兩位前途光明領隊之間嘅對碰 [阿仙奴1:2車路士] 精選

話咁快2019就黎到尾聲啦，倒數狂歡之後大家又要重新開始，繼續勞碌，但當然足球亦會繼續係草地碌每個禮拜陪住我地，做我地最佳娛樂。事不宜遲，為大送上2019最後一場賽後分析，亦係倫敦打吡！
先講由阿迪達帶隊第二場嘅阿仙奴啦，陣型上依舊都係4231，嘗試利用短傳連結組織攻勢，球員會比以往積極跑多兩步，比近年嘅阿仙奴嘅進攻模式較有耐性同埋細緻，呢啲都係阿迪達帶隊嘅明顯轉變。而今場其實阿仙奴係車仔變陣前表現唔錯，面對壓迫都會猜傳去過對方半場，當見到車仔想快嘅時候就迫搶快擊時嘅支點，令車仔係自己想快嘅時候快唔到，想攻又攻唔入因為已經企好哂做好防守，可以話將3中堅嘅優點瓦解嘅同時亦令車仔暴露陣式及球員不習慣3中堅嘅缺點，所以我地可以見到上半場大部分嘅威脅攻門及機會都黎自兵工廠。領先嘅一球雖然係依靠死球機會，但都要一讚美羊羊嘅走位，好聰明地利用盲眼位衝前再退後食翻身位令自己可以頂入為球隊領先，另外都要為奥燒狀態開始回暖而感到開心，呢場比賽可以見到唔少靚傳送，以阿仙奴依況極度缺乏創造力黎講，狀態好嘅佢一定可以幫球隊唔少忙，至少破鐵桶會易啲先。然而，領先過後隨住車仔變陣下，阿仙奴開始成為受壓一方，點知到一受壓就俾人壓到落完場。我明白阿迪達可能見領先會想引對方攻自己，等球隊有空間打反擊，但係前線球員美羊羊等人嘅企位未免過後，出現縮得太後反擊打唔出嘅問題，78分鐘嘅反擊就係一個好好證明，拿卡錫迪缺乏隊友支援之下白白浪費左一個反擊機會。另外調動上，阿迪達始終經驗尚淺調動比較慢，由車仔轉陣之後，好明顯阿仙奴會成為受壓打反擊嘅一方，而呢個模式係完全唔適合欠防守防速度嘅奧燒去打，來來回回只會令佢地打少一個咁，但去到75分鐘先換人實在太遲。至於pepe唔知咩原因下，係龍格堡同阿迪達掌印下佢嘅正選位都俾後生仔取代，但即使佢唔啱自己都可以早啲放佢岀黎，以佢嘅速度同技術的確可以令對方防守狼狽，特別係賽事尾段。小結就係阿仙奴雖然被反cup，但係少帥上任後就有明顯嘅進步起色，只係需要時間俾佢了解調動嘅時機同球員嘅屬性，希望球迷會俾耐性佢。至於車仔，一開始用3中堅無疑係因為對熱刺嘅勝仗之後而用嘅，林伯應該想以呢個陣式以壓迫去迫阿仙奴岀錯，方法同諗法都正常，只係係密集賽期好難叫球員做到好似對熱刺個場咁高效率嘅迫搶，再加上兵源受傷患影響，3中堅用得有心無力，只可以話佢計甩左體能一環嘅重要性，同埋就係球員對3中堅嘅適應，你會見到當中堅攞住波想運上去嘅時候無人現身回後，然後引黎對方迫只好大腳長傳幸好，岀名智商高嘅佢非常決斷，失球無耐就放棄3中堅，換入佐真奴，即刻為球隊帶黎立竿見影嘅效果，佢會企得比較後，去幫手組織撘橋，解決左3中堅成日要靠長傳過半場而失控球嘅問題，波過到半場自自然就有唔少威脅埋門，可見呢個當機立斷嘅早調動成功救翻車仔一命。而受惠於對方收縮下，車路士長期都可以圍攻對手，發揮433嘅威力，最終阿仙奴死守姿態失敗輸死球又焗住壓上去，成功用一次反擊於倫敦稱王。呢一次嘅逆轉雖然某程度上係對手幫咗自己，但係一切嘅來源都係嚟自於林伯嘅天份同果斷，今季先立足英超嘅佢就咁成熟，我真係好睇好佢領隊生涯嘅前景。最後，預祝大家新年快樂，新一年順順利利，而我就繼續用文字同大家看足球。