[多奇出品] - 曼聯對曼城賽後檢討

Royce Sports 足球中心 一站式為您提供所有關於足球嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceSportsFootball/

曼聯喺主場打出精彩嘅一仗,以2:0擊敗曼城,我哋睇吓曼聯得勝嘅原因:
一、防守反擊,戰術得宜。今場攻擊線派咗占士同馬斯亞兩隻快馬打反擊,加上般奴喺中場做穿針引線嘅工作,後防就打三中堅,左邊連迪洛夫、中間麥佳亞,右邊梳爾,拍住兩邊翼衛雲拜沙卡同威廉斯。中場就有費特同馬迪。經過首循環嘅成功經驗,因為曼城主要打法都係以攻代守,所以佢哋後防線暴露好多空位俾曼聯攻擊球員去跑動,加上曼城球員尤其係中場踢法比較斯文,造就馬斯亞同占士可以發揮到佢哋速度帶波推進,對方後衛往往要到禁區頂先至犯規而輸罰球,所以雖然曼聯控球率係輸晒,但論攻勢入肉程度曼聯都唔講得笑。例如:馬斯亞有兩球喺左路引球推進,最後起到腳射門,可惜一球俾龍門接住,一球俾後衛擋出。占士都有兩三球喺右邊發難,甚至起腳射門,可惜又係俾龍門救出。
二、般奴穿針引線,靈活處理罰球。佢嘅加盟活化曼聯成條攻擊線,佢除咗控球在腳有威脅外,佢嘅無球走動亦都非常出色。下半場有一次占士帶波推進,般奴走入禁區入面空晒,如果唔係占士選擇自己射門,我相信交俾般奴入波嘅機會更加大。另外,佢處理罰球確係有一手,除咗開長波外,佢亦都可以開短,甚至挑高個波制造單刀波俾隊友。馬斯亞嗰球就係佢哋應該用眼神去示意一下,然後般奴已經做晒預備動作,只要馬斯亞一起跑,般奴就即刻挑高個波兼預計埋佢會即時起腳。般奴依腳完全係佢本能反應,係佢平時經常會做嘅動作,係日積月累嘅成果。當然除咗傳波佢都有射門能力,所以咁先至難估佢係傳定射。
三、防守球員集中,默契慢慢建立。今場無論中場定後衛都落力防守,馬迪同費特主要以體力快速壓迫對手,盡量唔俾對手鬆容咁控住個波組織攻勢。而當對方利用搓傳組織制造到空位,都會即刻塞番個空位,佢哋亦都做埋後防線前嘅一道屏障,負責企位遮線,間唔中亦都會做吓迫搶同幫後衛做協防。當下半場加入咗麥湯文尼後,就變咗費特踢左中,麥湯文尼踢右中,而馬迪就鎮守中路。佢哋面對對方嘅小組入涉保持高度集中同紀律性,往往將對方進攻線推出去外面,令到對方唔容易打入禁區,就算佢哋去到禁區,都會俾己隊球員作出攔截。如果要講攔截就要提雲拜沙卡,佢令到史達寧冇啖好食,之後馬列斯亦都嘗試過佢但都唔成功,成條右邊佢一個打晒。左邊梳爾同威廉斯一個靠經驗,一個就夠拼搏,兩個前後不斷互換位置,令到對方進攻球員無所適從。中堅麥佳亞同連迪洛夫或之後入替嘅拜利亦都做到攔截、封位等基本職責。球迷可以見到佢哋踢自己位置外,做協防嘅時間性都拿捏得好準確,經過多場比賽磨合,大家嘅默契已慢慢建立。
計埋今場2:0贏曼城,曼聯已經十場不敗同八場零封對手,希望曼聯個勢可以繼續保持落去,爭到歐聯資格同埋可以捧番個杯。


Royce Sports 足球中心 一站式為您提供所有關於足球嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceSportsFootball/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→