英超講場 第九期週報( 下) -- 『紅軍戰至酷刑戲劇捧盃,列斯聯或會繼續流壓迫之血』

英超講場 於 03/03/2022 發表 收藏文章
英超講場 第九期週報( 下) -- 『紅軍戰至酷刑戲劇捧盃,列斯聯或會繼續流壓迫之血』
戰至酷刑,紅軍捧走英聯盃
下集報導第一單依然關車路士事,不過就都唔係好消息。佢地係英聯盃決賽最終十二碼輸俾利物浦無法係世冠盃之後再捧一盃。呢場比賽其實雙方都係法定時間內都有入波嘅機會,但都由各自門將撲翻出嚟,一邊有文迪精彩兩連撲,一邊就有基拿靴穩定表現,年紀輕輕大賽有冷靜而實際嘅表現實在難得。而雙方係過程都有送過個波入龍,但全部都俾VAR一一推翻,令雙方要踢到十二碼出現戲劇情節。杜曹係最後時刻換入Kepa打算針對性用人撲十二碼,點知兩隊平均到要門將互射先分到高下,但Kepa炒飛機令球隊失落獎盃。奇招打唔響仲要成為輸波原因實在令杜曹同Kepa尷尬,賽後杜曹認為自己決定無錯對決定無遺憾,但唔知搞到球隊又無得拎英聯盃嘅Kepa心理陰影面積去到幾大啦。。。
列斯聯辭去狂人比爾沙改由馬殊執教
上季列斯聯用住佢地嘅體力化壓迫戰術贏曼城,和雙紅軍嘅亮麗表現同一眾英超球迷自我介紹,宣佈重返英超。係上季咁出色嘅表現下佢地以第九名跑過終點,差啲有埋歐霸踢。可惜嚟到今季,大部分球隊都已經睇穿左佢地有一成不變嘅壓迫戰術,強隊當然有獨自一套適應方法,弱隊就調轉俾個波你用算,再加埋係疫情早前係英國再次肆虐下,令球隊有時一下子要受體力考驗踢唔少比賽,自然影響壓迫質量同回防,比爾沙堅決保持戰術單一,最終成績不斷破新低,被球會狠心放棄避免降班。不過列斯聯似乎早有準備,隨即宣佈接任教頭馬殊,簽約至2025年,佢同曼聯教頭蘭歷克同屬『紅牛系』,以係薩爾斯堡成績最為突出。列斯都係個段時間識到佢。佢嘅到來或者對列斯聯風格唔會帶嚟太大變化,畢竟『紅牛系』都流住壓迫嘅血,不過就可能識係適當時候縮後,避免出現過往俾強隊捉身後空位而被大炒情況,相信新教練帶到列斯護級就會獲得球迷認可。
標籤: 英超講場  英超  車路士  Kepa  VAR  英聯盃  杜曹  列斯聯  比爾沙  馬殊  

留言


請按此登錄後留言。未成為會員? 立即註冊
    快捷鍵:←
    快捷鍵:→