淺評歐洲超級盃(皇迷角度)

RM4Ever 於 16/08/2018 發表 收藏文章
(由於我都係半夜爬起身睇,下半場到加時都係中住中住黎睇,有誤還望大家指正)

Lopetegui第一場正式賽事就係硬仗,結果慘敗2:4,未能以好嘅開頭迎接新賽季。

馬會開局令皇馬失躁
同以往對有唔同,馬會開局高壓皇馬(無他,未開季球員體力充沛,而且爭勝心比以逸待勞嘅三屆歐聯冠軍皇馬高),皇馬唔多唔少受到牽制,失波唔少,而且有啲喺自己後半場失,一向穩陣嘅卡華積首當其衝。

未夠一分鐘失波
兩個中堅都搞唔惦哥斯達,連個龍都搞唔惦,三者都有責,但咁窄角度都入到,拿華斯真係幫唔落口。

題外話:有冇人掛住比比?佢對付哥斯達有一手。華拉尼早前亦提過自己較難應付嘅對手係盧卡古呢類強壯型中鋒,而哥斯達則係呢類嘅表表者。
皇馬傳送更快速及更具侵略性
施丹徽下嘅皇馬嘅傳送已經好流暢同直接,Lopetegui下嘅第一場(上半場)可以睇到:地波更快,進攻球員走動更多,球員上腳時間少左,多左one touch(可能因為對方緊逼),向前嘅短傳亦多左,變相增強侵略性。雖然對面緊逼,但皇馬都主導上半場。

進攻球員仍然自由
Lopetegui容許前場進攻球員自由走動,同施丹嗰陣一樣,巴利助攻嗰球出置右邊,另一次則喺左邊傳畀移入中路嘅阿辛斯奧;賓斯馬亦不時出現喺左路同馬些路做配合及接應後場嘅長傳。

但Lopetegui較保守,進攻時安排兩個防中並排負責傳送,施丹多數只係留一個,呢個可能係因為睇餸食飯:馬會鍾意打反擊。

下半場怪陣失主導
下半場初段睇到皇馬防守變陣為442,將伊斯高推前,上半場嘅動態消失左,加上對面新兵Lemar下半場發揮出色,皇馬被反客為主,要打防反。話雖如此,我地嘅賓斯馬同巴利都打得好,反擊嘅處理都唔輸蝕。如是者踢完90分鐘。

皇馬調動無效,後防不穩,哥斯達beast mode
皇馬三個調動都冇明顯效果,充其量係點對點換,而非戰述上,呢方面不禁令人懷念施丹,而換走卡斯米路甚至帶畀馬會自己禁區邊嘅空位,埋下失球嘅伏線。

5位後防球員防守都唔合格,馬些路後場失誤畀機會對方右閘出波,卡華積太易out beaten,雖然對住哥斯達,結果失第二球;拉莫斯危險地帶超短傳畀華拉尼,後者反應不及彈波落哥斯達腳下,助攻造就第三球世界波;馬些路回防慢,失第四球左邊完全冇人。第三、四球雖然對方射得靚同突然,但拿華斯亦太易失球,要話佢係世界級真係仲差啲。

總結:勝負本應50/50,皇馬後防倒自己米
整體皇馬製造嘅機會較多,同時造就對方嘅機會亦多,所以輸真係輸自己。

依呢場黎睇,Lopetegui帶領下嘅進攻不成問題,亦見唔到佢有注入新嘅思維,加上班底大部分一樣,所以未見到有適應或磨合嘅需要,但臨場調動及佈防則有待改善。

雖然係第一場,但呢隊係皇馬,加上賽事嘅重要性而且對方係同市宿敵,難免令我對新主帥減分。

利申:新領隊帶領西班牙嘅成績好好,但我唔係西班牙迷,之前冇留意佢。皇馬季前熱身賽我都冇睇,以上都係尋晚嗰場所觀察到嘅。

如果喜歡我們的文章,請即分享到︰

標籤: 皇馬  馬體會  歐洲超霸盃  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→