[多奇出品] - 卡域克為曼聯所帶來的短暫改變

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


自從蘇B被辭退之後,卡域克就臨危受命帶領球隊迎來關鍵兩戰,分別係歐聯對維拉利爾同英超嘅車路士。面對球隊成績大幅滑落,球迷普遍對卡域克唔敢抱太大期望,但估唔到佢哋可以喺劣勢底下贏維拉利爾,確定小組首名出線,而對英超榜首嘅車路士竟然可以喺領先嘅情況之下被逼和。依家就略略講吓卡域克嘅安排為曼聯所帶來嘅改變。

喺對維拉利爾嗰場,卡域克作出一個非常大膽嘅調動,佢將般奴放喺後備席,用雲迪碧克打正選。大家都知,般奴係必然正選,無論做派牌定攻門同樣出色,可惜係般奴被過度使用,令佢出現疲態,而佢又因為鬥心驅使,就算自己狀態滑落都繼續挺身而出,導致失誤增加,進攻效率大打折扣。相反,雲迪碧克今季極少有上陣機會,完全係雪到硬晒,再加上過往同隊友合作表現強差人意,球迷對佢普遍嘅信心唔太大,但因為雲迪碧克平時練習態度認真同專業,贏嚟唔少球迷嘅支持,希望蘇B可以俾佢多啲出場機會。
雖然雲迪碧克喺嗰場比賽嘅表現唔算突出,但都係情有可原,始終今季佢真係踢得少,但比賽裡面非常投入,就算有失誤出現或跟唔到比賽節奏,都以拼勁去彌補不足。當然迪基亞嘅出色表現,再加上運氣嘅幫助都為依場比賽嘅勝利打好基礎。結果雲迪碧克喺60分鐘被換出,由般奴入替,依個調動令到原本處於劣勢嘅曼聯開始攞番個勢。由般奴率領嘅中場,開始對維拉利爾作出壓迫,導致對方中堅出錯,俾C朗偷襲得手,領先1:0。到臨完場就由辛祖埋齋,射入效力曼聯嘅首個入球,以2:0擊敗對手,確定小組首名出線。另外,換入馬迪打三防中同最後換出C朗由馬達入替,亦都係球迷意料之外。
喺對車路士比賽,卡域克甚至將C朗放喺後備席,前線以福仔、般奴同辛祖掛帥,依個調動亦都係出乎意料之外,仲有佢再次排出三防中嚟加強中後場搶截能力而唔係用雙防中亦都係另一賣點。當然車路士嘅實力同氣勢遠高於曼聯之上,而比賽形勢亦都一面倒,依場又係迪基亞嘅神勇表現再次挽救球隊,當然全隊球員打出拼勁,努力防守亦都值得讚賞。結果因為車路士中場佐真奴嘅一個失誤,個波俾辛祖截到,單刀面對文迪,最後就把握機會射入龍門。雖然後嚟輸番個十二碼,被追成和,及後費特喺對方禁區邊搶到個波,可惜把握唔到黃金機會,否則球隊係有機會再次領先。喺下半場,卡域克換入C朗係大家預料之內,但佢再次換入雲迪碧克嘅舉動真係始料不及。辛祖亦都連續兩場取得入球,狀態慢慢冒起。

要令一隊無論士氣同狀態極度低沉嘅球隊重拾勝軌真係唔容易,要執其他人所遺留下問題就更難,卡域克能夠臨危受命,接手球隊而且能夠有唔錯成績,相信球迷應該都收貨。


如果大家仍然未申請或想申請NowTV黎睇波,呢條連結就益大家:
➡➡bit.ly/RSNowTVSpecialOffer

============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→