英超講場 第五期週報 -- 『轉會窗最後買買賣賣，有球員或要告別自由』 精選

第五期週報 -- 『轉會窗最後買買賣賣，有球員未來或要告別自由』

轉會傳聞/消息

• 熱刺曾經嘅『非賣品』阿里轉會至有新教練嘅愛華頓，簽約兩年半至2024。

• 利物浦成功截胡熱刺心頭好，從波圖簽入邊鋒迪亞斯（Luis Díaz），將會著上紅軍23號波衫，消息指利物浦需要為呢位新力軍付上大約共6000萬歐元轉會費，佢可唔可以成為三叉戟嘅繼承者？

• 雲迪碧克終於可以離開曼聯（暫時），落實租借至愛華頓，至少獲得機會去證明自己。

• 狼隊筋肉人查奧爾租借至巴塞，包含3500萬歐元買斷條款，熱刺再次成功失去心頭好，除左球員本人想回歸巴塞外，我諗熱刺都要檢討下談判嘅方法，相信主席列維嘅慳家性格，亂壓價亦係問題主要成因。

• 奧巴美揚無聲告別阿仙奴，雙方以和平分手方式終結合約，實在令人惋惜，回想曾經佢支撐住阿仙奴嘅入球，但紀律等原因下放大佢今季走下玻嘅問題，導致佢直接迎來阿仙奴生涯嘅終結。巴塞亦其後宣佈球員加盟，奧巴轉戰西甲。

• 29歲已經係鬼門關行左一圈嘅艾歷臣成功通過體檢上嘅要求，成功加盟賓福特，雙方簽約半年附有續約條款，佢早前亦同阿積士青年隊跟操幫助自己搵翻狀態，遇到咁大難關都無放棄足球實在值得我地欣賞！

• 般尼終於搵翻個「頭」，佢哋係禾夫斯堡搵到位身高接近兩米嘅中鋒韋格賀斯(Wout Weghorst)，終於係基斯活特嘅意外岀走後搵到下一任，就咁睇兩米嘅身高好適合般尼傳統踢法嘅風格，只係略嫌29歲嘅佢年紀有少少大，怕有咩事又要買第二個。

• 熱刺連續俾人截胡後，係祖記一次過打包兩位球員，一買一借，分别為中場賓坦古同古路施夫斯基順便又借走尼當比利去里昂。

格連活特捲入性侵/家暴事件
較早前，格連活特女友係社交媒體上上載自己身體各部位既淤青同傷勢並表示：『給所有想知道格連活特對我做了甚麼的人』，矛頭直接指向呢位20歲球星。，當中更有節錄錄音流出。曼聯官方亦隨即表示不接受任何形式的暴力行為，稍後宣佈綠木即時停止球員活動，Nike亦宣佈暫停同綠木嘅合作關係，FIFA22嘅遊戲亦無左佢蹤影，相信都聞到呢位球員有排煩。執法機構亦已經介入呢次事件調查，現時以意圖性侵，傷害他人拘捕呢位球員，暫時係接受調查後獲准保釋，唔敢想像如果告得入的話對綠木嘅職業生涯有幾大影響。林伯成為另一『藍軍』主帥
炒走賓尼迪斯後，拖肥心中其實有兩位人選，一就係朗尼，再唔係就林伯。而朗尼亦係訪問表示的確收到面試邀請，但就拒絕左，因為佢認為現時打比郡嘅處境需要佢，佢亦唔會係咁嘅時候離開呢間球會，聽佢意思就係想至少帶隊捱過今季護到級之後先諗。自然就去左搵無野做嘅林伯，而林伯聽到有得教翻另一隊嘅英超藍軍就求之不得，對佢領軍至少一定可以賺到經驗。對於愛華頓，林伯嘅存在又可以為球隊開始重建換血計劃，現時拖肥個陣比上不足，比下有餘，就缺左一啲年青同埋未來嘅核心。回想當時車仔無得買人，林伯一手帶起唔少年青一代，當中大部分都已經踢岀身價成為左正選，我就期待佢都可以幫愛華頓開好個頭，可以未來一兩年衝一衝頭六，係佢入主已經為缺乏創造力嘅中場入左阿里同雲迪比，戰術佢可能未去到最Top但至少佢都係一位心水清既教練，知道呢該球隊問題所在，用佢有限既方法帶來改變，不妨期待下嚟緊既拖肥！