英超講場 第十三期週報 -- 『曼聯今夏將追逐重量級箭頭,普巴間接發表離隊宣言』

英超講場 於 31/03/2022 發表 收藏文章
英超講場 第十三期週報 -- 『曼聯今夏將追逐重量級箭頭,普巴間接發表離隊宣言』
曼聯將於今夏轉會窗追逐簡尼或其他相同級數的前鋒

曼聯今季前鋒線上各種風浪問題令佢地決意係嚟緊轉會窗要做翻啲動作,盼望下季可以因為咁改善成績。今季對於曼聯最開心就係當然有C朗回歸,但蜜月期後,佢同球隊嘅配合,佢嘅年齡同唔肯被換走嘅心態漸漸成為一個問題。後起之秀綠木又自己斷送大好前途,睇怕未來唔洗預佢,華舒福今季又低迷到隱左形,馬迪爾又借左去西甲,買人睇嚟事在必行。根據The Athletic報導,曼聯主要目標係想準備好資金買入熱刺主力前鋒簡尼,而都有報導指C朗經理人都贊成呢項決定會幫手傾傾,甚至會幫埋熱刺搵代替品從而令對手放人,即使最終傾唔成,曼聯亦決意要借收購強化前鋒線。
普巴稱係摩佬執教底下令佢情緒受困

跟住落嚟嘅報導都同曼聯有關,仲記得早幾個月有新聞指曼聯為左留住普巴用上銀紙攻勢,願意為佢提供英超界上頂薪甚或破紀錄薪金去留住佢,但就得個傳字未有實際消息。靜再一排後,普巴就對住傳媒開口,但唔係講續約,而係係鏡頭面前控訴球會。佢直指係呢六年效力紅魔鬼嘅時間可以話係浪費光陰,更爆出係摩佬執教底下情緒受到困擾有抑鬱咁話。對上幾個球季球會無任何嘅錦標亦成為佢係鏡頭前抱怨嘅原因,用上自己係國家隊嘅責任同係球會比較,指責曼聯成日轉嚟轉去要佢打唔同位做唔同野,令佢無得發揮穩定。而英國郵報對佢呢次訪問嘅理解就係間接地公開辭職,相信普巴係曼聯嘅生涯完埋今季就劃上句號,至於潛在下家就有PSG,祖記同紐卡素,但應該要去到賽季尾先會有佢去邊間落腳嘅傳聞。
阿諾正與時間競賽,望趕及戰曼城

根據預計,阿諾相信將會至少下場對屈福特同係歐冠對賓菲加嘅首回合。而嚟緊4月10號,大約十日後,利物浦將會迎接決定性嘅賽事,就係面對住只有一分之差嘅榜首,係一場名副其實嘅「六分波」。而當然利物浦絕對想佢可以趕得切康復,畢竟呢位帶刀侍衛係隊中無其他人選可以發揮到相應效用,威脅性同好比一位攻中。現時佢正係杜拜積極進行康復療程,希望可以比原定嘅預計時間早翻翻球隊。而係佢歸隊前,相信高美斯會由暫代位置。

如果喜歡我們的文章,請即分享到︰

標籤: 曼聯  簡尼  普巴  C朗  阿諾  屈福特  英超講場  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→