[多奇出品] - 從費sir帶領曼聯經歷中去睇蘇B帶隊嘅問題?

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/
筆者係由2001年開始留意曼聯同睇佢哋嘅比賽直到依家,當中有好多美好回憶。例如:2006-2009年賽季曼聯攞到聯賽3連冠加埋歐聯冠軍,朴智星點樣喺球場上以佢嘅用唔完體力去為球隊拼搏、爭取入球,為亞洲人爭光,仲有見到一班實力超卓而又肯為球隊付出一切嘅球員為球隊比賽,好似雲達沙、里奧、維迪、朗尼等係十隻手指都數唔晒。贏奬杯對當時嘅球迷嚟講係理所當然,但依家就發覺依個已經係遙不可及嘅目標,究竟當時費sir用咗啲咩魔法可以提升到球隊實力去咁高嘅層次而喺依家又見唔到呢?

一、善於運用多功能球員,俾主力有充足休息時間。喺費sir唔同執教年代,總會有啲實力未去到球星級,但又非常實用嘅多功能球員,其中最為人熟悉係奧沙。奧沙打中後場個個位置,甚至龍門都有番咁上吓水準,而且仲試過係聯賽(2004-2005年球季對阿仙奴同2006-2007年球季對利物浦)射入關鍵球協助球隊贏波,佢嘅全面技術令到費sir作換人調動時更加得心應手。當然除咗奧沙之外,仲有菲臘仔,佢都係可以打到中後場多個位置,都係非常實用嘅多功能球員。但到咗蘇B執教就唔再見到有依啲球員,其實依類球員有咩好呢?佢哋由於了解到唔同位置需要點樣去踢,所以佢哋嘅視嘢同埋走動範圍會比較大,技術會全面好多。當球賽陷入僵局時,最容易作出變化就係佢哋,球隊踢法就變得更加靈活。例如:當球隊得分點俾對方睇實晒,奧沙依類防守型而又可以間中得分嘅球員就會被忽視,咁佢就有機會偷雞。
二、有效提升後備球員嘅質素。費sir當時對後備球員嘅質素要求好高,而且亦都用好多時間同心機去栽培同安撫佢哋。費sir曾經講過做後備球員比正選嘅係更難,佢哋一入到球場就即時要進入比賽狀態,作出扭轉局勢嘅準備,所以後備球員喺場外唔係只係睇波,亦都唔係淨係做啦啦隊。佢哋要有敏銳嘅球賽閲讀能力,亦都要無時無刻進入作戰狀態,留意將要面對嘅對手長處同缺點同諗對應策略。由於費sir極之重視後備球員,佢無時無刻都會代入、安撫同俾機會佢哋,所以曼聯喺費sir任教下係有好多出色嘅後備。例如:小豆、舒寧咸同蘇B等。蘇B可能已經忘記咗後備球員嘅重要性,忘記咗自己點樣喺1999年歐冠對拜仁扭轉戰局嗰一刻。依家佢吓吓80分鐘換人嘅策略同相信後備球員能力嘅程度都好低,所以佢哋個比賽心態同士氣都受到嚴重嘅打擊,正選球員平均表現已經唔係好,而後備球員嘅士氣又俾佢打沉,咁就係點執隊波都死。
三、團隊係最首要,個人榮辱反而係其次。喺費sir年代冇一個球星係大得過整支球隊,每位球員都以代表曼聯比賽為一種榮耀,就算係曾經為曼聯立下唔少功勞嘅堅尼、碧咸同雲尼斯達萊,只要係影響到球隊整體發展都會被賣走,務求令到整個團隊可以運作得暢順。但現在部份狀態未達理想水平,而且又唔係專心一意為球會踢波嘅隊員則繼續可以穩佔正選,咁除咗對默默耕耘、不斷付出嘅後備球員唔公平之外,亦都令一啲喺場上努力打拼嘅正選球員極之不滿。但蘇B喺紀律方面執行得過於寬鬆,普巴、福仔同馬斯亞等表現未如理想嘅往往可以打正選,但馬達、恩哈路同雲迪碧克就只係可以喺聯賽杯上陣。蘇B應該嘗試俾後者打多D正選,無論效果係點都好,佢會俾到其他球員睇,要踢曼聯嘅正選起碼要有為球隊全力以赴嘅心態。
我覺得以上嘅要點,作為領隊嘅蘇B一定會知,但實唔實行到就係另一個問題。現在最關鍵嘅係蘇B可唔可以轉危為機,費sir當年都唔只一次喺被炒邊緣,好似2003-2006年,當時雲佬、堅尼同碧咸離隊,而聯賽連續三年攞唔到冠軍,相信十至十一月賽程蘇B都唔易捱。


============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


留言


請按此登錄後留言。未成為會員? 立即註冊
    快捷鍵:←
    快捷鍵:→