車仔補一刀,為曼城結束追趕之季。[車路士2:1曼城賽後感]

英超講場 於 27/06/2020 發表 收藏文章
係講任何野前,首先要恭喜利物浦提早封王,首奪英超冠軍,佢地今季嘅表現可以話係實至名歸,相信其他球隊都心服口服。而之所以可以咁快捧盃就唔可以唔感激車仔啦!皆因佢地算係爆小冷門下今場成功係主場戰勝曼城,令對方失去數字上追趕冠軍嘅可能,即刻同大家睇下呢場先!
雙方陣型上都採用左433結構,車仔箭頭用翻近排有好表現嘅銀河唯一,美國隊長翻翻正選位,巴克里亦難得地可以打正選。曼城嘅變化就比較大,平時正選箭頭嘅阿古路就因為上場受傷要做手術無得岀,就由貝拿度施華頂住先,中場就有洛迪做翻正選,費南甸奴就移落一格踢中堅,左閘就繼續用文迪唔用仙真高。
開波無耐就已經可以睇得岀各自嘅打法,車仔以收縮防反姿態示人,放棄控球,善用正選前鋒基奧特支點嘅功能用係反擊,供應俾兩翼同後上嘅中場。原本呢個取態面對正常嘅曼城當然需要擔心久守必失嘅問題,以曼城過往變型系統同進攻方法通常都可以撕破收縮防守球隊嘅防線,令對手失波後要被迫進攻,從而獲得更多前場空間發揮配合及創造力,進而拉大比分。但今場車仔自己防守不但格外醒神外,防守時兩翼更會退落黎形成4141,防中嘅簡迪因應需要左右走,封住half space位置,務求令防守邊路時唔會被曼城人多打人少,封鎖曼城球員滲透嘅可用空間。再加上車仔今場遇上嘅係留力足總盃同有傷兵嘅曼城,中場線只有迪布尼相對有創造力,而根叔同洛迪都較為防守向,缺乏向前及速度嘅特質,最為致命嘅係今場佢地用上無鋒陣,平時較為依賴9號位做中心嘅佢地當然就唔會習慣啦。無鋒陣令到兩邊進攻點不時都要切入禁區入面,同平時拉邊落底嘅習性非常唔同,特別史特寧好難係呢個模式下發揮佢速度嘅優勢,曼城前中場係不習慣的人腳同模式下,只可以空有控球權,老鼠拉龜,只可以運用死球造成威脅。
除左因為自身發揮俾人腳同戰術影響下,曼城提早失去英超冠軍嘅希望嘅原因就不得不多謝Mendy。係無壓力下中場係都要同根叔爭波,根叔俾哂指示都唔散開仲加多腳令到個波仲難攞,最尾失位下俾美國隊長單刀為車仔領先,岀現曼城最唔想岀現嘅劇本,老鼠拉龜下落後,事後雖然有一度追成1:1,但亦都只係靠死球,曼城可以話根本無破壞對手收縮嘅能力,最終被動下,車仔可以安心防反,最尾全取三分。
呢場比賽再一次證明曼城今季被利物浦拋開嘅原因,左閘後備嘅Mendy唔識好似仙真高咁執行變形系統,佢落場左邊嘅進攻就變得單調,由佢拉邊有機會就斬波咁,對球隊進攻模式帶黎負面影響,今次就當因為哥帥想留力足總盃先岀佢,否則我真係對哥帥嘅選擇幾失望下。個人認為,曼城實在有必要套現佢,尋求可以執行變形系統嘅後備,點都好過佢係到勉強上場,影響以創造力為名嘅藍月亮。
講到呢到就可以同大家透露下,黎緊會岀翻篇曼城今季英超失敗嘅原因同應該點做先可以令佢地係下季挑戰冠軍,到時再見大家!

留言


請按此登錄後留言。未成為會員? 立即註冊
    快捷鍵:←
    快捷鍵:→