令人(我)又愛又恨的C朗

RM4Ever 於 11/07/2018 發表 收藏文章
銀河艦隊II號第2粒星
C朗09年以破當時轉會費紀錄盟皇馬,成為佩雷斯重獲主席後嘅第2粒星,此前我對佢嘅印象較負面:獨食、插水、曼聯。

林柏特排雲掌推冧C朗

當時嘅加盟意味住德高望眾嘅魯爾喺皇馬嘅日子接近尾聲,亦影響當時頭號射手希古恩嘅地位,對我黎講甚為苦澀,隊中嘅皇馬嘅象徽越黎越少。

話雖如此,C朗第一季就入33球,成隊中神射手,但皇馬當季聯賽第2,歐聯16強出局,國王盃32強出局,季尾比歷連尼被炒,摩佬接替。

不可動搖的球霸
C朗嘅第2季有魯爾離隊,前者轉著7號,掛正𣄃號話自己係隊中王牌,表現亦合符王牌之名:全季入53球,成聯賽神射手;各項賽事出場54次(同卡斯拿斯睇齊),正選51次(僅次於卡斯拿斯),出場4829分鐘(僅次於卡斯拿斯)。當時摩佬執教,但一向強硬嘅佢都唔敢郁C朗,及後兩季C朗都係出場、入球最多嘅球員,但C朗只贏得一次國王盃、西超盃、西甲、西甲神射手、歐聯神射手、一次金球獎*。

同樣期間,巴塞贏得一次歐聯、世冠盃、國王盃、西超盃、兩次西甲;美斯贏得兩次歐聯神射手、西甲神射手、金球獎,一次歐聯助攻王、西甲助攻王。

對我黎講代表啲咩?代表C朗只著重個人榮譽,佢嘅驚人數字只能帶領球隊贏得少量錦標。

*嗰次金球獎原本列貝利呼聲最高(帶領拜仁奪3冠),但有理論指喺投票階段,C朗喺世界盃外圍賽連入兩球帶領葡萄牙晉身決賽週而改變選情。

對弱隊刷數據、Penaldo
雖然之後兩年由風格溫和嘅安察洛堤接任,但C朗依舊自我:第1年西甲第3,歐聯奪冠,C朗均為神射手,仲贏得金球獎;第2年西甲第2,歐聯4強止步,但C朗又係兩項賽事神射手。

76第1年嘅成績(國王盃、歐聯)加上C朗奪金球獎,看似係C朗功勞,是實係點?國王盃只喺4強入兩球12碼,決賽都係巴利傳波畀3秒後嘅自己定勝;歐聯淘汰賽階段都只係入錦上添花嘅波。

(題外話,我好記得有場西甲76冇出C朗,嗰場皇馬嘅進攻流暢)

C朗的另一位伯樂
肥賓就費事嘥口水提,要講就講施丹。

施丹上任後起用輪換制,球王嘅魅力馴服左C朗,令佢願意減少西甲出場,變相獻出神射手寶座,令佢放眼於重要賽事,如歐聯、國家打吡、馬德里打吡等等。結果係點?施丹第1場國家打吡由C朗定勝,同年歐聯淘汰賽階段由C朗一個孭飛;施丹第2年西甲奪冠,C朗先入得25球,歐聯奪冠C朗對陣拜仁、馬會、祖記都入致勝入球。

點解會咁?因為施丹了解球員嘅體能極限,一季踢足真係好難,所以將C朗保質,必要時先出尚方寶劍,C朗嘅入球能力即使去到季尾都得以發揮,而重要賽事往往都係季尾舉行。

此外,施丹不斷喺媒體前滿足C朗嘅ego,令佢淘醉之餘,能力又得以發揮,呢段期間,球隊嘅成績幾乎同C朗掛鈎。大膽啲講句,C朗喺皇馬嘅日子裏,施丹係第1個識用佢嘅教練,令我對C朗之前嘅印象都改觀。

C朗=入球機器
我認識嘅C朗迷多數由曼聯時期開始鍾意,但係C朗黎左皇馬後,年齡嘅增長令佢嘅技術退化:有時好簡單嘅one-two都做唔到,之後仲要怪隊友;no-look pass呃唔到人;原地插花;倒掛踢空氣;單刀唔中龍;罰球省人場,仲有好多令人face-palm嘅畫面,佢一定唔係隊中最好技術嗰個。

但呢9年間,佢慢慢轉型,成為一個入球機器,轉型唔係話轉就轉,仲要有野心、自信先得,佢嘅野心係:入球。無論咩位佢都會起腳、乖巧走動擺脫對手、掂一掂就跌搏罰球/12碼、有時不滿隊友選擇自己射而唔交波畀佢,你贊唔贊同佢嘅舉止都好,佢嘅determination無庸置疑。而佢自信地向目標進發令佢一次又一次地破紀錄。

轉型亦係聰明嘅做法:了解環境(球隊有支援,如賓斯馬,奧斯爾)、自己體能(唔回防)。

反C朗嘅人只會話佢淨係識tap-in、12碼,當中牽涉嘅智慧、技巧、心理質素都被淡化。

榴蓮般的C朗
榴蓮要麽令人喜愛,要麽令人討厭。

有睇開皇馬/西甲嘅朋友會發現:C朗無論作客邊隊,一攞波就會畀人噓,係特別大聲嗰隻,係好神奇嘅現象。

佢嘅自信心、自戀、自我中心真係冇咩人拍得住,佢嘅自我膨脹同世人推崇嘅謙厚背道而馳,所以唔少人好憎佢,但我認為任何野達到極致,就會昇華成藝術,藝術一般只有少數人識欣賞,而歷史亦話畀我地知,好多名人都有啲世人不懂嘅性格。

但與此同時,佢嘅敬業樂業都係冇人拍得住

另外就係佢嘅leadership

新挑戰>>退休挖金
施丹34歲退休,恩尼斯達34歲轉戰日本,朗尼32歲去美職聯,C朗33歲去意甲班霸祖雲達斯,以退休之齡踏足另一足球大國,再一次證明佢嘅膽色同自信:祖雲達斯已經有希古恩、迪巴拿,根本唔洗擔心入球能力,C朗去到,一定唔係純粹為左幫球會,更多嘅係再一次挑戰自己,再破更多紀錄。作為皇迷一方面對佢嘅離開覺得可惜,但作為一般球迷另一方面卻充滿期待,究竟C朗可以去到幾盡?

後記
雖然標題係令我又愛又恨,但其實愛恨都談唔上,只係續漸對C朗改觀,完全佩服佢。老老實實,當C朗破左指環王魯爾嘅球會、歐聯入球紀錄嗰陣,係有啲bitter,但佢歐聯入球已經破百,反而想佢繼續。

如果喜歡我們的文章,請即分享到︰

標籤: C朗  皇馬  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→