【譯】高普:沙高十分標青 抵俾人讚

港紅講利 於 25/10/2015 發表 收藏文章
【譯】週中歐霸,利物浦對魯賓卡山。主場嘅球迷一路睇波,一路唱住沙高個名。佢完場時企喺中圈,向主場球迷敬禮講聲多謝。賽後高普表示不能同意更多,沙高的確「十分標青」。


新官上任,高普兩仗均任利迷嘅心頭好沙高正選。而佢嘅表現不禁令大家懷疑,點解佢季初時連後備都冇,包括聯賽首兩場對史篤城同般尼茅夫。

前任羅渣士講到話,沙高嘅狀態係一個問題。不過沙高愈戰愈勇,除咗歐霸作客瑞士,每場都係正選。呢邊廂高普就話,前事不計,佢好滿意佢抵步後見到嘅沙高。

「我好難講(點解佢季初冇正選),可能佢狀態唔好掛。但我明白點解球迷唱歌讚啊『小沙高』。因為佢好波囉。但係其他隊員都掂當,佢地有盡力踢,所以場波唔算太差。」


和咗兩場波,高普並冇淆底,被問到前路點行,佢話班波愈夾會愈熟,成績會更好。高普喺晏菲路首次登場後,點名讚幾個表現好嘅球員。

「拉蘭拿、米勞列、安尼簡,係啊,又係佢地三個。話時話,祖阿倫對上一場比賽係幾時?我唔清楚,但唔係張黃牌我地唔會換走佢。

「奧力治啦,後生細仔。佢好耐冇踢九十分鐘,今個星期就踢足兩場。

「兩閘都對板,全場奔走搏到盡。依家我地要專注訓練工作,咁戰績就會慢慢變好。」


「我會俾時間後生仔。」

暫時黎睇,史杜情況未明,但禮拜對修咸頓唔駛預佢。不過,高普仍然滿意手上副牌,當中賓迪基喺歐霸一役復出踢咗半粒鐘。

高普就繼續講:「足球有兩樣野最緊要:你點踢,同埋你班仔。

「有時你要有個前鋒、即係射手,處理埋門一腳。賓迪基同費明勞輕度復操幾日,禮拜四有預佢地。

「即係咁,如果美斯缺席巴塞一年,巴塞會點?阿古路缺席曼城一年,曼城會點?利雲度斯基……如此類推啦。」


「但係你依然可以擺靚個陣,增添勝算。我地依家有足夠嘅前鋒,你唔會聽到我喺到呻話『如果有史杜、如果有賓迪基就點點點……』我好滿意場上嘅球員。

「你地(記者)會問,我會唔會俾機會新仔。我會,我好樂意咁做。所以你地自己諗,你地想唔想幫我。

「呢場歐霸有好多野要執,不過都踢得唔差。我地有啲輕敵,諗住可以贏得輕鬆。但你見到對面唔係『依絲執』,食落係豬頭骨。我地了解多咗呢隊波,希望會有所進步。


「我知道依家嘅利記有啲艱難。」

高普話,佢知道丹尼恩斯同祖高美斯嘅十字韌帶受傷會帶俾佢一啲困難。

「份工係難架。但係如果怕難,我就會選擇放多陣假先。」

「當然我知道有好多問題,然後『小恩斯』同高美斯兩個傷咗。不過除此之外,個情況好清晰。我波齡有咁上下,明白要執好利物浦唔係易事,因為期望好高。

「我依家覺得,喺調整期望之後,利記可以重新出發。萬事起頭難,條路好長,不過我地會一步一步行落去。

「如果你要即食,你可以話『呢個唔得,果個唔得,咁樣贏唔到波』。只係放長黎睇,我地追求進步:俾起上禮拜六,今場歐霸表現好咗。我地就係要呢樣野。


新任高普認為球員喺關鍵時刻要保持冷靜,先可以贏到波。

「我地都知踢波唔係淨講天才。就算冇巴塞或者拜仁嘅球員,你都可以贏波。我地最想發揮每個球員嘅極致。

「呢場波我地有兩三個餐士,可以做得好啲,其他都可以接受。點知失咗一粒,情況有所改變。你可以話:『挑,有咗高普我地都唔係贏八比零』。但至少球員一直冇放棄,嘗試改變戰局。佢地事實上係未夠冷靜,呢樣嘢我地需要繼續學習。

「防守還好,有幾次發揮抵讚。球隊技術底子好好,進攻唔係完美,但經常有睇頭。」


講咗咁耐,高普嘅下場比賽會喺禮拜日香港時間十二點三,英超主場對修咸頓。

********************

譯:元朗謝四@文學部

原文:Klopp says Liverpool FC fans are right to endorse 'absolutely spectacular' Mamadou Sakho
by 利物浦回聲報 Echo

標籤: 沙高  高普  利物浦  利記  歐霸  

留言


請按此登錄後留言。未成為會員? 立即註冊
  • Tsui Sum 於 25/10/2015 評論 NO. 1

    多謝你翻譯,不過請問可否減少口語的成份,有時睇文會好辛苦

  • Jeffrey Chick 於 25/10/2015 評論 NO. 2

    a1

快捷鍵:←
快捷鍵:→