[多奇出品] - 曼聯作客對錫菲聯賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


今場曼聯作客驚險地以3:2險勝錫菲聯,原本球隊50分鐘就領先3:1,可惜86分鐘都被追到3:2,不過最後都保持勝局。不如我哋睇吓今場有咩值得讚賞嘅地方:
一、福仔、馬斯亞利用速度製造入球機會。福仔入第一球波嘅入涉時間恰到好處,當然連迪洛夫嘅長傳俾得都靚,令到福仔偷到兩個身位,之後佢嗰腳控得到位,然後一腳勁射應聲入網,動作一氣呵成。福仔入嘅第二球個組織相當快,令錫菲聯球員嚟唔切對應,首先普巴扭過兩個對方球員再傳俾般奴,然後般奴再傳俾格連活特,展轉之間就俾咗馬斯亞一控,福仔一射射穿門將入網,個人梅開二度。如果唔係上半場34分鐘馬斯亞傳俾福仔單刀嗰球俾龍門擋到,就可以連中三元。另外,馬斯亞今場狀態還可以,而佢射入嗰球走位亦都靈活。首先攻勢由般奴發動,般奴傳俾普巴,普巴即彈高波俾馬斯亞,雖然佢第一腳漏踢,但反而擾亂咗龍門,然後補射入網,攻入今季聯賽第一球。

二、般奴、普巴喺對方冇緊迫底下作出多次關鍵傳送。今場普巴進攻上表現的確亮麗,除咗有一球助攻外,入第三球時佢喺中後場作出關鍵盤扭,扭過兩名球員然後傳俾般奴。而由於錫菲聯選擇唔壓迫般奴令佢可以作出多次關鍵傳送,製造好多有威脅嘅攻勢,尤其馬達下半場入替後77分鐘有球射門就係般奴傳俾左邊嘅馬斯亞,馬斯亞傳中俾佢第一時間撞射。另外,仲有一球喺74分鐘福仔傳俾般奴傳中,馬達第一時間做調整俾馬斯亞攻門,咁就可以睇到般奴同普巴今場比賽有幾大發揮空間。
三、馬迪奮力守住中場。馬迪雖然今季狀態一般,速度慢,但今場憑佢經驗同拼勁守住中場。因為始於佢嘅拍擋係唔擅長防守嘅普巴,馬迪除咗要守住自己地帶外,佢仲要為普巴補位。好彩錫菲聯球員無論喺速度同技術上唔算出色,憑馬迪經驗同補位都應付到。仲有自從甸軒達臣失第一球後,馬迪都會主動幫波,穩定中後場控球,而佢嘅左腳傳送,亦好多時能夠順利傳上俾進攻球員,仲有佢嘅身高優勢,幫到球隊防守高波。最重要當錫菲聯追至2:3時,中場就係需要有依位老大哥嘅指揮,穩定軍心。
四、甸軒達臣完場前救出必入波。甸軒達臣雖然比賽早段因為解圍失誤而導致失波,但信心無話因此動搖,而喺比賽中段接連擋到對方嘅射門,而到臨完場前更擋出穆錫嘅勁射不致失波,可以話係將功補過。

除咗以上重點之外,當然要讚球隊永不放棄嘅精神。不過,有幾點都值得我哋思考:

一、般奴真係無人代替?下半場中後段換出般奴之後,好明顯中場就再組織唔到攻勢,係因為雲迪碧克太少出場機會,令到佢狀態唔穩定致大家默契未夾到。

二、甸軒達臣適唔適合做後備門將呢?甸軒達臣之前喺錫菲聯打開正選,今季要佢做後備就緊係唔慣啦。做後備門將個心理質素要非常穩定同埋要累積一定經驗,而佢年紀輕有雄心壯志,成日擺佢落後備只會撲熄佢團火。
三、普巴係有攻擊天賦但唔識防守。普巴無錯佢可以為球隊帶嚟創造力,但佢唔擅長防守。佢喺中場好少會做協防同補位,當馬迪俾人過咗,成條防線就會散晒,好似上半場早段有球馬迪俾對手挑過,之後對方就直推中路傳邊線,最後造成攻門。所以係咪出普巴真係有好大爭議。
四、球隊仲未搵到適合前鋒為將來爭標舖路。馬斯亞同福仔始終係擅長踢邊,格連活特又好似無咩機會俾佢發揮,而卡雲尼只係過渡性質。係攻擊線上有創造力嘅中場但缺乏有把握力嘅前鋒,今場對後防鬆散嘅錫菲聯應該可以踢得更好。

最後,問題要一下子解決唔係話咁易,而球隊將會迎接聖誕賽期,只希望佢哋可以有穩定嘅表現。

如果大家仍然未申請或想申請NowTV黎睇波,呢條連結有月費低至HK$248.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→