許多人認為，謝拉特於零五那一夜居功至偉。
其他人認為，那是杜迪克的神奇演出，或是加歷查在伊斯坦堡拒絕倒下的堅韌意志。
但右閘芬倫認為，他才是扭轉決賽局勢的重要功臣。
「我成日都話我改變咗果晚場比賽。」芬倫對回聲報如是說。
「如果我冇傷出，我地就贏唔到歐聯。」
「我嘅受傷係利物浦遇到過最好嘅事。」
芬倫相簿：
http://www.liverpoolecho.co.uk/sport/football/football-news/gallery/steve-finnan-liverpool-fc-9296679
芬倫於上半場中段拉傷大腿，見證米蘭領先三球。
儘管這位愛爾蘭國腳依然希望完成比賽，但軍醫半場於更衣室告知領隊賓尼迪斯，情況並不許可。
賓尼迪斯本打算換出查奧爾，後來改為換出芬倫，換入夏文，踢三中堅。
「我唔想出，但我知我唔得。」
「我知道個決定係岩，但果時我有唔開心。我換出之後，肥賓改變咗踢法，而夏文叔對於追得返三球好重要。」
「我錯過咗三個入波，但我知道發生啲乜──因為啲聲。」
下半場早段，芬倫仍在更衣室接受治療。
雖然沒有電視直播，但他從場內傳來的聲音，知道有事即將發生。
他回憶說：「我隻腳被人醫緊所以三個入波都睇唔到。」
「但我知道發生緊啲乜。我聽啲聲就知，太嘈喇，一定係我地入波。」
「好似發夢咁，我出返去睇波時已經係三比三。」
「我個感情都幾複雜。歐聯決賽傷出，我好揼心口，但同時追得返，我又好開心。半場時仲怕輸到五、六球。」
「杜迪克撲完最尾個十二碼，我地癲晒。」
「決賽前嘅歐聯比賽，我一直都有踢。然後同利記贏埋，係我踢波咁耐以黎嘅高峰。」
「而且仲要對住Ａ米呢啲強隊，追返三球。」
「十年黎，我都冇再睇過咁嘅比賽，可能以後都冇。」
「踢過利記，我覺得好榮幸。我好好彩。」
對於芬倫以及他的職業生涯而言，捧起歐聯獎盃可謂終極美夢：十年前，他還於非聯賽球隊效力。
「當我十幾歲被水晶宮同溫布頓放棄時，我諗我個踢波生涯玩完架喇。」
「我去咗踢地區聯賽嘅威靈，然後簽咗伯明翰，踢返上去。」
「同好多人唔同，我二十七歲時先去踢利物浦。」
現於倫敦從事地產業的芬倫，零三年以三百五十萬鎊從富咸加盟，五年上陣二百一十七場。
伊斯坦堡後的十二個月，他再次見證另一場世紀決賽，最終為利物浦奪得足總盃。
「踢過利記，我覺得好榮幸。」
「我好好彩。果段時間好岩，我地拎咗歐聯同足總盃。可惜利記近年就冇咁嘅福份。」
「我踢果時班波好正，只係果時唔會特別覺得。」
「踢利物浦有利物浦嘅壓力，人地望你每年都贏聯賽。但係睇返轉頭，個時間係岩嘅。」
「依家我享受緊足球以外嘅生活，從來都冇諗過教波或者講波。」
「但波照樣會睇。利記冇食住舊年個勢上好可惜。冇咗蘇亞雷斯，史杜列治又傷左，對佢地打擊好大。」
隨著謝拉特加盟洛杉磯銀河，芬倫也知道隊長留下了什麼。
他補充：「同謝仔踢過波，係威水嘅。」
「你會諗到佢受到嘅壓力同監視，佢好似成世活係個波波入面。」
「一齊踢過波入面，佢係我見過最好波嘅人。利物浦偉大嘅球員。」
「佢都係好犀利嘅隊長，經常都會以身作則。我要同佢致敬。」
「佢會被好多人掛死。不過去到美國，佢應該有段新經歷，可以冇乜壓力咁享受下踢波。」
譯：元朗焦拉特＠球迷會文學部
自：利物浦回聲報的獨家訪問
Exclusive: Steve Finnan - I'm the real hero of Liverpool's 2005 Champions League win in Istanbul
http://www.liverpoolecho.co.uk/sport/exclusive-steve-finnan---im-9326837
請按此登錄後留言。未成為會員? 立即註冊