門。比着其他中堅,依啲波就一定要清到出去。仲有當佢單對單守住啲前鋒會俾人一種好唔穩陣嘅感覺,對於有足夠上陣機會保持狀態嘅中堅嘅講就真係唔合格。佢就好似以前嘅斯維斯達同受傷後嘅布朗,就算當時有頂級中堅里奧費迪南同第一年加盟嘅門將雲達沙拍住佢哋有兩場聯賽係輸四球,甚至歐聯分組賽都過唔到。不過連迪洛夫又唔係真係一文不值嘅,最低限度佢嘅控傳都做得幾好,所以我個人覺得佢打歐洲賽反而適合啲。

三、迪基亞領導能力弱。迪基亞固之然係身手好,反應快,但佢唔算係一位領袖型嘅門將,佢初嚟曼聯時都係由維迪同里奧帶住嚟踢,所以佢對中堅會有一定嘅倚賴性,唔係咁識得去提場。依家雖然有麥佳亞去做提場,但佢都會有亂同出錯嘅時候,而且對新加盟嘅球員嚟講,算係老大哥嘅迪基亞就需要從旁協助,分享經驗。依家講翻第一球失波,佢好明顯係捉路啦,諗住對方射地波而忽略咗射近柱嘅機會,佢有少少一廂情願之下選擇機會大嗰邊,點知結果正好相反,導致失波。
當然,後備力量薄弱都係一個重要問題。但無論點,曼聯已經開始回復以前強勁嘅攻擊火力。現在就睇吓蘇B點樣去做輪換俾主力回氣同提升後備球員狀態,始終賽程咁密,無可能場場都出同一班球員。


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
如欲購買曼聯官方產品,可到RS與曼聯官方網店United Direct合作的連結: http://bit.ly/royceud1
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→