英超講場 第二十四期週報 -- 『本週兩種轉身離開的方式。』 精選

轉身離開，C朗有話說不岀來
週中開快車下有場Big6對碰賽內賽外都成為焦點，曼聯以2:0頗具說服力下再次戰勝熱刺，原本紅色個邊就應該只需要慶祝同埋興奮，但球皇嘅一個轉身離開，令呢場勝利一下子被搶走風頭。據賽後報道指，C朗係拒絕上場後再直接離開球場，坦克同佢嘅關係已經破裂，賽後教練係訪問中放低一句”We deal with that tomorrow “去回應呢個問題。而24個鐘內，官方就宣布下場C朗無份入大名單對車仔，再加三日內無得跟一隊操練。係呢個又快又強硬嘅回應下，我地可以睇得岀曼聯嘅高層已經選好左邊，支持坦克用佢嘅管理方法去管人事，當中亦包括管天皇。再望遠啲，我地亦可以了解到今日嘅曼聯已經唔介意同唔怕同球王反目成仇，因為好殘酷地講句:今日隊波嘅成績已再唔需要靠你去參與交成績，我地可以預見C朗應該係冬季轉會窗更積極地去推動轉會。去呢依家呢刻，已經有報導指如果無人肯用錢接貨，願意還佢自由身俾佢離開，算係最後的溫柔咁話。希望C朗呢位球員可以得到應有尊重完成一個傳奇嘅最後一章。維拉入定數炒謝拉特，慘敗富咸令一切順理成章
係琴晚慘敗富咸三粒前，其實謝拉特身上已經有好強烈嘅魷魚味，就連佢自己都可能已預料今日嘅命運。事關維拉嘅母公司係禮拜二向球會注資一千五百五十萬鎊，轉會窗未到就入數當然就係異常，再數下手指呢筆錢就係炒佢所需要賠嘅費用，就算有報導話對富咸開始計兩場定生死，佢都知大限已到，兩場只係最低消費，入得數就預左炒，所謂嘅時間可能只係球會都需要時間去換新教練，點知兩日後就捱唔過第一關就即刻動用注資炒人。依家郵報就指維拉決定用高薪請一位重量級教練，目標有征戰過英超嘅杜曹同波叔，就算最終唔係佢地都會揀一個有份量嘅教練，繼續維持爭入歐戰嘅決心，亦都反映佢地財政狀況好健康。