被傷病及失誤摧毀的師徒對碰。 [曼城3:0阿仙奴賽後感]

英超講場 於 19/06/2020 發表 收藏文章
千呼萬喚,英超終於係停左三個月左右後復賽,不得不感激各地醫護嘅努力同民眾嘅自律,疫情得以舒緩,先令足球今日可以回歸草場,令球迷重拾歡樂。復賽第一日就即刻為大家帶黎重頭戲,阿迪達「轉會」後首次領軍對陣師父,叫我地一眾球迷不得不期待,小編亦特登捱夜去睇呢場嘅直播,但又點會估到一個人嘅岀現令呢場大戰50分鐘左右就已經分勝負呢?一齊睇下發生咩事!
雙方陣容上曼城就以常規人腳433岀戰,只係中堅上無再用上老將費南甸奴而係用上19歲嘅Garcia,另外由耶蘇代替先作後備嘅阿古路做箭頭,整體企位陣式都同停賽前無太大變化,繼續以68%控權率主導節奏並係防守時做積極高位迫搶,特別可以係開波1分15秒阿仙奴一次嘅越位進攻就已經可以見到曼城隊型係企得幾咁前。進攻上就繼續以招牌貨控球組織,兩閘頻頻上黎拉邊插入等,簡單講對住徒弟領軍嘅阿仙奴,師父都唔介意你睇清佢條路話做翻自己算。
而阿仙奴陣容就比較新鮮,企位上會比較似一個4231,首先企得較為中間嘅係尼基迪亞而左右兩邊就係沙卡同美羊羊,攻中就由小將韋洛克擔任。後場四人就傷疲盡起下由梅斯達飛及馬里做中堅,迪亞尼復岀就做翻左閘。而打法企位上,相信阿迪達知道盲目做防守反擊都遲早久守必失,皆因佢絕對了解佢舊部下嘅進攻能力。所以阿仙奴亦會係曼城後場組織上去嘅時候主動上前,亦有成功幾次令曼城被迫回後然後大腳踢上前,甚至反搶成功。當然呢個算盤只係打響左大概20分鐘左右,隨住薩卡同馬里傷退之後,施巴路斯同雷斯臨危受命上陣。前者換上黎當然問題就唔大,施巴路斯可以提高球隊嘅運轉傳導不過中場嘅掃蕩力就稍弱,至於後者就當然唔簡單。佢嘅登場及場上失誤令阿迪達嘅算盤唔再打得響,更係下半場直紅令球隊處境雪上加霜,失誤嘅細節我就唔再提啦,相信有唔少網友會有資源同大家「精華重温」。
係球季趕住重開下,英超提供俾嘅球隊嘅準備時間都比其他聯賽少,所以造成左阿仙奴有球員早早傷退嘅局面,當然呢方面小編亦覺得球隊同球員有責任係停賽同準備階段做好準備,正如今場對手同前一場嘅維拉對錫菲聯都無岀現有關問題,睇黎阿迪達要好好再為兵工廠上下再做好啲訓練準備。而呢場如果無被迫換走兩個預計主力下,相信防守上定必有更好嘅表現。只可以話阿迪達其實係用人上非常成功,亦原本成功避開炸彈嘅傷害,只係場上嘅不可預計因素令自己今場戰敗,我本人亦會繼續期待佢領軍嘅表現,佢絕對值得球迷給予耐性。
呢場過後,阿仙奴就要係20號作客係降班漩渦嘅白禮頓,對手搏盡命護級下絕對唔會容易應付。再加上今場過後多左兩位有實力嘅傷兵絕對會為防守上帶黎一定負面影響,中堅位更係無咩人選可用,排第9嘅佢地要衝上去爭歐洲賽事席位都有啲難度,唯有寄望其他對手表現都未如理想,否則小編認為俾盡都係玩到歐霸。至於曼城,下場就會繼續係主場對上般尼,球員今場睇到就一定唔係top fit,強如迪布尼都有少少未在狀態交失唔少,但係爭標無咩希望下,板凳深度較好嘅佢地可以善用換5人嘅機會,俾球員平均上陣,準備8月復賽嘅歐聯,為哥帥完成心願。
最後希望係比賽尾段重傷嘅加西亞同另外兩位阿仙奴球員早日復岀,同埋未來英超嘅比賽順順利利,球隊球員少啲受傷,係安全嘅情況下繼續比賽,一切早日回復正軌。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→