【曼聯Talk】轉會Talk:費蘭尼免費轉會阿仙奴!?

曼聯Talk 於 05/06/2018 發表 收藏文章
【曼聯Talk】轉會Talk:費蘭尼免費轉會阿仙奴!?


據報導指今夏滿約嘅費蘭尼仍未與曼聯續約,先前已2次拒絕新合約。

由季中傳會離隊,到摩連奴話好希望爆炸頭留隊,去到呢一刻仍未續約,我諗爆炸頭留隊機會真係好微,但下一東家會係邊隊呢?繼傳過AC米蘭、巴黎聖日門後,今次傳到阿仙奴。

先唔講爆炸頭去阿仙奴啱唔啱踢,因為佢嘅風格好明顯同阿仙奴平時嘅小組傳抵踢法唔同,但爆炸頭喺曼聯都經常作為Plan B球員上陣,係「變」嘅重要元素,但離開曼聯,去到阿仙奴又做Plan B就有點難理解⋯⋯除非艾馬利會放棄夏卡/艾蘭尼啦,不過論硬淨程度爆炸頭有優勢嘅。

免費加盟應該會有返份人工唔錯嘅合約,連傾緊續約嘅藍斯都係講緊11萬鎊,費蘭尼傾到10-13萬鎊算唔錯了。

講返曼聯方面,費蘭尼去到球季下半段除左有受傷,亦隱約感覺佢比之前無咁受重用,唯入阿仙奴波(2:1)之後親吻隊徽,又係好觸動我,好多球迷都想見到佢留低,欣賞佢嘅貢獻。雖說唔係必然正選,但我認為爆炸頭喺球隊嘅處境已經好過部分隊友如馬達,逢親大戰都唔會出咁滯,每季印佢件波衫都要驚佢被賣走⋯⋯至於爆炸頭?摩連奴講到明鍾意你,好想留你。唔知係咪隨著自己長大,慢慢覺得30歲都唔係好大姐,效力一隊多戰線嘅球隊,點非主力(達米安同梳爾就擺到明唔用)都可以一季有約30次上陣,其實唔算少噃。


時間唔會等人,唔夠兩個禮拜世界盃開鑼,亦會係唔少球會揀人嘅時機,加上英超會提早截轉會窗(有出無入),球會一定會提前組軍:

我暫當已經傳到90%嘅費特係黎頂卡域克、同靴里拉爭位,如果費蘭尼確認離隊,隨時簽多一個,不過名氣就可能較小(除非再有人離隊⋯⋯),所以,如果比利時喺世界盃行到好遠,曼聯真係未必等得切⋯⋯



紅魔仔

來源:
https://www.telegraph.co.uk/football/2018/06/04/arsenal-shock-marouane-fellaini-move-free-transfer-talks-due/
標籤: 費蘭尼  曼聯  阿仙奴  

留言


請按此登錄後留言。未成為會員? 立即註冊
    快捷鍵:←
    快捷鍵:→