今晚，係「後謝拉特時代」嘅第一場打毗，本來應該係仇人相見，份外眼紅嘅。不過，今次卻有不少利迷抱住複雜嘅心情，又話「長痛短痛」咁，想向某某「忍著淚說Goodbye」。
我地兩位作者阿Joe神同阿Magellan又點睇呢？
＊＊＊＊＊＊＊＊＊＊＊＊＊＊＊＊＊＊＊＊
*J - Joe神 *M - Magellan
J： 喂呀Magellan，星期日場波係第225次馬西塞特郡打毗，點睇先？
M：唔好提啦，本來打算參加渣打銀行同球迷會合作個睇波活動，但天氣問題取消左呀。
J：都啱呀，風大雨大，唔好話交通唔方便，成身濕哂睇波都唔舒服呀。今次留係屋企，下次再一齊睇啦唯有。
M：我始終覺得成班人一齊睇先過癮呀，下次作客熱刺，一定去馬上報名先得。
J：講返場比賽先，睇返往績，我地過去三場作客葛迪遜球場都係打和哦，球隊呢排近況唔算太好，似乎和味都相當濃哦。
M：Joe，記錄係用黎打破既，我就睇好球隊可以揮底佢地，振下士氣啦。你諗下，打埋呢場波，之後就係國際賽期無咩壓力，球隊一定博盡去攻啦，係咪先。
進攻
圖：史杜列治上週對維拉梅開二度
M：講返場波，不如就從進攻方面講起先啦！淨係睇下岩岩復出既史度列治，就差啲忍吾住射左。星級球員即係星級球員，一出場比賽已有級數表現，復出第二場英超已梅開二度，尤其係第一球不停球窩利世界波，技驚四座，完全唔似一個養傷成年嘅球員，簡直就好似一直在隨隊比賽咁，真係令人呆鳥。順帶一提，加上對維拉射入嘅兩球之後，史杜列冶係紅軍英超史上入球率最高嘅球員（場均0.65球）。而且佢係現任球員之中，係馬西賽特郡打毗入球最多嘅，共入5球，堪稱愛華頓剋星！
M：提到進攻，當然唔可以唔提恩斯。佢本來一直活係賓廸基陰影之下，但佢並無因此放棄，反而憑住對比賽嘅熱情和投入，加上不惜氣力嘅跑動，已漸漸搏取到利迷嘅歡心和認同。好似佢不顧一切咁奔跑60碼回防截回史葛冼佳亞嘅一球，相信利迷都深受感動，覺得佢先配得起紅軍球衣。而且佢近三場入兩球，和一系列重要嘅進攻數據（場均0.4攔截、1.51關鍵傳送等），已成為利物浦嘅進攻核心。不過，更令利迷期待嘅，係佢同史杜列治好似「有路」。
M：自從SAS一「死」一傷之後，羅渣士嘅紅軍就好似江河日下，一蹶不振，亦證明左一對有默契嘅前鋒組合喺渣哥嘅進攻體系幾咁重要。雖然Ｄ＆Ｄ（2 Dannys）這對新組合只係夾左1.5場，但明顯睇到二人「眉來眼去」，好有火花，不惜氣力跑動和走位嘅恩斯，可能就係史杜列治爆發嘅最佳藥引！
J：你講得啱呀，有返健健康康既史度列治，球隊嘅進攻力點止強左一倍呀。唉，但我地真係好黑囉，史度復出，賓迪基又受傷，有無咁橋先。再講吖，我地兩大前鋒傷患史都算幾多，目前黎講要完全放心都幾難呀。
M：唔怕既，我地有班好中場頂住！好似米拿呢隻「大力金剛腿」咁，至今嘅表現可以話係「毫無破綻」，雖然係「悶到震」，但勝在體能足、態度好、經驗夠，打防中得（打雙防中，滿場飛），打中中得（上中下串連），打攻中亦得（對維拉即取得入球兼助攻），得左！預料佢同巴利、麥卡菲將有一番惡鬥。
M：由於宜家踢緊3-5-2，令「攻強於守」嘅莫連奴受惠，表現生猛，憑住速度同突破力，製造到唔少有威脅嘅傳送，不可忽視。
