意外後的落敗，是意外還是人為？ [足總盃曼聯1:3車路士賽後感] 精選

經過一輪又一輪，足總杯四強嘅比賽終於係啱啱嘅禮拜完美落幕，亦已經決定出決賽登場嘅隊伍。呢兩場嘅比賽都十分有睇頭同話題性，今次就會同大家分享一下紅藍大戰呢一場嘅賽後感。
係比賽之前，我哋望一望近排兩隊對賽往績，近況表現，以及人腳嘅狀態，都可以留意到曼聯係所有方面都佔有優勢，紅魔鬼球迷相信係比賽之前亦都深信自己球隊可以成功再一次擊敗車路士進入決賽對陣阿仙奴，但結果則係完全相反，當中嘅因又係啲咩？
雙方陣型上，佢哋都一改聯賽常有嘅姿態，以三中堅五後衛嘅排陣方法面對對手。對於雙方來講呢個選擇亦都合理，車路士方面可能會認為曼聯會繼續崇尚自己嘅4231 ，所以選擇就用上三中堅施壓曼聯嘅控球在腳破壞進攻組織，務求防守上禁區入邊可以多一個人對抗曼聯般奴嘅創造力。而至於曼聯，佢哋都有眼見車路士433控球在腳嘅打法，選擇三中堅收縮，可以令自己享受最擅長嘅反擊戰術，打算以今季曼聯贏強隊嘅方法照板煮碗再贏一場，再加上英超聯賽爭四比較激烈，近排比賽一場又一場都可以話係無輪換過，以三中堅五前面就可以用上平時少用嘅James用速度去打佢哋心目中嘅反擊，所以雙方嘅取態係合情合理。
雖然上面講到兩邊選擇五後衛嘅合理，但係踢出嚟嘅表現由開波早段至中後期間，我哋可以留意到曼聯嘅球員相對下無咁適應呢個打法嘅改變，一嚟車路士並唔係自己預期中控球等自己壓迫嘅打法，二來就係三中堅令到中場變得較少人，少有休息嘅老中場馬迪拍費特整體慢過對手運轉，慢打慢之下連結上出現問題，例如搵唔到人嘅情況，進攻上只係可以透過長傳去過半場，但係曼聯相對之下就缺少一個好似基奧特嘅靈魂支點，冇辦法喺長傳嘅方法之下打開缺口，久而久之令到自己控球同埋進攻頻率逐步下降。而相反車路士就因為咁獲得控球，係曼聯攻轉守嘅時候，對方球員未返返去防守位置上面成功獲得少少嘅空間從而進入對方禁區威脅迪機亞，所以係上半場拜利傷出之前我哋都可以留意到車路士嘅威脅攻勢係較多嘅一方。去到呢個階段曼聯只可以話係響起警號但係未至於要輸嘅局面，但係一個意外就令曼聯嘅處境唔止係響起警號咁簡單。呢個意外就係中堅拜利同自己隊友麥佳亞頭撞頭之後需要退場，之後蘇斯克查竟然用上馬斯亞入替，心水清嘅球迷應該當下就即刻知道佢想借呢個受傷嘅調動變陣玩返4231。可能有啲人錯覺我認為轉返4231曼聯終於可以喺唔習慣之中走出嚟，睇返過往幾場不斷贏波入波嘅水準。聽落好似好合理，但係比賽中段無落後下調整後防線嘅人數其實係會令球隊嘅防守一下子未能夠適應，同埋變身之後就合晒車仔原本使用三中堅嘅心意，唔單止係曼聯冇辦法舒服咁攞住個波，仲喺對方防守嘅時候少咗一位中堅去對抗對面神級老前鋒基奧特，而呢啲負面效果就係換人幾分鐘之後已經出現，造成曼聯半場落後零比一嘅局面。然後隨着下半場迪基亞半失誤失近柱下好快就令曼聯落後二比零，而呢一個失球亦都令蘇斯克查半場喺更衣室就算有咩戰術調動都好，都冇辦法順利上演，最終曼聯亦一沉不起，無緣決賽。今次無緣決賽其實反映咗蘇斯克查戰術佈置同埋臨場調動未夠成熟之外，仲反映咗佢陣容單一化嘅缺點，復賽之後曼聯嘅狀態雖然提升左唔少，贏多咗波但係往往太過倚賴正選11人，甚少輪換，起用後備球員，令佢哋係關鍵時刻想換人上場都好踢唔出狀態，後備上場又冇改寫戰果嘅能力，種種細微嘅因素埋下左失利嘅伏線。幸好嘅係爭奪英超前四次只係餘下一輪嘅賽事，未至於將陣容單一化嘅問題放大至無可收拾嘅地步，但若果蘇斯克查仍然採用相關方針，咁紅魔嘅魔性係多線作戰下唔會維持得好耐，還望蘇B及早留意。