預料中的面孔,預料外的比數 [利物浦3:1曼城賽後評]

英超講場 於 11/11/2019 發表 收藏文章
榜首嘅六分大戰終於係琴晚順利上演,利物浦憑着比賽初段兩球嘅優勢下,喺下半場早段再下一城早早鎖定勝局,以3:1成功贏得天王山一役,保持不敗,如此分差相信絕對對大部分球迷而言係意料之外。
作客嘅曼城,今場正選陣容缺左幾位大將,分別為龍門艾達臣及大施華。只有中場洛迪驚喜地克服傷患係中場線上獲得正選一職,配上助攻機器迪布尼及根度簡。開波初段,曼城成功透過非常高壓嘅逼搶一度令利物浦長時間失去控球權處於被動嘅狀態,屢次獲得死球嘅機會。然而,係高位壓迫下所得嘅優勢只係大概維持短短5分鐘左右,皆因一次手球後,利物浦成功透過反擊下對方解圍不遠,令法賓奴係禁區頂獲得空位射入一球靚波。而幾分鐘後,就係對方轉邊下,由羅拔臣交岀靚弧線俾沙拿頂入,短短十分鐘落後至2:0,而呢球正正係今場比賽曼城失利原因嘅縮影。哥帥唔知係為左俾更多支援啱啱傷癒嘅洛迪定選擇保守下,今場用左洛迪同根度簡企後作雙防中,只得迪布尼較前參與進攻,留意三位速度都唔算快,回追迫搶能力有限。但哥帥則選擇用呢套陣容高位迫搶嘅手段對抗利物浦,岀現利物浦只要透過轉邊,猜過壓迫就可以大腳踢上前場由三叉戟用速度製造恐怖反擊,而回追及迫搶較慢嘅中場線可以話吃盡苦頭。仲記得小編賽前分析若曼城要得到優勢,就需要極端地執行戰術,選擇壓迫就要起用一啲速度型較快嘅球員,先至真正可以令利物浦受壓,失去控球,呢個戰術上嘅犯錯不但令利物浦可以想大打佢哋最喜愛最久違嘅反擊,仲可以令對方係自己回追較慢下獲得更少壓力嘅優勢。而當面對利物浦領先下嘅收縮,因為雙防中,比平時少一個進攻點,令破大巴嘅能力下降,最後小編亦有留意到曼城球員出現緊張嘅情況,不時攞甩腳同埋浪費唔少黃金機會。
而利物浦方面,佢地就比較好彩,唔使受傷兵嘅困擾,只得中堅馬迪普未能上陣由危險較高嘅洛夫雲代替,但身邊拍住個雲迪克,爆炸嘅機會即時降低,而中前場則不變應萬變。唔知係咪高普一早預料到曼城會擺出高壓逼搶嘅姿態同埋安排好領先後嘅戰術。係初段,球隊短短時間就已經快速適應對方逼搶嘅戰術,仲搵到有效嘅解決方法,就係轉邊同長傳,係迫到控球權後就快速攻上去。而係領先後,則有系統地縮後,甚至叫左右兩翼返嚟幫手回防,防止兩側被曼城overload下岀波,有效地限制對方習以為常嘅進攻套路。若果以上行動都係高普一早預料到會出現嘅情況,而早早安排解決方法,就真係不得不配服其預判能力。除左兩翼回防勤力之外,另外仲要讚防中嘅法賓奴,今場可以話非常sharp,不但透過遠射令利物浦領先,防守上亦都作出唔少精彩攔截,攻守俱備。
今場亦都非常慶幸見到高普願意改善,早早作出調動,60分鐘就肯換第一個人,不過呢個我就覺得佢係 被動嘅,事關賽前有消息指隊長軒達臣帶病上陣。球隊係獲得三球嘅領先後換走佢亦都合情合理,就留意吓下一場歌譜仲會唔會因應情況早早善用調動嘅名額,我認為若果高普能夠喺未來更快更果斷咁調動球員,必定會令佢嘅執教能力更上一層樓,相信紅軍球迷亦樂見此事,皆因佢進步亦即係球隊進步。最後亦在此恭喜利物浦成功贏得今場英超冠軍嘅前哨戰,建立8分嘅榜首優勢,只要利物浦繼續維持出色嘅發揮相信英超冠軍指日可待。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→