[多奇出品] - 曼聯作客對般尼賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


曼聯今場有驚無險地以1:0擊敗般尼全取3分,進佔榜首位置。踢完依場比賽之後,筆者有3個問題覺得係值得思考:
一、曼聯嘅入球數字排第二位,係咪代表佢哋攻擊能力已經充分發揮呢?

二、普巴近幾場嘅出色表現點樣幫到球隊呢?而佢嘅表現可否挽回球迷對佢嘅信心呢?

三、中堅拜利拍住麥佳亞算係比較穩健,但麥佳亞已經累積4面黃牌,咁有咩後備方案呢?
一、曼聯到目前為止踢咗17場英超入咗34球,助攻就有24個,即係平均每場入2球,入球總數僅次於利物浦嘅37球而助攻就排第一,睇落曼聯嘅攻力好似好強。不過睇番數據,球隊所入34球當中有5球係十二碼,全部都係由般奴射入,所以真正係自己組織所入嘅波同其他前列球隊相差唔遠。另外,睇番入球同助攻數字分佈,主要係由般奴同福仔所做出,前者入咗11球同做出7個助攻,後者就入咗7球同做出5個助攻,兩位球員嘅入球同助攻數字已經佔咗全隊嘅一半,之後就係卡雲尼嘅3個入球同馬斯亞嘅3次助攻。從以上數據可以反映曼聯入球分佈係好唔平均,對手只要釘死般奴同福仔就已經令曼聯陷入苦戰。另外,數據亦反映出曼聯浪費黃金機會嘅數字都幾驚人,般奴、福仔同馬斯亞今季分別浪費8、7同6次黃金機會,般奴就好難怪佢,因為佢要瞻前顧後,進攻係佢,防守又係佢,又要開角球同自由球。但福仔同馬斯亞作為前鋒係射失咗唔少單刀波,例如:今場比賽臨完場前卡雲尼一個靚助攻俾馬斯亞單刀射失,錯過拉開比數嘅機會。球隊如果想有穩定嘅表現,前鋒線嘅把握力需要加強。
二、普巴近幾場表現出色,從今場數據睇到佢進攻方面有一個入球,球隊亦都以1:0小勝對手。而佢傳球成功率有90%,當中製造到2次機會俾隊友,一球俾卡雲尼倒掛,一球傳俾馬斯亞射門。喺防守方面,佢有3次空中爭頂成功,2次攔截成功、2次截到對方傳送同埋12次奪回控球權。此外,佢穩健嘅控球同出色嘅傳送大大減輕般奴負擔,令般奴有回氣嘅機會。當對方後衛集中防守般奴遠射時,普巴突然一腳窩利揪射,殺個對方一個措手不及,而佢嘅頂上功夫亦都幫助球隊防守高空波。由此可見,除咗般奴之外,佢係令球隊可以爭取勝利嘅必要元素。不過當中有一個問題就係普巴出色嘅表現同積極嘅比賽態度可以維持幾耐呢?當球隊打緊劣勢波時佢又可唔可以挺身而出呢?尤其係佢個經理人同曼聯關係咁差,一陣間佢又發表啲影響士氣嘅言論又點算。筆者覺得唔可以單單睇佢打到幾場好波就挽回到所有球迷嘅信心。
三、依兩場麥佳亞拍住拜利表現極之出色,佢哋一剛一柔,拜利主動作出快而準嘅攔截而麥佳亞就做包抄同高空爭頂,從數據顯示出拜利同麥佳亞總共奪回14次控球權,多次化解對方嘅高空攻勢,令球隊可以保持零失球,當然般尼前鋒把握力弱都係其中一個因素,但對比連迪洛夫,拜利就能夠同麥佳亞互補不長短,只要拜利唔好受傷同埋再加強大家嘅默契就會更好。其實筆者覺得麥佳亞同連迪洛夫係同一類型嘅中堅,都係擅長包位,但要佢哋主動作出攔截就唔係做得咁好。當然麥佳亞表現突出好多,尤其喺空中爭頂得勝次數就多過連迪洛夫一倍,總共72次對33次。不過,蘇B都要諗吓計,麥佳亞已經累積咗4面黃牌,究竟有咩替補可以代替佢呢?如果出連迪洛夫同拜利對應高空波又會好似輸蝕咗,出後生仔蘇B可能會覺得佢哋唔夠經驗,咁蘇B會點做呢?依個就真係佢先知。

嚟緊球隊會對利物浦,到時相信會係一場競爭非常激烈嘅比賽,希望尤其係前鋒球員可以生生性性打場好波,証明自己嘅價值啦。


如果大家仍然未申請或想申請NowTV黎睇波,呢條連結有月費低至HK$248.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→