英超講場特別篇：FIFA修訂租借規例，「水塘計劃」迎末日？ 精選

就係過去一日，FIFA就公佈左球隊租借規例嘅一系列更新，看似普通，但實際可能係蝴蝶效應下影響球壇，所以係呢次特別篇就同大家探討下呢個轉變。
日前，國際足協(FIFA)就租借條款進行修訂，新規例下將會限制各球會租出/借入球員的數量。而相關轉變將會分階段實施，以下為有關細節。

• 由2022年1月至2023年6月，球會每季最多只可借出/借入八位球員至其他國家聯賽

• 由2023年7月至2024年6月，球會每季減少至最多只可借出/借入七位球員至其他國家聯賽

• 最終由2024年7月起，球會每季減少至最多只可借出/借入六位球員至其他國家聯賽

• 限制球會與球會間，最多只可以借出/借入三位球員。

• 修訂後，需列明雙方球會為租借球員訂定最短及最長租借期（最長為一年），經濟情況等

（而21歲以下/自家青訓產品將不受以上限制，本土間租借限制則有待決定）
FIFA官方表示呢次修訂主要係想俾到年青球員有更好嘅發展空間，推動球會間公平競爭以及避免出現有球會囤積球員嘅情況。相信係想針對近年唔少大球會嘅轉會策略，早早引入有潛質嘅年輕球員，然後將佢地租借到國內外拎比賽經驗，係某一個位置需要改朝換代就回收嚟用，一方面可以確保陣容深度更可以透過呢啲年青球員賺取/節省一筆轉會費，車路士嘅『水塘計劃』就係一個好好嘅代表，係18至19球季佢地借出左49位球員，當中依家踢緊水晶宮嘅干拿加拉加（Gallagher），諾域治嘅基魔（Gilmour）都係水塘計劃下正面成果，可見大球會兵源係以往規例下所建立嘅可持續性。
FIFA認為為呢項變動可以改善經濟財力較好嘅大球會囤積嘅質素球員，令中下游球隊都可以透過自己眼光揀到一個佢地係限制下無法擁有嘅明日之星。的確就咁睇今次嘅修訂無疑會影響有執行『水塘計劃』嘅球會，有機會員影響佢地呢刻用有殺錯無放過嘅心態去搵人才。而其實大球會都仲有唔少方法保留自己嘅水塘，例如係自家青訓上投放資源，更大嘅青訓規模係下一層提早『有殺錯無放過』，變相就會可以走灰色地帶去租人出去，至少呢刻修訂並無針對自家產品有所限制。另外仲有方法就係將人才直接賣出去賺經驗，再係轉會條款加入優先回購，都可以用灰色地帶減少今次嘅修訂影響。睇下稍後FIFA會唔會公佈更多詳情為球壇局面帶來更多影響啦！