英超講場 第十八期週報 -- 『歐冠戲劇性創造戲劇性,藍戰士賣盤局勢急轉直下...』

英超講場 於 05/05/2022 發表 收藏文章
歐冠半決賽戲劇性地令決賽上演戲劇性對碰
經過過去兩晚四隊球隊對碰後,決賽雙雄亦隨即誕生。次輪回合首先有期待緊四冠王嘅利物浦踏入決賽,但次回合嘅場面並非一面倒地由利物浦主導賽事,至少上半場完後,維拉利爾一度追和總比分準備反Cup,只係紅軍係更衣室岀嚟後憑教練調動搵翻自己,最終場面同比分上較對手優勝下晉身決賽,但黃潛嘅鬥志毅力實在贏得球迷掌聲。至於另一邊嘅半決賽就係典型強強對碰,曼城拎住一球優勢入次回合,更曾拉開至兩球優勢,原以為決賽又會再次上演英超內訌,點知皇馬就繼續今季晉級戲本下,成功尾段連追兩球拖入加時後,再係加時以十二碼反勝曼城晉級決賽,夠哂戲劇性。亦都創造出戲劇性嘅對碰,形成2018年決賽嘅翻版,即管睇下係今日嘅利物浦完成復仇定今日嘅皇馬再封王!
著名球星經理人拉奧拿離世
前後兩日,拉奧拿由誤傳死訊變成真正與世長辭,實在令足球界驚訝,相信肺部相關嘅病患令佢因病離世。岀生於1967年嘅佢,係生前擔任唔少著名足球員嘅經理人,包括伊巴,普巴,夏蘭特等人,佢嘅離世或多或少會影響到佢地轉會,特別後兩者係嚟緊夏天相信都大機會離隊,不幸中嘅大幸係,以拉奧拿嘅著名程度令佢曾擁有嘅團隊能夠接力,由佢嘅仔仔同律師團隊接手管理,令到一班球星未至於一下子無左轉會幫手為自己爭取最大利益。
傳聞指油王艾巴反口,若接手要還債
上個禮拜先報導完車路士潛在買家進入最後直路嘅爭奪,但呢幾日嘅一個消息,呢條最後直路可能一下子人影都無埋。事關就係艾巴係早前賣盤話新老闆係唔需要償還債務,一度被人讚佢愛會深切等等。但係近日,有消息就傳出艾巴反口想新老闆還翻早前佢借岀俾球會嘅16億鎊費用,令到就嚟有結果嘅轉手程序一下子惡化,當然現時仲未有任何一方回應呢行消息。但若果屬實,車路士無辦法搵到新主人下,最壞情況球會可能無得再留係英超,皆因政府嘅特別容可經營權只係去到今個月三十一號,唔敢想像交易告吹嘅後果,不過至少呢刻,車路士球員嘅內部軍心相信已受到沉重打擊,魯迪加好大機會唔會係唯一一個離開藍戰士陣營嘅球員。
諾域治降班已成定局,屈福特緊隨其後
爭冠同爭四鬥得激烈同時,留下降班區亦同樣精彩,不過係啱啱過去週末比賽嘅結果已直接宣布左當中兩隊嘅命運。首先係維拉忍心贏左諾域治後,諾域治係34輪比賽只得21分,再次成為升降機落英冠,而對上一次賽季,佢地亦同樣只係留係英超一年就降班,同樣咁災難性嘅命運可能都會影響到球會上下嘅士氣同管理,希望佢地能夠係下年稱霸英冠,翻嚟英超挑戰更耐嘅時間。而佢地嘅潛在同伴之一屈福特就變得被動,原本係開波早段爭取到領先優勢 ,但尾段被般尼連入兩球後,由3分變0分,而對手仲要係護級嘅重要對手,呢場贏變輸可以話無左6分,最終佢地係淨低嘅賽事全勝同埋競爭對手失分下先可以留翻係英超,睇嚟護級都只係得翻數字上嘅可能。

如果喜歡我們的文章,請即分享到︰

標籤: 英超  車路士  拉奧拿  伊巴  普巴  夏蘭特  艾巴  諾域治  屈福特  

留言


請按此登錄後留言。未成為會員? 立即註冊
    快捷鍵:←
    快捷鍵:→