英超講場 第二十期週報 -- 『熱刺課金留干地，韋拉惱羞成怒造手尾』 精選

一下子就踢左三十八輪，又完成一季。每一季完結一刻相信對每位唔同球迷都建立左一份好寶貴嘅回憶，你鐘意個隊可能幾經辛苦終於上岸，佢鐘意個隊可能表現浮浮沉沉但最尾成功有好嘅名次，但無可否認，呢季英超又係精彩嘅一季，至少去到最後一輪，若果你要緊貼冠軍，歐冠席位，歐霸席位同護級區最後結果，你一共要睇8場波先得，可想而知呢季緊湊嘅程度，先要恭喜曼城戰至最後奪冠，亦要感謝利物浦同其他球會相互競爭下，創造左呢季英超。不過有完季就有開季，新聞都繼續有。
TA: 熱刺獲ENIC注資1.5億英鎊
熱刺主要持份者ENIC sports係干地今季成功帶領熱刺重返歐冠舞台後注資1.5億英鎊入球會，有指係用以嚟緊轉會窗用。主席列維講到呢次嘅注資係非常關鍵性，呢筆資金可以俾到球會係嚟緊咁重要嘅時間運用到並實現到野心，幫助球會係歐洲賽場上提升到競爭力。而呢筆注資嘅時間性實在就令人不得不聯想到干地嘅去留，係季尾期間，干地雖然一直帶領熱刺領到唔錯成績，但過程中不乏一啲佢會離隊過檔嘅傳聞，再加上佢係早期係賽後訪問多次表現熱刺實力同佢幻想有一定距離下，熱刺管理層或多或少都會驚住佢下季走左人，所以呢筆資金或者係一份誠意金去吸引干地留隊繼續教甚或續約。
阿迪達: 借岀沙利巴為正確決定，但依家佢需要翻嚟
阿仙奴今季最終係尾段甩轆，連環輸分再失六分波下無緣歐冠，而當中球隊嘅防守上亦係問題其中一環。領隊阿迪達接受訪問時表示，沙利巴需要返回阿仙奴。沙利巴係今季被阿仙奴借左岀去馬賽賺比賽經驗，佢亦係效力馬賽期間成功同球會爭取到歐冠席位，球員係另外訪問當中就表示想繼續留效馬賽，間接表示無意回歸咁話。但阿迪達就係其他訪問中表示沙利巴已擁有幫阿仙奴戰鬥嘅實力同經驗，若果當初唔借佢岀去，佢今日就只有更少嘅比賽時間，成長空間有限，強調借佢岀去係正確決定。咁睇嚟以阿迪達口吻，球會會收翻佢翻嚟作中堅人選上下季嘅主要戰力，留翻錢去買其他位置。
韋拉惱羞成怒踢人或有手尾跟
係水晶宮對愛華頓賽後，韋拉忍受唔住愛華頓球迷近距離挑釁，對對方郁手令對方受教訓下訓係地下。事後當然就眾說紛紜，有啲就認為個位拖肔球迷就自討苦吃，近距離咁向韋拉連番挑釁，同申請被打無分別，加上水晶宮係領先2球下輸波而回，作為教頭當刻一定係有道氣頂住頂住，就算慶祝上岸都唔係咁玩。但不論咩原因都好，郁左手就係錯，有指警方已戒入呢次事件，韋拉係面臨英足總處分嘅可能性同時，刑事責任或者會隨之而來。