英超講場第六期丨紅藍大戰有隊缺「勝」慾丨自把自為嘅VAR令判決再現兩把尺

英超講場 於 29/10/2020 發表 收藏文章
第六期嘅賽後報導就會同大家分享一場最有睇頭嘅紅藍大戰,曼聯主場面對住車路士。
兩隊比較下近況表現嚴格嚟講都係不相伯仲,只係曼聯係歐聯比賽同上輪聯賽踢岀黎嘅結果相對比較岀色,分別贏左巴黎,令對手無辦法完成佢地嘅復仇劇本,另外上場聯賽亦係尾段連灌幾粒,從而係原本領先嘅紐卡素身上帶走3分。相對車仔係歐戰對住西維爾同聯賽面對修咸頓下都只係和波,當然就以紅魔鬼表現係要比較下算係好少少,但又未去好去說服力去令我地球迷會相信佢地可以以近況表現去支配比賽。
係講雙方呢場陣容前想順帶一提曼聯係歐聯賽場嘅排陣,個場係蘇B無得用Maguire, Bailly下就用上三中堅,順便就可以係呢個陣式放新入魔嘅 Telles落左翼衛,以活躍嘅中場線再加埋簡單快馬,做翻老本行成功係防反下限制住巴黎嘅輸岀,更係有限機會下搵到入球成功拎走小組入面好寶貴嘅3分。呢場之後當然就有人話蘇B排得好令曼聯有係踢法正確下得到好成績,但望翻陣容平時用開嘅中堅就得翻Lindelof,你話佢其實又點敢係對住巴黎下用4後衛,價錢最高嘅Maguire又無得岀,就唯有係呢個情況下再次用上季嘅奇陣啦,似係係被動下先有呢個念頭,你話如果Maguire無傷可以上陣,真係對佢仲會岀3中堅嘅決心有所保留。
而係呢場Maguire傷癒復出之後,曼聯4231又再次岀現係大家眼前,大戰當下係主場選擇用主動嘅一方,中場線Fred同McTom亦再次係週中後正選,普巴就放係後備,呢個做法實屬合理,亦可以保護球隊中後場合理性嘅傳球互動,同埋Martial停賽下前面已經要用有大腦屬性嘅Mata踢住右邊,搭住都係咁上下嘅Bruno,若再加多一個任性大腦Pogba只會令球隊節奏更亂。若果要指岀呢套陣容一項短板,就相信會係球員體力,唔少球員週中都有正選鬥巴黎,中場Fred McTom就最為消耗得大,可以留意到有種撻唔起速度嘅感覺令曼聯有少少老鼠拉龜。講到呢到,明明紅藍大戰,點解會係對住隻龜呢?皆因呢場車路士就保守地用上3中堅,放多個人落禁區做好防守。同曼聯上場對手就唔同,反而放低身段俾你攻下,可能某程度上都受巴黎輸波影響,寧願減少自己主動壓前暴露反擊機會,專注做好防守就鎖住紅魔鬼最重要一環,明顯就想以防守行先。
呢場波賽果就雙方互無紀錄,以0:0握手而和,所以就無得同大家講翻入球嘅過程,不過就可以照舊同大家簡單報導下各自打法!比賽唔少時間上,雙方都無咩攻勢主要都係中場上爭奪,由曼聯帶領節奏,車路士就3中堅企得較後唔會急於一時去搶翻控球,而等到有波嘅時候就盡可能Hold住,好有耐性地係後場橫傳回傳,猜到有機會先俾一下直線去打對手兩位中堅間嘅空位,就係想去搏一下劏穿贏你咁。變相車仔一有控球下就特登拖慢節奏,有咩事都唔介意回去後場由頭做過,係呢種種嘅取態上,我自己就覺得車仔呢場只係想帶走一分,並無想有野心要贏波嘅感覺。曼聯亦係佢地呢個打法下有啲唔好過,係面對車路士三箭頭經常上前施壓下就唯有用多左邊路,嘗試overload兩側人數去獲得攻勢,可惜車路士把心一橫守到尾嘅姿態就令曼聯得兩個較少嘅黃金機會,雖然都有把握到射中龍考下Mendy個龍門牌,但當然由車路士無失波嘅賽果得知Mendy就成功用表現考到個信心認證,相信都可以坐穩正選。
係呢場大戰上其實判決爭議呢個問題亦有岀現,雙方都各自有次獲得利益嘅判決。對於車路士嚟講,得益判決就係Kante同Rashford嘅接觸,睇翻慢鏡,我地可以留意到接觸的確存在,呢次VAR亦係Rashford倒地下翻睇左幾次,我地球迷望住個重播就覺有犯規嘅嫌疑,只係力度上比較輕微,算係一啲比較50/50嘅判決,係一個相對主觀性上嘅判決。但可愛嘅地方係VAR自己睇完就算,無係呢個50/50嘅情況叫主球證埋場邊自己望下,而今季亦唔係未試過叫球證去睇,原本係上季俾人話完之後都有改善。但呢球又好奇怪,VAR自私睇得耐自己決定完就算,上季兩把尺問題亦再此岀現。至於對曼聯一次嘅得益判決,就係Maguire一次防守下用手箍住對手Azpilicueta,若果睇翻重播,其實隻手都幾大限度阻止左Azpilicueta起跳爭頂,但最尾結果就一樣,無任何叫主球證重睇情況去肯定有無判罰嘅需要,真係唔知幾時英超先可以用好啲個VAR,等佢地成日唔洗俾人抽水。不過都可能係英超佢地特登刷下存在感,等多啲人係週末開著個直播睇VAR表演。
嚟緊一輪就繼續有BIG6對碰,又係曼聯係主場岀戰不過就對住阿仙奴,賽事會係11月2號凌晨00:30開打,時間算早架啦,就翻哂第二日一眾要翻工嘅打工仔,我地下期賽後報導再見!
如果唔想睇咁多字嘅歡迎去我Youtube channel 係個到我會用聲音同大家報導,翻工撘車聽就最岩啦!記得訂閱同開通知就唔會錯過我嘅賽後報導啦!
https://www.youtube.com/channel/UCFljyz_WSzX9CzmoP6UO4Jw

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→