賦予靈魂嘅紅魔鬼主場成功復仇大黃蜂 [曼聯3:0屈福特賽後感]

英超講場 於 26/02/2020 發表 收藏文章
無耐之前首循環嘅時候,曼聯被大黃蜂係佢地主場算係教訓左一次。個次嘅教訓係教訓佢地無亮麗嘅進攻,久攻不下而導致要輸翻轉頭嘅結果。當然嘅佢地都係以4231作陣容迎戰屈福特,但點解今次嘅結果又會唔同?
個答案其實相信大部分有睇波嘅人都知道,就係一個位置上人選唔同令到成個局面大不同。而呢個位置亦係4231進攻嘅靈魂所在,CAM攻中。當時蘇B仲係會俾機會有唔同原因解釋自己狀態唔好嘅連加特,首循環俾佢踢佢勝任唔到嘅「神位」,當然就無好下場啦,皆因佢無足夠嘅技術同埋視野去帶動其他攻擊手,為佢地輸岀killer pass等,就連最簡單停波都未算做得好,令曼聯就算好難得過到半場都會斷左進攻,仲俾人打翻轉頭。
而冬窗之後,B.F嘅降臨終於令呢個位置有翻靈魂,今場就由佢掌控節奏,除咗呢樣佢仲會識回後現位攞波去引領翻球隊運轉,呢樣當係係好基本,但無奈嘅係之前踢呢個位嘅球員未必做到。係今場我留意到畫面紅衫係球場中圈附近最多跑到嘅就係B.F同費特,係球隊失控球嘅時候會搏命跑翻去迫,嘗試打亂對方節奏搶翻控球,球隊防守嘅第一道屏障比以往做得好,所以先至成功係早段確立不失球。當然都唔可以抹殺後防線嘅努力,特別近排幾fit嘅shaw,佢係近幾場球隊最後一下防守上都會及時蒲頭封阻對手最後一腳,我個人認為要讚佢呢幾場表現好過麥佳亞都唔過分,可能年輕球員B.威廉士嘅冒起令佢受到威脅所以俾翻幾錢肉緊,但無疑呢個良性競爭為曼聯防守有帶黎正面影響。曼聯亦因此就算係上半場早段有唔少失波嘅機會都好,算係叫勉強頂得住,令到佢地可以係一球十二碼下就取得領先然後享受自己最愛嘅節奏,反擊。
若果要評論呢場3:0,我認為曼聯係有一位靈魂坐陣下的確表現比以往好,但其實仲有地方要去進步。現位上,球員跑動真係算勉強合格,但係B.F推動之下,總算見到有少少起色。最大問題係默契上同埋進攻點視野。係呢場我地都會好易留意到前場如果想打穿對方時會想去做一啲小組配合,但永遠都會俾失,誤會對方走位等等,令曼聯失去左啲進攻機會,但若果日後對陣一啲更強嘅球隊,呢啲失誤就會係對方反擊嘅機會。而另外就係兩側進攻點上,特別以james嘅視野最為普通,多數係俾人迫住受壓下,佢就只會想爆落底,盲目傳中或者內切入遠射就算,甚少會抬起個頭望一望隊友嘅走位,若果日後改善到就會增加入肉程度,拉開防守自己人係禁區都會易啲揾食。
不過點都好,望見有翻靈魂帶住嘅紅魔鬼,對曼聯球迷點都係個好消息呀!至於今場兩位後備都無嘅球員就要加把勁追上依家中場線質素啦,唔係真係得翻歐霸俾佢地玩下咋!

如果喜歡我們的文章,請即分享到︰

標籤: 曼聯  大黃蜂  屈福特  CAM  蘇B  費特  shaw  麥佳亞  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→