[多奇出品] - 再說雲迪碧克與般奴的技術分野 - 一切從細節開始

Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/


好開心雲迪碧克主場對李斯特成再次正選上陣,而今次佢係拍住馬迪打防中,一齊支援打攻中嘅馬達。但連續兩次得到正選機會嘅雲迪碧克,佢嘅表現好似未能夠完全說服到蘇B可以將重任交托俾佢,當中筆者開始亦都明白點解佢得唔到太多上陣機會,今次就再進一步分析雲迪碧克同般奴嘅一啲技術分野,等讀者更了解點解兩者喺球隊前途有咁大嘅差異。
一、走位接應隊友傳波。唔知點解就算雲迪碧克點樣盡力走空位,周圍都會有一至兩個敵人mark死佢,令佢好難接應隊友嘅傳波,究竟係點解會出現依種現象呢?照道理般奴出場多過雲迪碧克,對手應該對前者走位習慣更加了解至係。個關鍵就係喺走位嘅節奏同變速。雲迪碧克走位來來去去都係得一種節奏,而且好少話會做一啲假動作同變速去擾亂對手,所以就算佢走到空位,隊友總會覺得對手捕住佢,所以好少波到佢腳下。而當佢俾人捕住之後,就會企咗喺度,塞住中間條路,形成好多時隊友係想傳波俾佢,但又感到好困難。
般奴走位係按需要而改變節奏,有時快有時慢。當有對手mark緊佢時,般奴突然一個變速擺脫對手,從而令隊友容易俾波佢。但有時當佢真係俾對手防得好貼,般奴就會轉一轉諗法,由迎波轉變到拉空對方防守線俾其他隊友走位接應,務求唔會塞死喺中間。依種節奏轉變同腦筋上靈活變通,令般奴得到好多控球在腳嘅機會。
二、防守攔截。筆者留意到雲迪碧克防守風格,佢係捕住對方帶波球員,等到一有機會就會作出攔截,所以喺數據上佢嘅攔截成功次數應該會比般奴好啲。無錯依個防守方式對雲迪碧克依啲路數好嘅球員嚟講好似好適合,而且攔截成功之後又可以即刻打反擊,效果非常顯著。但係一場波90分鐘,雲迪碧克可以成功搶截到幾多球,仲有依個睇準落腳防守會容許對手會有更多時間空間去組織攻勢。

般奴嘅防守風格同雲迪碧克完全唔同,佢無論喺前場或後場都會俾壓力對手,當附近一有球員有波在腳就會即刻跑過去緊迫,務求擾亂對手個節奏,亦都唔俾佢哋時間空間去諗點樣組織攻勢,破壞第一傳。破壞咗第一傳之後,其餘工作好似攔截依啲粗重嘢就留俾隊友做。其實破壞第一傳所付出體力同堅毅精神係最多,因為做第一傳係有最多選擇,最多人幫,試諗吓如果第一傳俾人截到就可以直接或間接攻門。不過有球迷會講,雲迪碧克今場打防中喎,咁點樣破壞第一傳呀?破壞唔到第一傳咪喺中場擾亂對方節奏囉,般奴成日都返中場做依啲嘢啦。雖然般奴係攻中,但係就算係防守,佢都做更深層次嘅嘢。

三、比賽前準備同機會嘅把握。有部份球迷認為般奴同雲迪碧克嘅待遇差咁遠係因為前者加盟球隊正於用人之際,而後者加盟球隊時唔係蘇B最想要嘅球員,所以般奴咪有正選出場機會而雲迪碧克咪只係坐冷板凳囉。其實筆者初時都會咁諗,但係睇完近依兩場對羅馬同李斯特城再加上上季般奴處子戰對狼隊之後就慢慢調整自己想法。
般奴加盟曼聯時,球隊正面對種種問題,例如:普巴、連加特低迷表現、後防呈現不穩,仲有戰績不佳,球隊上下簡直係千倉百孔。而般奴處子戰嘅對手仲要係當時狀態甚佳嘅狼隊,我諗嗰時無人會對般奴會有好高期望,結果場比賽0:0打和,但係般奴喺依場表現非常突出,縱使佢係打防守中場。喺數據上般奴嗰場喺進攻方面起腳遠射有5次,3次命中龍門,觸球次數有成118次,88次成功傳波,而防守6次取回控球權,3次解圍2次攔截,同埋有一次關鍵戰術犯規而攞咗黃牌。嗰場般奴嘅表現已經掌控咗成隊曼聯節奏,無論進攻定防守。其實當時般奴並未係發揮到佢真正實力,因為明顯地佢同隊友默契仲未建立,仲有普巴同麥湯文尼都因傷未能參加比賽。而雲迪碧克對李斯特城亦都係打唔係佢最佳位置嘅防中,結果數據上0射門,41次成功傳波,3次取回控球權,2次攔截。整體上球隊掌控唔到成個中場,表現亦都有待改進。
可能有球迷會話咁樣搵般奴同雲迪碧克比較係無得比喎,咁亦都似乎對後者唔係咁公平,因為後者俾蘇B雪咗咁耐。無錯每個足球員都會有唔同風格,正路亦都好難比較,但係事實上現代足球觀好多時都會將新舊球員、球員嘅作用同身價作比較,就好似麥佳亞。有部份球迷會用里奧同麥佳作比較,而佢係8000萬鎊身價更成為佢被攻擊或取笑嘅話題,所以足球依家嘢邊度會可以完完全全以公平作準則。而最重要係球員能唔能夠把握日常操練同比賽機會去提升自己層次,我想依個會比較實際少少。


如果大家仍然未申請或想申請NowTV黎睇波,呢條連結有月費低至HK$268.00再有野送嘅計畫益大家:
➡➡bit.ly/RSNowTVSpecialOffer
============
RS一系列鎖匙扣已登場,除左有曼聯歷來最偉大領隊費Sir外,仲有伊巴同迪神添,想要?黎呢度啦: http://bit.ly/RSkeychain
============
IG: https://www.instagram.com/roycesports
Royce Sports 曼聯.費格遜 一站式為您提供所有關於曼聯嘅一切, 您諗到嘅都有! 您諗到但我哋無嘅, 話我哋知, 我哋將佢實體化!你仲唔快d like?
https://www.facebook.com/RoyceMU/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→