尋找他鄉的故事 --- 西班牙球員在英超 (上) 精選 推薦

離鄉背井到外國生活不是一件易事 , 相信曾到外國留學或工作的你絕對能身同感受 , 但為了理想為了將來為了妻兒 , 多苦的路還是有人願意一走 , 本系列將會回顧西班牙球員在英超的發展史。
10年前 2005/06球季 西班牙球員在英超的人數--- 15人 外援人數量在英超排第六位。

10年後 2015/16球季 西班牙球員在英超的人數--- 34人 外援人數量在英超排第二位。 懂次於第一位的法國外援36人。

開荒牛闖英超 --- Albert Ferrer :


他絕對是西班牙球員到英超發展的開荒牛 , 第一個從西甲加盟英超的西班牙球員。


他8歲便加盟西甲巴塞當學徙 , 後來成為球隊的右後衛主力, 共為巴塞出場超過200場 , 曾和領隊告魯夫共事 , 球員羅馬里奧 , 高文等成為隊友 , 他更成為西班牙國家隊國腳 , 有36場為國出戰的紀錄。


是什麼原因令他毅然離開豪門巴塞而出國發展的呢 ?

"有次領隊(雲高爾)叫左我 , De la Pena 同 Pizzi入房傾一傾計 , 坐底無耐他就開門見山 , 希望球隊能有一些變化 , 他將會簽幾位新球員 ..... 他覺得我地唔係他計劃中 , 可以聯絡其他球隊離開 。"
"大佬啊 , 你知唔知個時我幾灰 ? 你知唔知我係巴塞幾耐 ? 為球隊贏過幾多錦標。你知唔知我好想係巴塞終老 ?"

人就係咁 , 就好似拍拖 , 舊的唔去新的唔黎 , 新的可能比舊的好 , 唔好嘗試一定無人知。

"件事無耐後Vialli搵左我 , 他想我加盟(車路士) , 個時我地西班牙球員認為西甲就係世界最好的聯賽 , 可以係最好聯賽效力,而且是係自己家鄉 , 邊個仲想離鄉背井到其他聯賽呢 ? 所以我同屋企人乃至朋友講我想到英格蘭他們都好疑惑我的決定。"


"我無考慮太耐 , 點講車路士係歐洲都算係一支強隊 (那時車路士剛拿下歐洲足協杯冠軍) , 隊中有唔少世界級球員 , 另外一樣野係Poyet係呢度 , 他係呢度發展得好開心也很順利 (Guy Poyet在加盟車路士前曾在西甲效力7年之久。)


最終他於1998年以220萬鎊轉會英超車路士 。那一年他28歲 , 身穿17號球衣。

"我英文唔係太好 , 而他同我一樣識西班牙文 , 初黎報道時Poyet幫助我好多。 "

"我估我係唯一一個 (西班牙球員在英超) , 因我係呢度搵唔到其他西班牙球員 , 老實講黎到英格蘭我都幾享受的 , 行到街一條友都無人認得我 , 壓力細左 , 係西班牙 , 你每季代表巴塞 , 爭取聯賽冠軍同歐聯冠軍 , 如果拿不到, 你個季成績可以講係"肥佬"左 . 係巴塞就算你輸一場波影響都可以好大。 因為知名道高 , 輸左波你真係無面見人"
"但唔代表英超比西甲易踢 , 係西甲成場波都起碼有5至10分鐘比你回下氣 , 但係英超唔同 , 成場波節奏快好多 , 體力的應付和身體的對抗比起西甲大好多 , 真係踢足90分鐘無停 。


"轉頭想想 , 黎到英超我都進步左 , 因為球賽節奏好快 , 你要係好短的時間下判斷決定。 "

"英倫生活其實唔錯 , 得閒時可以同屋企人或隊友去睇下歌劇 , 感受下唔同文化。

Ferrer共在車路士5個球季 , 出場76場。 第一球季他算是主力 , 但第二季他因傷,加上新加盟的荷蘭後衛Melchiot力爭同位置後 , 他漸成後備 , 但5季間也曾幫助拿下99/00賽季英格蘭足總杯冠軍 (因傷缺席決賽)和擊敗球隊擊敗皇馬拿下一次歐洲超級杯。
他離開車路士不久便掛靴 , 傷病令他提前作出這決定。


