英超講場 第六期週報 -- 『一個獎盃只能滿足一個願望，三個換人名額或將成歷史，再有球員面檢控危機』 精選

英超講場 第六期週報 -- 『一個獎盃只能滿足一個願望，三個換人名額或將成歷史，再有球員面檢控危機』
非洲盃結局無辦同時滿足來自利物浦的同一願望
過五關，斬六將後，結局對碰就上演左利物浦兩位當家射手內訌嘅戲碼。對於塞內加爾嘅晉級之路可以話一帆風順，連續第二年殺入決賽，係呢場生死戰前十場內無輸過一場，而贏波亦唔係一粒差距就收工，係封王前唔多唔少都已經有一定嘅冠軍相。而佢地嘅對手埃及雖然有呢季大勇嘅沙拿，但就孤掌難鳴，幾次拖到入加時辛辛苦苦先入到決賽，雖然決賽係文尼早段射失十二碼後上下一心拖到入互射十二碼，但埃及兩度射失下造成兩次入決賽都輸波而回，無辦法拎走第8個非洲盃冠軍。賽後塞內加爾總統亦宣佈係2月7日全國放假一天去慶祝，佢自己亦取消原本行程翻去接英雄回歸。不過我諗仲有位人比總統先生更開心，個個就係紅軍教練高普啦，兩位猛將稍作休息，佢透露兩位最快可以係周二三左右歸隊回歸幫手搶分，最重要兩位都無病無痛咁翻到嚟係最大嘅福氣！五個換人名額或會永久實施
當初係疫情傷病等因素下推動左五個換人名額嘅出現，The Athletic報導，負責制定足球規則嘅IFAB將會係3月3號召開年度會議，當中將會探討五個換人名額嘅議題，由暫時實施改變至永久實施。若果實施，對於英超迷就可能有所影響啦。要知道係今季，英超就反其道而行回歸翻三個換人名額，遲下帶翻五個換人名額或者會為陣容深度較厚嘅球會帶嚟一定優勢，可以透過深度大幅度換出較高質素嘅球員，加大有時需要打破膠著局面嘅機會，令中下游球隊更難搶分。此外，越位條例亦會係會議上討論，包括早前雲加提出嘅新建議：『若球員的頭部，身體或腳沒有超越對方最後第2位球員，就算其他身體部份在前，都不會被視為越位。』，就咁聽就只係令進攻球員較容易入波，但依然存在是『一條線』嘅問題，體毛過界亦仲有可能存在，就睇下啲專業人士坐埋一齊會唔會得出一個好嘅改變啦。蘇馬就虐貓道歉，將會受球會內部處分外或會被檢控
繼格連活特後，韋斯咸嘅蘇馬又好似嫌悶想跟風咁話。事關無耐前網上流出左一條短片，入面見到蘇馬對佢屋企嘅貓又打又踢，英國《太陽報》報導今次虐貓起因係因為貓仔百厭整亂左廚房，片段流岀起當然就引起社會好大反應啦，更有指當地嘅皇家防止虐待動物協會(RSPCA)收到多宗投訴，正考慮向佢提出刑事訴訟。雖然蘇馬已為此道歉，但我諗大眾唔會收貨，球會方面，韋斯咸發出聲明譴責聲明，並會就事件作出內部處分，但最搞笑就係之後嘅比賽繼續俾佢正選踢波，搞到唔少人特別愛貓人士嬲嬲豬，引起公關災難。英國國會上年就通過左新嘅虐畜法例，最高刑罰大增至5年，隨時又多位球星要入監反思。干地:過往轉會策略有誤，其後表示球會將買斷羅美路
如果大家有留意都會見到係轉會窗尾聲，熱刺一波咁用轉會/租借方法送走左一堆球員，例如曾經嘅非賣品阿里，尼當比利，洛希素，到埗好似無耐嘅基爾，但就轉入嚟嘅球員就得一隻手數得哂。係足總盃對白禮頓賽前，干地就表示:借左岀去嘅球員係應該借岀去，但一次過係冬季轉會窗送走五位球員，代表過往收購策略有問題/做錯決定。就咁聽唔知佢好似俾緊說話管理層聽，而列維心胸容量有限，令佢咁大膽咁講係經「批准」實純粹天不怕，地不怕？至於借落一排已經用緊羅美路就獲得球會肯定，干地係近日表示球會將會買斷佢，令佢正式成為熱刺球員。