英超講場 第七期週報 -- 『爭四已是魔鬼極限,英超推計劃改善球證質素』

英超講場 於 17/02/2022 發表 收藏文章
英超講場 第七期週報 -- 『爭四已是魔鬼盡頭,英超借推計劃改善球證質素』
車路士在略欠霸氣下贏得球會首個世俱盃
經過加時猛攻,車路士最終有驚無險地捧走隊史首個世俱盃冠軍翻英國,贏波嘅一球再次由夏維斯射入,呢球決定性十二碼避免球隊要拖到酷刑大戰。而以車路士嘅身價同地位,相信唔少球迷都會為需要拖到加時感到意外。賽後教練杜曹訪問就無因為要加時唔滿意,仲不忘稱讚對手:『好高興夏維斯挺身而出射入十二碼,對佢未來發展會有好處。對手係支團結紀律嚴明嘅球隊,佢地反擊處理亦同樣出色,我地下半場改變陣型就以控制局面下製造十二碼終結比賽。』除左杜曹開心,門將文迪亦比佢笑得燦爛,事關佢上個禮拜先係非洲盃慶祝完,翻到嚟踢一踢又多左個世俱盃冠軍絕對係喜上加喜,一週內連續捧走兩個意義重大嘅獎盃相信對任何球員而言都係如夢如幻。而隊中唯一唔開心嘅可能就係蒙特啦,係決賽戰至31分鐘因傷被換走,報導有指佢韌帶嚴重受傷,進一步檢查確定傷後至少要休養兩個禮拜。
蘭歷克表示爭四已經係曼聯今季嘅極限
係經過對住般尼同修咸頓先領先後被迫和,夾埋少左四分下,曼聯係分數榜上嘅數字進一步限制左佢地今季嘅高度。現時紅魔就坐係第四位,但真係唔代表啲咩,就算贏左白禮頓後,望上去要追車路士就差4分(車仔踢少一場),望落去就更可怕,近近地嘅韋斯咸只係差兩分,熱刺/狼隊/阿仙奴都分別踢少一至兩場,但就只有四至六分嘅差距。所以依家曼聯呢個排名就真係得個名,隨時坐唔暖就要跌落去。而佢地嘅暫代教練係訪問承認,今季曼聯最多都只可以爭四,亦係今季嘅極限,佢表示依家積分榜上領先嘅幾隊都有佢地領先嘅原因,包括係轉會窗上一啲正確選擇。就咁聽似乎佢提緊曼聯球迷今季唔好想得太多,幫你地爭到四已經要多謝佢,最慘見住佢一場又一場嘅copycat陣容,少輪換,遲調動,爭四呢個極限會唔會只適用於佢本人?
紐卡素新血查比亞斷腳,護級或有暗湧
經過冬窗嘅幾項買賣,紐卡素迎接左一波三連勝。只可惜好景不常,四場入兩球嘅查比亞係對維拉個場傷岀,隨後診斷為左腳第5條蹠骨折斷需要接受手術,暫時未有康復日期,就算好翻都要至少個幾月嘅時間。少左呢位帶刀侍衛,紐卡素攻防或者直接受到影響,至少係罰球處理上少左位能手,而佢嘅位置將會由文古路/卡夫特頂上,當然效果就不盡一樣啦。
英超官方將啟動計劃改善球證水準以及
係上個禮拜,英超官方內部舉行完會議後決定啟動名為‘Elite Referee Development Plan’嘅計劃,目的係發展一個足球裁判員嘅新標準,帶來更好嘅執法水準以及裁判員發展。 同埋官方希望呢項計劃可以回應翻各強不時對裁判判決提出嘅批評同質疑,希望更高嘅執法水平可以令佢地少啲投訴嘅意思。除此之外,佢地希望提升英籍球證執法國際性大賽嘅機會,而對上一次已經要數到去上屆世界盃。至於實際係點運作同埋改善到啲咩就要一段時間先會見到,到時睇下佢地係『交功課』定認真毛啦!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→