J：你講到米拿，我都無咩好評論，一個字講哂「實在太勁」。但至於摩蘭勞表現好，我就唔太同意啦，呢個哥仔，確係不負「小明」呢個外號，跑得非常之咁快。但係，佢個套西甲式眼神防守，係英超真係完全行唔通，對手點會理你有冇行住個位呀，有理無理斬左個入你禁區先啦，因為佢唔埋去逼，比左幾多次機會對手，大家都有眼見啦，一定要再進步先得呀。
M：另外，不得不提盧卡斯嘅復甦。自從軒達臣因傷疲勤，安尼簡踢防中又不理想之後，復任正選嘅盧神越踢越勇，雖然未回復最佳水平，但現在已經係球隊中嘅攔截王（18次），上場對維拉做出8次攔截更加值得勁讃！仲有，佢宜家不時都有交出一啲靚傳送，好似對諾域治個場，就交出一個劏開半場嘅靚直線俾史杜列治，做成單刀，運氣好啲已經係助攻啦！除左對個啲「為交叉而交叉」嘅小小人黎講之外，純防中盧神可以話係「無得輸」！
J：講到盧卡斯囉喎，係，無錯，最近幾場比賽，佢表現都算相當好，但根據慣例，通常佢有幾場好表現之後就會受傷，之後就會由祖亞倫頂上，之後當祖祖表現慢慢提升，佢又會再受傷，再由盧卡斯再復出再慢慢搵狀態，直到永遠，萬劫輪迴，唉...
J：睇返今季第一場，隊長軒達臣負責打防中位置，表演尚算可以接受，我以為呢招奇招可以打破兩個防中輪住受傷個宿命，哈，點知連軒達臣都骨裂傷出兩個月，我頂你個肺呀真係。
M：最後，當然唔可以漏左古天奴，佢雖然表現略有下滑，但依然係現時隊中有級數和威脅嘅球員，只要拖肥俾佢多少少空位，必定付上沉重代價。好似上場咁，即使要墮後一格和米拿互換位置，少做左「派牌」工作，依然交出兩個助攻！其中同史杜列治個球完美1-2，更加令利迷重溫到2013/14嘅舊夢遺漏不少…… 回憶。
防守
圖：3人後防老友鬼鬼
J：講起後防，表現其實仲有提升空間。但變陣做3-5-2之後，安利簡就由中場變成打右中堅位，我就覺得認真唔穩陣啦，因為佢雖然係有後防萬金油之稱，但好明顯無作為中堅果種意識，比如清波唔諗方向而清去禁區頂，係禁區標波無同其他中堅夾位置，呢類行為都顯示出，佢唔係太適合留係最後一點做防守。
J：但當然，我都同意呢位德國球員衝擊力真係好強，係球隊前景一片光明。但目前黎講，佢最需要找到屬於自己既最佳位置先，我就覺得防守中場最岩佢啦，你睇真小小，佢再曬黑下，係咪成個耶耶托尼一樣先。
M：無計啦，安尼簡始終唔係中堅出身，所以係防守意識上往往都有啲腦筋錯誤。長遠黎講，應該都係用返路夫雲 -- 如果佢仲「健在」，又或者用高美斯，可能更令人期待。
M：講開中堅，沙高無疑係現時紅軍最當fit嘅。雖然偶有失誤，但整體表現都算有說服力，現時為止佢有近七成攔截率，傳送成功率更係全隊最高，達到91%，十分不俗。
J：講到沙高，就真係不得不讚，有佢出場，個心情都相對穩陣左呀！講實力佢絕對不容置疑，只不過岩岩打返正選，體能未去返最佳狀態，輸左個球飛頂，唔可以怪哂佢既。
M：另外，史卡度亦一如上季表現，雖然未屬頂級，但都算穩健，上陣七場至今都無防守失誤，紅軍嘅失球係多，不過大都唔關佢事。但防守死球真係要少啲掹衫，尤其係對住高大凶猛嘅勞卡古將會係一大考驗……。
M：講到後防，又點少得佳尼？呢個堪稱紅軍今季嘅最佳收購，即使未達至係修咸頓嘅水平，依然係利物浦後防嘅最佳，無論係踢純後衛或翼衛，佢都勝任有餘，睇黎愛華頓要破佢都幾難。信心之選。