在他離開後 , 他曾經從事商人 , 但最終工作還是離不開足球 , 夢想執教英格蘭和西班牙球隊的他 , 現在他為西乙馬洛卡的領隊。

掛靴後的Ferrer仍然關心車路士和巴塞隆拿 , 也希望回到巴塞工作 , 他曾為電視台分析評論巴塞決戰車路士歐冠決賽。


你可能會好奇第二個加盟英超的西班牙球員是誰 , 答案是他 --- 紐卡素的Elena Marcelino , 1999年從西甲馬洛卡加盟的中堅 , 當時剛為新晉國腳的他轉會費高達550萬 , 但他的表現無疑是球隊史上的一大水貨。 而紐卡素和西班牙球員確是有緣無份 , 05年加盟的Luque和08年加盟的Xisco同樣表現糟糕。前者出場21場攻入1球 , 後者只出場9場攻入1球。

而第二位加盟車路士的西班牙球員是進攻中場Enrique de Lucas , 他一樣為巴塞青訓 , 但從未為巴塞效力 , 相反他加盟了愛斯賓奴 , 他於02/03球季從西甲愛斯賓奴加盟 , 但只踢了一季便重返西班牙 , 35歲掛靴 , 但於今年他復出 , 重返英格蘭加盟業餘球隊Biggleswade United效力。



狂牛闖英超 --- Ivan Campo

時間一下子從1998年轉到2002/03賽季 , 那一年有數位西甲球員加盟英超 , 門將Ricardo加盟了曼聯 , 配上1月冬季窗的皇馬青訓左後衛Raul Bravo租借加盟列斯聯 , 傳奇射手Salva Ballesta租借加盟保頓 , 配上車路士Lucas和Albert Ferrer , 西班牙球員在英超的人數升了數倍。


雖然人數上升 , 但那一季最成功的無疑是加盟保頓的狂牛Ivan Campo 。

和一開始介紹的Ferrer一樣 , 同樣28歲來到英超 , 而Campo來自西甲的另一支強隊---皇馬 , 但他在皇馬的日子只是邊緣球員 , 2002年他被皇馬租借至英超保頓。 從一支西甲豪門"降級"一支英超護級球隊(當年其實很轟動,但一年後更轟動) , 相信只有Campo知道當中原因

"好多人以為我係黎英超渡假 , 其實唔係。"

"皇馬可能係世界上最好的球隊 , 但作為足球員係一間球會唔開心有咩用 ? 我踢波係因為足球帶比我快樂 , 做人最緊要開心 。

"保頓隊中有不少出色球員如Djorkaeff , Bobic , N'Gotty 加上球隊主席和球迷支持 , 我相信球隊能在英超取得突破。"
那一季除了他外 , 還有從PSG自由身加盟的JAY JAY Okocha 配合原有陣容加上BIG SAM的指揮 , 保頓再次驚險護級成功。

那一季他的表現 , 成為英超史上最佳的租借轉會之一 , 前皇馬中堅在BIG SAM的改造下成為了球隊的防守中場 , 他首3場英超賽事便要迎戰曼聯 , 利物浦和阿仙奴 , 在曼聯的比賽中首秀出場1分鐘,那場比賽保頓爆冷1:0作客戰勝曼聯 ; 在利物浦的比賽中他射入1球 , 而在阿仙奴的比賽中他兩黃一紅 , 第1次英超紅牌離場。


那一季後他租約滿 , 正當世人認為他會重返西甲加盟強隊後 , 他卻從"渡假"更改選擇為到英格蘭"長住" , 他出乎意料的和保頓簽約3年。

在英超他不寂寞 , 他有Geremi和McManaman這些前皇馬隊友 , 而McManaman正正便是引荐Campo到英超發展的人。

"我之前從未離開過西班牙 , 馬仔幫左我好多忙 , 他介紹我保頓係一支有野心的球隊 , 不只是只滿足於護級 , 他也很幫助我適應英格蘭的生活 , 幫我手搵屋等。"

"英格蘭人同西班牙人唔同有好多 , 佢地鐘意飲茶鐘意飲咖啡 , 呢兩樣野充滿在他們生活中 。另外他們好早食飯同埋揸車習慣都好唔同 , 店舖也好早就關門"

