從曼市打吡看曼聯本季縮影 精選

紅魔先係季初贏完車仔，和兵工廠，和利物浦後，遇上連勝熱刺，以為會終嘗一敗點知更贏埋對方;然後再遇上季冠軍曼城，意外取勝嘅劇本又再上演，更可以話以技術性狠狠教訓左對方一次，成功係第一輪對陣其他Big6下保持不敗，而今次呢場打吡就比較特別，皆因佢正正係代表兩隊本季縮影嘅最佳證明。
唔知大家有無發現曼聯係過去大部分五場對陣其big6球隊都有一個共通點？就係佢地往往成為弱者並且處於被動嘅一方。而呢個定位及打法其實就間接地顯示今季曼聯嘅縮影，只可以選擇受壓，係成功抗壓後尋找空間運用青春嘅無價進行閃電反擊。除左啱啱呢場打吡係其一證明之外，曼聯對住熱刺都係另一例證，就算要撇除big6外嘅球隊都可以揾到證據，就例如對住今季升班馬有前無後嘅諾域治，如果大家有留意佢地今季風格係大部分時間對住咩球隊都好，都好願意進攻，所以當曼聯遇上佢地可以真係話啱哂佢地口味，係作客情況射失兩球十二碼都贏3:1。相反，你望翻當曼聯嘗試扮演強勢嘅一方，又有幾多次有好結果？大部分情況非和則輸，所以你話叫今日嘅曼聯係強隊都認真尷尬。而造成呢個尷尬某程度真係因為蘇B，係蘇B大玩青春熱血流下打造左一把雙面刅，體力及速度當然係當中嘅優勢，而當然經驗及球隊成熟度就係呢把刅傷到自己嘅地方。球員大部分過於年輕，於進攻及連結嘅決定上不夠成熟，岀現連結不穩，因個人主義浪費進攻機會，換言之，再一次證明我之前成日提嘅一點，今季曼聯絕對唔適合主攻，反而應該放低身段以穩守行先，相信若果蘇B願意作出呢個取態絕對有助今季成績，至少唔洗對住弱旅都係咁失波造成失分。講到呢到，唔知大家會唔會諗起曾經入魔嘅摩佬？我就覺得其實係有啲諷刺嘅，皆因當年迷戀大巴嘅佢經常被人批評令曼聯失去魔性，比賽風格沉悶，而今日嘅曼聯又因為種種因素下，令穩守行先成為有好表現嘅關鍵。。。所以若果話摩佬當初執迷大巴，倒不如逆向思維話佢一早睇清邊條路最適合近年代嘅曼聯。