[多奇出品] - 曼聯作客對白禮頓賽後檢討

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/



曼聯今場幸運地以3:2擊敗主隊,雖然係贏波,但相信球迷唔係咁滿意球隊嘅表現。我哋不如分析一下球隊今場踢成點:

首先講贏波原因
一、般奴作出關鍵傳送兼射入十二碼。般奴今場喺進攻上嘅表現可以話係全隊最穩定,雖然佢都有傳失波,但曼聯入嗰3球都同佢有關。第一球佢喺左路開個急勁罰球俾伏兵遠柱嘅馬迪,當時白禮頓班後衛完全唔識應對,然後馬迪接應來球傳中省中登克彈入。第二球又係般奴佢發動反擊,傳個靚直接俾福仔,佢就把握球隊僅有機會,左級之後再向右級,然後射門省中登克入網。而最後一個入球就更精彩,因為臨完場球十二碼係球隊勝負關鍵,係所有球員同球迷焦點,加上球隊啱啱先俾人追和嗰種形勢上轉變,令佢面對極大嘅心理壓力,所以最後佢以最穩陣嘅射法起腳而唔用小跳步射入十二碼。要喺大半隊攻擊球員表現低迷下保持穩定狀態,除咗要有技術同球賽閱讀能力外,堅定嘅意志同鬥心一樣重要。
二、連迪洛夫同梳爾分別喺防守同進攻都作出貢獻。連迪洛夫對比首輪對水晶宮嘅比賽表現有明顯進步,無論係補位定攔截都表現稱職,而且好少犯規,尤其係上半場多次瓦解白禮頓嘅攻勢,下半場亦都無犯特別致命嘅錯誤。另外,梳爾喺進攻上亦都表現穩定,尤其係當球隊落後一球之後,佢好多時都夠膽喺對方後場引球推進,從而搏到唔少罰球。球隊第一球入球亦都係佢搏到罰球而嚟,到下半場佢喺進攻方面都保持水準,除咗搏到罰球外,亦都協助球隊打快速反擊。

三、對方球員射門多次中柱中楣。其實白禮頓表現比曼聯出色好幾倍,射門次數亦都多過曼聯3倍,可惜嘅係只計托沙就有3次射門中柱,而全場白禮頓就錄得5次中柱中楣,嗰5次射中柱當中近一半都係單對單面對迪基亞射中,佢係已經投晒降,射唔入龍門只可以話曼聯好彩。

講完贏波原因之後,就講吓球隊表現唔好嘅地方
一、攻擊球員狀態低迷。馬斯亞、福仔、格連活特都係技術型球員,三個同時都有一定射門觸覺,但佢哋對抗性不足嘅弱點都係好明顯,而且冇頭搥攻門,只要對方守衛打密集同埋用身型優勢緊迫佢哋就好輕易對應到。講番馬斯亞先,今場佢被對手緊迫,令到佢要喺禁區外背對龍門情況之下回傳,令佢全場僅得1腳射門,而當對方控球時,佢嘅前場緊迫亦做得唔夠徹底。般奴下半場有兩球靚傳,可惜馬斯亞都係推甩腳,所以佢根本俾唔到威脅對手。福仔今場雖然入到1球,但佢大部份控球時間都係作傳送,好少喺邊線出波同用速度做個人突破,反而要梳爾做埋佢嗰份,大大減少左路嘅威脅。而格連活特都係老問題,佢應該係打9號位,依家要逼佢打右邊其實係限制佢嘅發揮,因為佢個優勢要喺正禁區內外先發揮到佢射門觸覺,希望蘇B可以俾格連活特打正前鋒。

二、普巴狀態不足,未能為球隊做到助攻助守嘅工作。普巴今場表現未達預期水平,先後喺上同下半場最少交失波2次以上,減低咗球隊攻守效率之餘,亦都好容易俾對手打反擊。另外,雖然佢好努力做防守嘅工作,但始終防守唔係佢專長,所以係中場做唔到有效嘅掃蕩工作,令球隊後防嘅空間完全暴露出來,而且普巴下半場有球波差啲輸十二碼,嗰球筆者認為只係五五波。

三、兩翼衛頻頻暴露空位,俾對手狂攻射門。梳爾雖然進攻表現合格,但防守尤其係下半場就經常俾對手傳中,令到門前風聲鶴唳。另外,雲拜沙卡今場經常移入中路,尤其係當白禮頓翼鋒左邊出波時成日同連迪洛夫重叠位置,令到對手搵到空間射門,只要對手稍為有啲運氣,球隊早就輸多幾球,依度暴露咗無人提場嘅問題。
四、般奴雖然成為贏波功臣,但球隊失波佢都有責任。當然球隊失嗰兩球同般奴係有直接關係,第一球佢撞跌人輸十二碼,第二球係佢走甩咗對手頭搥頂入。不過,筆者唔係要怪責佢,反而係欣賞佢比賽態度。佢雖然係打10號,但前面見佢,後面又見佢,助攻助守,非常落力。可惜部份隊友唔爭氣,本來打攻中嘅佢,都要落埋自己禁區做防務工作,始終佢唔係全能,無可能負責晒球隊前、中、後場所有嘅工作,所以惟有寄望新加盟嘅雲迪碧克注入新動力去幫助球隊。

睇今場比賽嘅心情同坐過山車無咩分別,當然喺聯賽攞到3分蘇B固然開心,但作為球迷感受會唔會有唔同呢?可能有啲球迷希望見到球隊大敗一場,等球會高層同教練能夠正視一啲問題。


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→