英超講場 第二十六期週報 -- 『菲歷斯紅變藍成救命丹，或再有金主入主英超。』

車路士繼續增兵，菲歷斯勢將紅轉藍
菲歷斯係馬體會唔開心就唔係新聞咁簡單，球迷如果有睇西甲直播一定會見過佢係後備席扁嘴愁眉苦瓜乾。而今年只係二十出頭嘅佢曾經係鏡頭前展現自己能力，各大球會見佢唔開心都想送上溫暖領養佢。原本就話曼聯同阿仙奴兩隊紅衫爭緊，但係禮拜一就由車路士爆冷跑出被各大媒體報導已同馬體會達成借用協議，特別轉會專員羅美路亦有透露呢單新聞，參考佢過往嘅準確度，睇嚟兩間紅色球會都可以搵定替代品。而有關借用費就要車仔俾一千一百萬歐元，但未有設立買斷條款。心頭好俾人搶走，紅魔鬼球迷就當然嬲，但以中立角度嚟睇車仔可能係最迫切需要佢嘅球隊，依家要數有正選能力有有狀態嘅正箭頭，可以話係數唔到，冬窗買入翻個救成績順便沖喜救樸達都好呀。未來或將會有卡塔爾財主入主英超強隊？
繼沙特財團入主英超有好成績後，法甲巴黎PSG嘅金主，卡塔爾體育投資公司亦被指計劃對英超當中三支強隊進行收購行動包括曼聯，熱刺同利物浦。而係早前格拉沙家族同芬威集團都有分別表示想尋求出售自己班波，至於熱刺就因為主席列維被報導同相關人士會面，進行股份交易面談後亦成為報導中潛在被收購球隊之一，但熱刺就發表聲明表示有關會議報導並不屬實。係唔係真就無人知，不過未成事前就當然點都話唔屬實，但若再有金主入主，其實對英超球會生態並唔健康，希望英超官方可以把關唔好向錢看，如果唔係蝴蝶效應下歐超聯必將復萌。