[多奇出品] - 在曼聯的去與留 - 連加特

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


曼聯迷依家除咗關心己隊可唔可以追趕曼城,後上奪得英超聯賽冠軍之外,其次就係連加特喺韋斯咸嘅火熱表現同埋究竟將來佢係留低喺曼聯定將佢賣走,依個都係值得討論嘅話題。連加特依家喺韋斯咸出賽10場入9球同3次助攻,平均每場就入1球,而且佢亦都有帶動隊友嘅能力,令到韋斯咸有爭歐聯嘅資格。不過,連加特始終都係暫時外借俾韋斯咸,到季尾佢究竟係留低定離開曼聯,球迷嘅意見暫時都有分歧,而我就有以下嘅睇法:
首先筆者係希望連加特繼續留低,原因係:

一、連加特實力提升,有足夠條件幫助球隊。當佢未被借到韋斯咸時,未係好幫到球隊。尤其喺般奴轉會嚟曼聯之前,蘇B一直都俾機會佢,可惜當時唔係控波控甩腳,就係有射門機會就唔中框。依家佢得到莫耶斯嘅幫助,潛力得到釋放,實力亦提升到另一個層次,蘇B相信如果曼聯想喺英超同歐聯大展拳腳就需要連加特依塊拼圖,尤其球隊喺進攻中場同右路缺乏人手,今季般奴可以打足成季,但下個賽季呢?而且買辛祖喺依家未必係一個理想選擇,價值又唔平同埋都要時間去建立默契,所以連加特留喺曼聯應該有發揮嘅空間。
二、連加特需要喺曼聯再證明自己實力。無錯,佢喺韋斯咸得到重生,但係球技再好嘅球員亦都會繼續面對阻礙,因為始終足球係11個人踢,就算係C朗、美斯、尼馬甚至係伊巴都需要隊友支援同配合,而對手亦都會用盡所有辦法阻止你製造入球,所以筆者將會預計到連加特想製造入球會比之前越嚟越難。再者就算佢真係喺韋斯咸得到成功,佢心中都會有條刺喺度 - 就係佢效力曼聯期間嘅差勁表現。正所謂响邊度跌低,就應該由邊度爬番起身。曾經喺曼聯留下污名嘅佢,應該係時候用表現嚟回應曼聯球迷(包括筆者)嘅批評。
三、為得到更高成就,需要一班更出色隊友幫助。依家曼聯慢慢地建立到隊型,中場攻守漸漸得到平衡。攻有般奴同普巴,守有費特同麥湯文尼。可惜個板凳深度仲未夠,如果連加特肯留隊,蘇B調動可以更加靈活,有利來季四線比賽發展,而連加特亦都可以得到般奴同普巴協助,在比賽時更能夠發揮實力之外,亦都可以從中互相偷師,保持良性競爭。另外,連加特同普巴、福仔等年青球員早早建立深厚嘅感情,依啲嘢好難同錢嚟衡量。不過,一句講晒,佢如果想有大啲機會攞冠軍係需要一班世界級隊友嘅配合。

雖然話就話有留隊原因,但係亦都有其他因素阻礙連加特留喺曼聯:

一、球迷同領隊曾經離棄佢。未外借去韋斯咸之前,佢一出場唔係俾球迷笑就係鬧。就連蘇B都打算外借然後賣走佢,我諗佢依股怒氣都積聚咗好耐。到佢有表現先至話要番佢,佢緊係想對球迷同蘇B講粗口啦。
二、莫耶斯係連加特嘅再生父母。莫耶斯嘅遭遇其實同佢都幾似,都係俾球隊拋棄過,再加上如果唔係有莫耶斯就無今日嘅連加特。佢緊係希望可以報依個大恩啦,所以之後連加特永遠追隨莫耶斯並唔係無可能。
三、連加特成為韋斯咸嘅新寵兒。講真踢足球除咗自己攞奬外,最重要係有球迷嘅支持。佢喺韋斯咸所得到嘅支持同待遇都比响曼聯時有天淵之別。而球迷嘅支持可以話係力量嘅泉源,筆者相信連加特唔想捨班球迷而去,亦都唔想再次失去比賽動力。

最後無論連加特返曼聯或留喺韋斯咸筆者都會接受,畢竟自己之前都有份批評連加特,依家只係希望你好好享受足球樂趣之餘,亦都可以向自己嘅目標邁進。


如果大家仍然未申請或想申請NowTV黎睇波,呢條連結有月費低至HK$268.00再有野送嘅計畫益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

留言


請按此登錄後留言。未成為會員? 立即註冊
    快捷鍵:←
    快捷鍵:→