【紅軍訪港】不能被DQ的四位新人

夏天，為大地帶來雨水。大家呢幾日感受到啦。

夏天嘅熱身賽，除咗俾一眾主將操弗個狀態之外，亦係一眾新仔表演身手嘅好機會。

今屆英超挑戰盃只容許球隊注冊廿五名球員，故利物浦未能一如以往般帶上太多新仔前來香港。縱然如此，大軍名單仍有四名年青球員，希望下面的短文介紹令大家對他們有更深的認識，喺比賽現場一直支持佢地！


文：利蜜棗

蘇蘭基（Dominic Solanke） #29

是屆U20世青盃金球獎得主，在整個賽事中攻入四球，令依位新人前鋒在未正式加盟前已得到一定關注。高挑的身形令佢背門能力比同齡對手優勝，但主帥高普睇中的應該係佢的策應能力。善於配合的佢自言可以打正前，亦可以「打後一格」或者邊路。靈活加上愛好逼搶的風格與不俗的腳下功夫，都係高普鐘愛的特點。隊中另一位年輕前鋒奧力基上季表現載浮載沉，蘇蘭基能否挑戰甚至超越其地位呢？

https://www.youtube.com/watch?v=DExjmgewKmc
阿歷山大（Trent Alexander-Arnold） #66

上季已得到不少上陣機會的阿歷山大•阿諾（下簡稱TAA），被受不少青訓教練同名宿的讚賞。中場出身的TAA充當右閘十分擅攻，良好的傳球同配合能力令佢喺頭兩場熱身賽均擔任正選與一隊球員夾波，新一季應能獲得更多的上陣機會。此子勝在比佳尼更傾向一對一引球突破，若能為球隊增添一門範數，或可挑戰佳尼正選之位？

https://www.youtube.com/watch?v=WRgPcaQqhVc
屈斌（Ben Woodburn） #58

大家或者對依位打破隊中最年青入球紀錄的翼鋒有點印象，但對高普而言並非印象咁簡單。上季只有十六歲的佢被高普賞識破格提升，全因其遠高於其年齡的悟性，對何時傳球何時突破已有十足把握。佢喺禁區內亦十分有自信，能輕鬆擺脫對手，亦可以冷靜埋門。下季他定必能在高普治下得到更多機會，就睇睇佢可否能在英超証明自己？

https://www.youtube.com/watch?v=ogpxLfGnwhc&t
簡德（Ryan Kent） #40

大家對此子的關注或者最低，但其侵略程度卻是四人中最高。擅打左翼的簡德踢法簡單直接，雙腳熟練愛好以技術同速度過人，但卻毫不貪功，喜歡走位配合和助攻多於射門。如此風格應得高普歡心，但礙於出場機會，球會好可能會再將佢外借英冠球會。今次的香港之旅，能否令高普跌破眼鏡留佢於隊中呢？

https://www.youtube.com/watch?v=vNlnSPbQ2HE
編按：今晚八點半，利物浦就會喺掃桿埔大球場踢水晶宮。想知入場有乜搞勁，記得喺茶水間𥄫住我地專頁，我地會喺未來幾粒鐘同大家滾動更新。呢度係廿五人名單，大家可以排住陣等放工。


無野我出返去做野先。今晚見！