英超講場 第三期週報 -- 『轉會市場看貧富，車仔爭標難上加難，紅魔動盪依然』 精選

第三期週報 -- 『轉會市場看貧富，車仔爭標關關難，紅魔動盪依然』
轉會傳聞/消息

• 李城琴晚被熱刺補時兩分鐘內反勝為敗後，領隊羅渣士佢雖然想係轉會窗借一個中堅，但向傳媒表示睇嚟得個想字，好難成真，後防兵荒要係下半季持續。

• 紐卡素有意西維爾中堅迪亞高·卡路士，雙方現時未有任何進展，球員自己就表示想轉會紐卡素，但有記者報導西維爾係拒絕左佢地嘅offer，雙方仲未為轉會達成一致。因為西維爾並唔想係今季有爭標希望下流走主力球員，加上佢地並無為有關位置安排後備方案。

• 有指賓福特對艾歷臣感興趣，已為對方送上半年合約嘅邀請，為艾歷臣提供意甲俾唔到嘅機會。（根據意大利健康部門規定，身上植有心臟除顫器嘅足球員係不能夠參與職業聯賽。）

• 維拉繼續補強！係簽入古天奴後，佢地再係羅馬借走門將羅賓·奧爾森至季尾，相信係為正選馬天尼斯提供一個後備，有咩事有個Back Up，唔太相信奧爾森會動搖到佢嘅正選位，不過維拉係冬窗動作咁多實在有驚喜。

車路士作客搶唔到分，爭冠難上加難車仔係對曼城爭冠關鍵戰最終1：0敗陣而回，杜曹今場就唔同過往幾場對碰，反而係要分嘅情況下縮後嚟踢，全場就由曼城控制節奏，當中車仔當然都有幾個反擊機會但都俾正選三位進攻點一一浪費，特別渣古同薜耶治狀態非常麻麻，如果把握其中一次就已經可以偷走一分，係積分榜上留一個大啲嘅懸念，有必要諗諗佢地嘅功能同擺位組合。最終係最近斷兩翼下，只可以輸俾月亮，被拉開13分優勢，之後又再次和左白禮頓，睇怕追趕嘅任務要交俾利物浦啦。

<<The Athletic>>報導英足總就阿仙奴黃牌數量異常投注量展開調查

據報導，英足總發現今季阿仙奴球員黃牌數量嘅投注項目有異常投注量，而據報亦已知道係邊位球員牽涉其中但因處於調查及法律原因未有公開。

般奴與曼聯續約事宜暫時擱置
根據The Atheltic報導，曼聯曾經最近秋季為般奴送上一份合約，但就遭到佢同佢經理人拒絕，相信係受到近期曼聯前景不明朗而有所影響，有指相關談判會係嚟緊五月重新展開，但若果未來幾個月戰績都仲係咁上下，爭四又難爭六又危下都唔洗諗佢會為曼聯拎起支原子筆簽名啦，幸好嘅係佢份合約就仲有段時間，去到2025年6月，仲有時間去改變形勢，等連贏幾場先送份合約俾人啦。

馬斯亞擺踢風波各執一詞
上場曼聯被維拉迫到和波後，教練蘭歷克賽後訪問指馬斯亞唔想係大名單中，變相直指對方罷踢。而係訪問出街無耐，馬斯亞就係社交媒體表示自己絕對唔會拒絕為曼聯上陣，雙方隔空口同鼻拗。相信都係因為早前馬斯亞想走又收到西維爾Offer後，曼聯就拒絕左對方，令馬仔覺得係教練蘭歷克玩野唔放人，最終仇恨堆積，無溝通下就演變成咁。無論如何，對於蘭歷克係教波用人外，係曼聯呢啲新聞上，睇得出佢好似未控制到更衣室，坦白講成績如果差唔多，不如當初留蘇B係到傻笑仲好。

僅六個月，愛華頓解僱領隊賓尼迪斯
賓尼迪斯過去十一場帶領愛華頓只得一勝，係呢個禮拜仲要2：1輸俾降班膽諾域治，間接直接申請辭職，分別就在於球會補錢要你即走。其實我諗原本拖肥都俾幾大期望呢位教練，如果唔係都唔會當初六月請佢個陣簽份三年合約，你望下熱刺領隊干地都係去到下年6月咋....不過回顧呢半年，賓哥都有做到少少野嘅，例如簽入格雷同唐辛，至少呢兩位係球隊成績差嘅時候個人表現都叫對板，就當係留份心意俾下手啦。（而下手暫時係未有人選消息，有指鄧肯費格遜會暫代領隊一職，亦有傳朗尼同林伯都係傳聞人選之一）