英超講場 第四期週報 -- 『異常投注量事件發酵，諾域治再成教練催命符』 精選

轉會傳聞/消息

• 曼聯與西維爾達成協議，租借馬斯亞至季尾，由西維爾負擔佢＄24萬鎊週薪。馬斯亞今季係曼聯只上陣過七次，上個禮拜對韋斯咸先係佢第一次係朗尼克接任後上陣，一度以為佢同教頭矛盾借住呢場贏波破冰有得用翻，點知原來只係教練見和波想要3分太緊火要用佢同埋俾西維爾驗貨，可能要睇埋下任教頭先知佢會唔會繼續成為紅魔球員。

• 《TA》有消息指艾歷臣已同意賓福特開出嘅半年合約（有續約一年條款），但需要等球員本人通過體檢先成事。始終大家都對佢暈低嘅畫面歷歷在目，我諗球隊同英超官方都會需要時間確保佢身體健康先會有然後，希望佢可以完成願望，再為國家隊上陣參加今年世界盃。

• 繼續有嚟自賓福特嘅消息，球會同教練法蘭克（Thomas Frank）提前續約至2025年夏天。以佢今季帶隊上翻英超嘅表現，暫時排第14位，距離降班佢有9分差距又贏過阿仙奴，韋斯咸，維拉等有實力嘅球隊，續約留人俾肯定都都好合理。

• 巴黎有意租借熱刺球員尼當比利，雙方正在為此談判。相信熱刺都好想快啲甩走呢位球員，近兩三位教練都對佢表現失望，最近佢係熱刺嘅情況就係自己獨立訓練，近兩場無參與比賽，又再次成為邊緣人，當然想借走佢分擔下＄20萬英鎊嘅人工啦。

• 曼聯同紐卡素無法達成協議，連加特租借/轉會大機會告吹。而若果呢個轉會窗佢走唔到而又唔續約，係六個月後佢就會成為自由球員，紅魔鬼將會人財兩失。到底佢地係有信心留得住佢定係純粹鬥氣呢？而水晶宮亦想得到失意球員雲迪碧克，但全部未有確實進展。

短短三個半月，屈福特炒教頭雲爺
每次聽到雲爺接手一隊波，都會諗起佢之前帶嚟嘅『李城奇蹟』，亦會有少少期待下一個奇蹟。但可惜今次三個半月嘅執掌時間代表童話故事未有下集。經過3：0輸俾諾域治後，屈福特同諾域治交換位置入降班區，大黃蜂決定賽後仿效愛華頓炒教練，董事局表示感謝佢任期內貢獻，只係係距離完成今季英超仲有接近一半路程，呢刻換教練會俾下任有更好時間去達成球會目標，所以就此分別。回顧雲爺係呢三個半月，我諗最好表現就係4：1贏曼聯送蘇B一程個場，之後係佢任內三個月多啲就只帶嚟七分，再救護級諾域治出嚟自己入降班區真係好難怪董事局今次決定。至於下任領隊就由前水晶宮教頭鶴臣接任，佢接受屈福特開出至季尾嘅合約，大黃蜂應該都會想借佢過往係水晶宮嘅豐富護級經驗去渡過難關。

阿仙奴『黃牌事件』再有消息流出
上個禮拜嘅週報，我同大家提及過英足總發現今季某位阿仙奴球員黃牌數量投注項目有異常投注情況出現並已展開調查。《TA》最新消息指相關投注額達到＄31萬鎊，而買中的話可以得到＄73萬鎊，雖然呢刻足總未循官方途徑向外表示展開調查，但呢件事已由發現異常嘅博彩公司上報至International Betting Integrity Association (IBIA)，若果個位阿仙奴球員真係牽涉其中相信都有排驚。