短評南野拓實加盟利物浦

英超講場 於 21/12/2019 發表 收藏文章
就係禮拜四,利物浦官方終於宣布一位新人加盟,而呢位新人正正就係無耐前自己對手薩爾斯堡既其中一員,來自日本嘅南野托實,佢亦係紅軍史上首位日本球員。
南野拓實係2013年完成高中生涯之後,正式提拔到大阪櫻花嘅一線隊,當時佢實係令人幾印象深刻,因為佢一升到上一線隊後嘅第一場就得到首發嘅機會,最終佢係日本職業聯賽生涯上陣62次,並得到7球嘅收獲,當然同所有球員比較表現唔算突出,但以佢當時年紀有咁嘅表現,係正式聯賽上絕對係合格有突,佢亦因此係2013年獲得最佳新人獎項,同埋得到奥地利球隊薩爾斯堡嘅注意,令佢得到衝岀日本嘅機會。輾轉之下,係今年嘅10月,利物浦迎戰薩爾斯堡嘅時候,佢嘅成功把握左發光嘅機會,對住利物浦後防嘅大將軍雲迪克成功show off,仲射入一球,表現絕對令人眼前一亮,而佢呢場嘅表現亦都成功獲得利物浦球員及球會嘅注意,令佢獲得機會開始自己英超生涯。
24歲嘅佢嘅定位可以係攻中亦可以扮演綠葉做翼,皆因仲年青嘅佢有青春本錢,以體能及速度應付兩側綠葉嘅位置。而對於利物浦黎講,佢地近況主要都會玩主攻433,中場正選球員健康嘅時候都會用上韋拿度姆,軒達臣等人,但係其實唔經唔覺佢哋兩位已經接近30歲,係今季多線作戰,成日要舟車勞頓之下,傷病嘅問題好大機會成為利物浦爭奪冠軍嘅伏線,而原本嘅替補雖然有張伯倫,拉蘭拿等人,但係佢哋已經過咗佢哋最青春嘅時候,若果要面對高速度嘅來回對攻,呢班替補球員,就例如已經31歲嘅拉蘭拿未免會有啲吃力,再者佢哋大部份都欠缺速度,真正有效率嘅替補可能只係得基達一個。所以今次南野實嘅加盟可以話係利物浦今季無論歐聯英超上面嘅一場及時雨,皆因現階段嘅利物浦其實已經出現咗傷病潮,中堅洛夫雲,馬迪普因傷短期都未可以候命,而過往係呢個時候可以移落一格客串嘅防中法賓奴亦都因傷高掛免戰牌,令到高普只可以調動中場嘅人去幫手打住中堅嘅位先,中後場傷病令人手非常緊張,而買左拓仔之後可以趁住今年英超有農曆新年假同球隊磨合,到時就可以令中場多一個人可以用,而軒達臣就可以專心去後面救住火先,相信應該可以幫利物浦捱過今季第一個難關。
而係人手回復正常下,佢又可以扮演一個有威脅及影響力高嘅替補,例如去到比賽後期,對手體能始終會下降放手質素減弱,到時候拓仔就可以有空間及機會再發揮潛能,以速度及個人技術衝擊對方後防,再者三叉戟若需要全體輪換都可以用佢,打住兩邊先,令到正選陣容得到休息嘅時間。
所以若果你問我,我一定會話725萬鎊簽佢翻黎抵到爛!我預測佢應該可以係利物浦踢出一片天,希望佢可以盡快適應英超嘅節奏,皆因我認為身體質素應該係佢暫時嘅一個缺點,有機會係佢英超生涯早段成為影響自己表現嘅關鍵,但係我相信教練高普同埋利物浦一眾嘅隊員,絕對可以帶領佢融入英超,期待又一位亞洲球員喺歐洲發光發亮!

留言


請按此登錄後留言。未成為會員? 立即註冊
  • Gor SK 於 21/12/2019 評論 NO. 1

    再唔買人又好似上年咁既啦,岩用就好彩

快捷鍵:←
快捷鍵:→