英超講場 特別篇 -- 『轉會中途站,BIG 6轉會操作一覽(上)』

英超講場 於 08/07/2022 發表 收藏文章
轉會窗打開左一段時間,而各大球會都有所行動,更有球隊係時間準備熱身賽,轉會動作無大半都有五成。但有時各大媒體嘅傳媒報道多到令人眼花,繼上次同大家報導左幾單較重鎊嘅轉會後,今次同大家簡單總結下 BIG6 呢一個轉會窗暫時所買入嘅球員,同埋主要潛在交易對象,同大家搞翻清楚球員岀入情況,一齊睇下你支愛隊做左幾多功課,先同大家睇曼城同利物浦。(以下轉會費皆參考自transfermarkt.com)
曼城:
1.以6000萬歐元由多蒙特引入夏蘭特。
2.以4875萬歐元由列斯聯引入卡雲菲臘斯。
3.以免簽方式由比勒費爾德引入守門員Ortega。


至於轉岀方面,相對重鎊嘅就有耶蘇仔同費南甸奴嘅離開,前者係曼城引入夏蘭特同埋早前已經購入嘅祖利安艾華利斯下,只要夏蘭特保持健康同時給予艾華利斯成長空間,耶蘇離開嘅影響就已解決,再加上過去一季變得成熟嘅無鋒陣,令前鋒位置絕對唔係煩惱之一。至於後防通天老官費南甸奴嘅離開就點都難以彌補,但菲臘斯嘅到來明顯係接班,加強去季防中靠死洛迪嘅死穴,再加埋中場線嘅老化,咁抵買到英藉國腳要俾啲掌聲曼城嘅團隊。
潛在交易對象就有史達寧嘅離開,各界都統一有關於佢走去車仔嘅報導,相信成真都係時間問題。至少於施華雖然有巴塞嘅熱愛,但考慮到巴塞財困同佢地有太多心頭好下,今季要買走哥帥心目中嘅非賣品相信係無可能,加上曼城未有相關位置嘅轉會動作,顯示左機率之小。最後就係之前已傳過曼城想買嘅古古尼亞,呢位巴塞青訓產品亦有表示過想效力曼城,引入呢位球員去提高後防陣容深度,同解決Ake遲遲融入唔到嘅問題,4500萬鎊左右應該就買到人,就睇下曼城老闆買完5億遊艇後仲有幾多散紙。
利物浦:
1.以7500萬歐元由賓菲加引入紐尼斯。
2.以600萬歐元由富咸引入法比奧卡華路。
3.以500萬歐元由鴨巴甸引入藍斯。

至於轉岀方面,最大單嘅新聞當然有文尼離隊轉投拜仁,但離開一刻都為球會賺翻3200萬歐嘅收入。另外日本兵南野拓實都離隊至摩納哥踢法甲,850萬歐元買入,1500萬歐元放走,仲係去季善用到佢打盃場,放走可惜,但要尊重球員想有波踢嘅意願。最後就係福星奧歷基自由身離開去意甲AC米蘭,係非科學分析下減低球會幸運程度。而三位嘅離開後嘅影響相信就以邊線進攻力最為影響,一下子無左一個正選同一個後備球員,雖然終於成功同沙拿續約,但計落佢年紀漸大下,依家呢刻未必夠人可以係多線下輪換,更未計傷病等意外。
而潛在轉會方面,正如我上面所講買多個邊線進攻點係紅軍需要考慮嘅地方,所以就有傳過阿辛斯奧,但就已經一排無消息。而轉走球員嘅傳聞就主要圍繞小將,包括威廉斯去森林等等,係各種跡象下,利物浦淨低時間嘅買人交易一單起,一單止。
下篇會同大家講阿仙奴同曼聯!有興趣嘅球迷記得留意!
標籤: 轉會窗  曼城  多蒙特  利物浦  紐尼斯  阿仙奴  曼聯  

留言


請按此登錄後留言。未成為會員? 立即註冊
    快捷鍵:←
    快捷鍵:→