"天氣凍所以D人一般著好多衣服 ; 英格蘭的天氣對我黎講最意料不到的 , 同西班牙相差好大好大。"
雖然在他之前 , 沒有太多西班牙球員加盟英格蘭聯賽 , 但對於Campo而言 , 英格蘭聯賽絕不陌生。

"我細細個就係電視睇英國波 , 佢地的踢波風格乃至佢地球迷對球隊的支持也是我很難忘的"

談到在皇馬和保頓 , 乃至西班牙足球和英格蘭足球的分別 , Campo有以下見解

"點講都係大球會 , 氣氛唔同好多 , 一般皇馬大戰前夕 , 由其作客 , 我地只能留守在酒店備戰 , 老婆仔女都唔見得 。呢D氣氛令你有唔少壓迫 , 加上你係皇馬 , 係皇馬踢波 , 唔輸得的 , 一輸就好大獲 , 壓迫力更大。"

"我係皇馬的頭兩季都幾好 , 有唔少比賽機會 , 但當你身邊隊友慢慢變為 Figo , Carlos同Zidane等 , 你只能更努力去追近同他們的距離 , 但慢慢你會發現點努力 , 球迷同領隊的目光只會在他們身上 , 你只能從他們身上爭到少少出場時間。"

"我係保頓找到了以往對足球的喜悅 , 最重要的是有出場機會 , 唔洗只坐係度睇人踢波"

"係英格蘭 , 對比西班牙的訓練時間一般比較遲 , 中午Lunch的時間同休息時間都比較長 ,

"係比賽中 , 我以前踢中堅唔會跑動太多 , 但而家變左中場球員跑動範圍大好多 , 係西班牙 , 球隊總係希望Keep住個波進行組織 , 進行進攻 , 球員同球員間有更多的傳波配合。 但係英超呢度唔同 , 球隊總是以長傳為主 , 你更多時間是頭球爭搶同球員間身體對抗 , 球隊同球隊的對抗更多係空中 。我細個已知英格蘭足球就係咁,所以黎之前我已有心理準備"

"有時我會同BIG SAM講 , 球隊試下更多短傳組織進攻 , 為球隊注入更多足球元素 , 球隊其實有唔少球員好似Djorkaeff 同Jay Jay , 他地都係組織進攻 , 帶波的高手 ......"


Big Sam帶領保頓初期 , 死球和角球是球隊進攻上的支柱 , 大部分入波也是靠這兩樣板斧。 不管Campo的意見有沒有比Big Sam接受 , 但Campo加盟後的保頓的成績確是愈來愈好。 一下子從護級球隊成為英超中游球隊 , 04/05球隊打入聯賽杯決賽 , 最終不敵米杜士堡 ; 而聯賽方面他們最終搶下第6位置 , 球隊史上第一次得到參加歐洲杯賽的機會。


Campo加盟的成功 , 也促使球隊之後租借兩大西班牙射手Salva Ballesta和Javi Moreno , 當然不得不提自由身加盟的前皇馬隊長Hierro , 這次是Campo的引荐 , 他在04/05球季加盟保頓一季後便挂靴。


2008年他不獲保頓續約 , 自由身離開球隊 , 那一年他和Nolan , Speed , Giannakopoulos , Diouf一同被新領隊Megson送走 , 配上之前離開的Big Sam , 保頓的黃金年代正式終結 ......
(建議CLICK入去睇)

掛靴後的Campo仍然關心保頓 , 在離隊後數年後寫了一封信給保頓球迷。真情剖白保頓數年情和當年離隊真相。 而在Coyle被保頓解約後 , 他也表白希望執教保頓一職。

Campo的加盟英超 , 令英超球隊明白在西甲球員技術含量極高 , 試問一個後備中堅也能成為英超出色防中 , 難不成買個中場也能當前鋒 ?
下一集我們將會講解西班牙球員加盟英超的第二浪潮和帶起這浪潮的人。




***未試過搵料寫文搵得咁辛苦 , 很多資料來源也是十幾年前 , 寫了一星期 , 希望你喜歡 !


請支持香港出品的原創足球文章
https://www.facebook.com/ramsdiscusshk