同樣以失敗告終嘅「復仇者上集」 [曼聯2:1熱刺] 精選

未開波之前，望住曼聯前幾場通常對住弱過自己嘅球隊都非和則敗，只有寥寥可數嘅勝仗，而熱刺就帶住連勝嘅勢頭黎到奧脫福作客，可以話係摩奴復仇最佳時機，但最終當然比分宣告呢個復仇失敗啦，而呢個幾個原因可以話係當中影響比較大嘅因素。
一，熱刺過多使用長傳，影響球隊連結準確性。係場波嘅大部分時間，我地都成日見到當熱刺後場一攞住個波就會第一時間望最前面有無人跑，有少少機會都會選擇大腳放上去揾人做支點。而呢個動作好明顯係主帥摩佬叫嘅，一黎可能佢見之前對般尼茅夫用呢招有幾好嘅效果，二黎熟悉曼聯後防嘅摩佬亦想就此想俾針對性壓力佢地，搏佢地有機會走漏一次半次送佢地致命一擊。就咁睇成件事合理不過，但望下前面4個進攻點，相信只有哈利仔算特別頂得，其他3位孫大人摩拉等係高空對抗上並無咩優勢，而之前對般尼茅夫，前面其實係有接近190嘅施素高幫手，再加上曼聯今季防守雖然係弱，但重金禮聘嘅麥佳亞同雲比沙卡就咁單一嘅對抗能力都比茅夫好。所以每次長傳，就會岀現攞唔到，hold唔實，基本上都可以話失敗告終，曼聯唔洗點迫都好都可以有翻個波，又可以攻過，最大嘅影響係自己做唔到攻勢岀去，上半場嘅整體形勢就係最好證明。二，熱刺中後場嘅非常弱嘅岀波技術，浪費機會。係比賽中後期，經過調整嘅熱刺多左猜傳，得到多左過半場嘅機會，不時會見到防中同左右兩閘有機會上黎K角位斬波岀波，以右邊嘅機會最為多。但每次不論施素高同aurier岀波都係太貼門或者直接岀左底線，令熱刺就算過左半場，有勢都好，但係無威脅可言。呢個問題其實非常需要摩佬重視，要重點培訓翻班球員岀波，皆因冬季已經講明無得買人，否則遲啲需要主攻，而中路突破又打唔響要靠明買明賣嘅時候，就可能會係攻唔入而失分嘅關鍵。三，曼聯放手一搏，成功令熱刺失去節奏。我諗摩佬賽前都有預計過曼聯嘅各種取態，亦嘗試準備應對每個情況，但曼聯就選擇左最低機會嘅方案大舉壓迫又係靠中場青春嘅力量搶波，費特亦開始有返狀態，中場線上佢同麥湯復岀最為關鍵，把握熱刺上半場連結唔到嘅問題，迫完有波之後不斷輸送俾前場攻擊，令熱刺久而久之就失去節奏，削弱佢地進攻時間，而自己就可以係呢個情況之下得到最大嘅利益，整體防守意識差嘅問題亦無需暴露。曼聯呢場勝利可以話係喺自己孤注一擲同埋熱刺自身問題嘅情況之下先做到。摩佬經過今次一仗亦有機會了解到更多球隊嘅根本問題，希望佢可以留意到從而作出改善，令到熱刺整體上有所成長。今年聯賽下半場主場再對曼聯，係自己屋企再上演復仇者下集，以成功證明自己都唔遲。