J：至於龍門位置，我就真係會怪責教練有問題，明明話要對米勞列施加返大小小壓力，我唔敢講保丹唔係好球員，但係話一個英冠球員初來報到，就會比到好大壓力超聯正選門將，講你都唔信啦係咪先。至於米勞列本身應付兩邊高空波唔太好，同埋打手錘成日歪炮，我都費事再提，唉。
M：唉……。
教練
J：戰術黎講呢，我認為係隊長軒達臣未復出之前，我地變返做菱型中場既本錢唔夠，球隊現階段維持3-5-2 陣式，其實係比較實際既，而且左後衛問題仲未解決到，3-5-2陣式將摩蘭勞推前小小，都係屬於袋住先方案啦。
M：無疑3-5-2係宜家陣容發揮得最好嘅陣容，去季尾甚至曾經製造過一段「小陽春」，但同時間亦帶來兩場嘅慘敗，說明左呢個陣嘅漏洞。由於對翼衛嘅強大要求，又上又落，造成中場空位較多，加上對傳送嘅默契、速度要求甚高，令中場壓得較前，所以只要傳送產生失誤，就往往會發生回防吾切，俾人打反擊嘅情況。面對住反擊能力甚強嘅愛華頓同步大力雄嘅盧卡古，都咪話唔驚……。
J：講到教練，近來好多巴打都話想趕走羅渣士，換做高普咁話哦。我個人呢，對於羅渣士其實相對中立，而且有小小當局者迷，佢做既野，到底係好定唔好，我一時三刻真係判斷唔到。
J：但係如果講到高普一定叻仔過羅渣士，我就有小小懷疑啦。係，佢係曾經壓過拜仁贏德甲，但個時佢手頭上揸住葛斯、萊斯、利雲度斯基哦，到後來得返萊斯，咪又係搞到要護級。當然，我咁樣評論高普比較片面，或者係因為我比較喜歡安察洛堤。喂，100分破紀錄贏英超呀，就早兩年之嗎。
M：駛左咁多錢，換左咁多人，用左咁多時間，依然「攻不強，守不穩」，似爭歐霸多過似爭歐聯，利迷大都已經忍無可忍。以現在嘅情況黎講，恐怕邊個幫渣哥講好說話都難免被鞭，所謂「老味廚房，燒佢先講」，都係「葡提老祖」好啲。
M：我唔敢認自己係理性球迷，尤其係輸波嗰陣……，但絕唔會願意犧牲利物浦嘅勝利去換任何嘢。我只相信「結果比道理更重要」，「勝者為王」，只要邊個帶俾利物浦勝利，我就信邊個，懶理佢姓羅、姓安定姓高！
對手
圖：盧卡古上場二射一傳
J：好嘞，係時候講返今場嘅對手。愛華頓近況就真係幾好呀，4勝2和，仲3球打爆埋車路士，而且睇佢地防反打法相當簡潔而有效率，再加上盧卡古同巴克利今季表演回勇，我地後防真係要打醒十分精神呀！
J：不過佢地都並唔係無弱點，睇翻佢地打聯賽杯對英甲班士利都失左3球，佢地一班主打後生仔防綫，又真係唔係太穩陣架咋。總括黎講，我估計場波都係1比1至2比2之間，和氣收場囉。
M：和都係正常賽果，甚至對羅渣士黎講已經算好，因為正如你所講，近況確係拖肥較好。但係馬西塞特郡打毗向來都未必同狀態掛鉤，球隊表現往往打高一班，雖然自從近四季再無紅牌，但戰情依然緊湊，結果難以預測。
M：另一方面，愛華頓嘅攻力其實頗為不穩，過去六場雖有三場入三球，但也有三場零入球，而且球隊自今年四月以黎從未試過英超兩連勝，盧卡古係今年嘅主場更只入過一球12碼，所以並非想像中咁強勁。就算係剛以2比3勝西布朗嘅賽事，原來已經係拖肥近21年以黎第一次落後兩球之下，成功反勝嘅賽事，可能只係曇花一現。
M：相反，利物浦自2010年10月之後，作客葛廸遜公園未嘗一敗，對上9次打毗，拖肥亦未嘗一勝，加上剋星史杜列治及時而出，相信關鍵都係睇紅軍自己嘅把握力同防守表現，只要運氣好少少，即時重登英超前五位！
Joe神／Magellan＠文學部
請按此登錄後留言。未成為會員? 立即註冊