[多奇出品] - 曼聯作客紐卡素賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


曼聯今場作客喺落後1球之下連入4球,以4:1擊敗紐卡素,對球員嚟講挽回咗一啲信心。我哋不如一齊睇吓球隊今場打成點:
一、般奴同馬達非常合拍,令進攻套路變化多端。馬達同般奴都係球賽閱讀能力強、傳波罰球造詣精湛同埋肯走位主動配合隊友嘅球員,所以同佢哋合作會好舒服。馬達同般奴會好快察覺邊啲隊友走緊位,邊啲隊友係需要攞波,然後就以最快速度同最令隊友舒服但對方又唔易察覺嘅情況下將皮球傳俾佢哋。最重要係般奴同馬達唔會企定喺度等波到,佢哋係不斷傳波走位然後走位接應來球,加上速度快嘅占士同福仔,又有費特同雲拜沙卡上嚟做助攻射門,所以今場曼聯射門有28次14球中框。今場早段失咗一球波之後,曼聯攻勢就浪接浪咁攻。先有上半場中段馬達傳俾占士,占士俾番馬達再回後俾般奴,佢第一時間抽射死角入網,可惜回傳嘅馬達越位在先。跟住般奴一個直線交俾馬達半單刀射門俾對方龍門卡爾迪洛亞擋出,之後角球就由馬達開俾麥佳亞頂入。今場曼聯角球攻勢非常有威脅,麥佳亞甚至有球攻門被對方球員護空門救出。到下半場,曼聯火力無減弱。直到換埋雲迪碧克之後,雖然要經過幾分鐘適應期,但之後就發揮效果到85分鐘由雲迪碧克發動攻勢,般奴之後就接應傳波,再由馬達傳俾福仔,般奴一個叠瓦接應福仔接波一射破網。依個攻勢可以俾球迷一個期待,將來馬達、般奴同雲迪碧克三個中場嘅合作。
二、費特同麥湯文尼防中拍擋發揮作用,減低後防壓力。費特同麥湯文尼依對防中拍擋喺今季聯賽係第一次出場,除咗開賽頭三分鐘連迪洛夫一個標波失誤導致後防中路防守混亂,繼而令到梳爾擺烏龍失一球外,其餘時間佢哋兩個防守得稱職。費特用佢跑唔完嘅體力去做迫搶,等對手唔可以從容地組織攻勢,而麥湯文尼就用佢身型優勢去爭搶對方腳下球同埋高空爭頂,搶到唔少控球權,兩個防守表現非常落力,令到球隊雖然作客但控制整個戰局。

三、占士、福仔、費特同雲拜沙卡喺般奴同馬達帶領底下發揮出進攻嘅潛能。由於馬達同般奴交波快而準,令到占士佢哋多咗好多控球時間同射門機會。福仔喺上半場短短28分鐘就已經有3次射門機會,占士上半場亦都係差唔多,只不過佢哋唔係越位在先就係把握唔到。直到下半場馬達一個直線傳俾福仔,福仔以佢嘅速度令對方後衛犯規搏到12碼,可惜般奴射失咗。之後當雲迪碧克換入嚟占士換出,福仔好似成個人都得到釋放,喺完場前短短10分鐘交出兩個助攻同一個入波。先係同般奴做個叠瓦助攻俾般奴射入,之後嗰球就交俾右路嘅雲拜沙卡射入,最後臨完場之前般奴一個長傳俾福仔快速推進單刀射入,都可以睇到換咗啲正選球員之下,佢哋係踢得生咗好多。
四、迪基亞做咗兩三個關鍵撲救,令球隊不致再失波。迪基亞除咗失第一球外,其餘時間都非常集中,尤其喺下半場救咗一球對方喺小禁區嘅近射,令球隊不至於再度落後,所以球隊贏波佢都應記一功。

當然蘇B唔再用勝利11人,將普巴擺落後備,出馬達加強中前場輸送效果,另外又用麥湯文尼同費特打防中加強中場活力亦都值得一讚。不過,球隊亦都有兩點需要注意:
一、占士實力見頂:今場占士有好多控球機會,但係佢無論喺組織攻勢同埋門都達唔到預期效果,甚至連威脅感都俾唔到對方守衛,浪費咗好多機會。話晒今次係對紐卡素算比較容易應付,如果係對其他強隊失去一個有威脅嘅攻勢,個比數可以差好遠。不過,球隊今季有咁多比賽,唔用佢好似又唔係咁合理,究竟蘇B可唔可以令佢短期內提昇戰鬥力呢?
二、般奴承擔太多責任,令到身心俱疲。般奴雖然有純熟球技同良好比賽態度,但佢肩負太多責任,加上部份隊友唔爭氣,令到佢踢得好辛苦。今次已經算有馬達分擔組織同處理罰球嘅工作,但依家季初佢已經咁,仲有好多比賽等緊佢。希望蘇B可以試吓用雲迪碧克替補佢。

三、普巴將來喺球隊嘅位置。今場唔出普巴成隊波即刻生晒,但係普巴啱啱先同球會延長咗合約一年。依家中場就好似多咗一個打防中又唔係,打攻中又好似唔夾嘅球員喺度。最驚係今場放普巴打後備好好哋,下場就俾佢打番正選防中。到唔俾佢打正選又話要離隊,蘇B對住佢又會點應付呢?

四、龍門出場時間分配又點做取捨呢?軒達臣同迪基亞都係出色嘅門將,情況好似上年有羅美路,但今年情況就更加複雜,因為今年係要踢歐聯,層次比上年歐霸為高。究竟蘇B放唔放心俾喺兩位門將作輪換呢?

最後,球隊贏咗固然開心,但球會問題唔會因為贏咗一場而會解決,嚟緊嘅歐聯同聯賽連場硬仗先至係戲肉。依個希望球隊可以保持個勢先。

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→