英超講場 第九期週報（上） -- 『足球界同受俄烏局勢影響，艾巴或成談判專家。』 精選

英超講場 第九期週報（上） -- 『足球界同受俄烏局勢影響，艾巴或成談判專家。』
FIFA / UEFA 禁俄羅斯國家隊/球會參與賽事
俄烏局勢未見好轉，在各國決定採取各方面制裁措施後，足球界並未有存於平行時空，亦有相關措施制裁俄羅斯。原本FIFA就係27號宣佈俄羅斯只可以俄羅斯足協名義比賽，無頭展示國旗/奏國歌等，但各國就為有關安排送上一波批評，照出即使去到中立場都好，只要對手係俄羅斯都會杯葛。係一日後，FIFA/UEFA就一齊宣佈，禁止俄羅斯國家隊/球會參與佢地舉辦嘅所有比賽直至另行通知。近嘅就影響俄羅斯球會莫斯科斯巴達被迫歐霸十六強就出局，RB萊比錫自動晉級，遠嘅就影響俄羅斯國家隊無份踢今年年尾世界盃，對比初頭嘅『制裁』可以話辣得多，變相令俄超球隊少左歐洲比賽嘅賽事收益，外援隨時集體走，係觀賞度同財政上帶嚟嚴重打擊。俄羅斯足總隨後當然就發聲明抗議話違背國際賽事體育精神等等，保留質疑嘅權利，不過我諗係佢地收埋支槍之前，反對得再大聲都無人會聽。車路士發聲名艾巴交出管理權
同樣因俄烏戰爭受影響嘅仲有車路士呢隊波，大家都知道佢地嘅老闆係俄國有錢人，係歐洲各國制裁俄羅斯多間銀行下，唔同國家涉及俄羅斯嘅資產都可能受到影響。係制裁等措施出左無耐，車路士官方就表示艾巴將會交出球會管理權，改由球會慈善基金信託人打理，話咁先係當今一刻最符合球會上下利益，但有英國媒體報導有關信託人對呢個決定尚未同意，擔心遲有咩事要食死貓，所以未知係咪真係交接到。不過艾巴聞到濃味識得即刻退場算係走得快，以免自己/球會成為戰爭下嘅炮灰，加上佢有被懷疑過同普京政府行得幾埋下，賴死唔走隨時唔見左一部份身家。另外有指艾巴係宣佈交出管理權後表示願意為俄烏局勢出面斡旋，唔知被認定同普京關係密切嘅佢有無機會成為談判專家？聽日仲有今期週報下集，同大家報導英聯盃同列斯換教頭。