英超講場 特別篇 -- 『轉會中途站，BIG 6轉會操作一覽（中）』 精選

轉會窗打開左一段時間，而各大球會都有所行動，更有球隊係時間準備熱身賽，轉會動作無大半都有五成。但有時各大媒體嘅傳媒報道多到令人眼花，繼上次同大家報導左幾單較重鎊嘅轉會後，今次同大家簡單總結下 BIG6 呢一個轉會窗暫時所買入嘅球員，同埋主要潛在交易對象，同大家搞翻清楚球員岀入情況，一齊睇下你支愛隊做左幾多功課，先同大家睇阿仙奴同曼聯。(以下轉會費皆參考自transfermarkt.com)
阿仙奴:
1.以5200萬歐元由曼城引入耶蘇。
2.以3500萬歐元由波圖引入法比奧韋拉。
3.以640萬歐元由新英倫革命引入守門員Turner。
4.以350萬歐元由聖保羅引入馬昆奴斯。

轉岀方面就有已經離開左好耐嘅根度斯正式轉會馬賽，令阿仙奴收翻1100萬歐元。另外拿卡錫迪就以自由身離開球會，轉至里昴。今季暫時呢刻嚟計可以見到佢地嘅野心，針對性係前鋒買入係英超已有成績嘅耶蘇，阿迪達同佢係呢支球會再次重新合作，係哥帥已調教一排下，相信未來阿迪達想要佢點係控球戰術下幫手都得。中場嘅韋拉補強為阿仙奴中線上帶嚟更彈性嘅變化，夠哂攻中同防中，因應對手調整依家絕對足夠領隊發揮創意。
潛在轉會方面，一定就有列斯聯嘅拉芬拿，之前我亦同大家提過阿仙奴其實報過價，但就未到對方心水價位。而最大阻礙係球員又對巴塞有情義結，拖拖下機會好似慢慢變細。而之前嘅一號門將利奴就坐左大半季後備，若果留低可能就要坐多一排都未必有曙光，所以就傳出佢走去森林嘅傳聞，確實以佢表現同水準絕對有條件他投尋求正選位置。總結暫時兵工廠實力有增無減，若果係淨低時間簽多個邊線進攻點，會對球會來季爭四更有保證，特別BIG6暫時有曼聯同車仔係轉會窗交易未如理想。

曼聯:
1.以1500萬歐元由飛燕諾引入馬拉西亞。
暫時轉入就真係只得一單交易，我地唯有轉嚟睇睇離隊球員。今季曼聯嘅離隊球員主要以自由身離開，基本上無為球隊帶嚟任何收益。首先就有同球會球迷鬧到好肉酸嘅普巴，又以自由身翻翻祖記，當然佢有為曼聯交過靚助攻靚入波，但以佢嘅身價同場內外整體表現真係唔太對板，更未計更衣室氣氛等附帶影響，令到普巴嘅離開反而可能對一啲球迷嚟講係鬆一口氣。除左普巴，就仲有連加特，相信好快就會有人接貨，特別係之前用過佢嘅韋斯咸。至於相對有正面評價嘅就有馬迪，馬達，同卡雲尼嘅離隊。但就咁一數，曼聯兵源一下子薄左唔少，簽就簽得一位球員，走就走左幾粒星，熱身賽又就快開始，唔通成個轉會窗時間真係用哂嚟傾迪莊？希望紅魔鬼7月可以俾翻啲好消息魔鬼信徒等大家月尾抗議可以唔洗叫得咁大聲。