英超講場第八期丨蘇B再迎救位「及時雨」丨曼聯仍待真。進步

英超講場 於 12/11/2020 發表 收藏文章
焦點賽事嘅其中一場就係係禮拜六晚愛華頓對曼聯嘅賽事,對兩支球隊嚟講都幾需要係呢場攞走3分,不單止因為佢地都係聯賽上遊嘅球隊,仲有就係佢地都係最近都面對兩連敗嘅走勢,係國際賽前調整翻表現去避免低迷狀態嘅延續亦係有必要,特別曼聯係聯賽輸完俾阿仙奴後,歐聯面對比自己較弱嘅對手都要輸波而回,就令唔少嘅名宿都批評佢哋近況嘅表現同心態,亦有唔少報道因為咁開始吹奏蘇斯克查即將被炒嘅命運,種種因素都為雙方加咗一個要贏波嘅原因。
排陣部署上面,愛華頓繼續用上433企位框架,但人員上就有少少變動,後場中堅就用上左Holgate搭Keane,中場平時比較多機會嘅Gomez就由Sigurdsson取代,前線就因為Richarlison仲要繼續執行停賽就用上Bernard,拍住佢嘅就繼續係入波停不了嘅Lewin同係皇馬眼中起死回生嘅James。而曼聯方面,蘇B係早前不斷轉陣贏波後見到自己已經連輸兩場,聞到魷魚味就穩字行先,擺翻個當時試陣階段成績最靚仔嘅陣容岀黎踢,4231熟悉嘅面貌,Mata搭Bruno嘅雙核,只係James由唔洗再停賽嘅Martial取代,Rashford亦因為咁去翻邊路,至於其他人選就唔洗講啦,相信大家都睇到熟哂。
打法上愛華頓都幾多使用長傳嘅方法去開一啲後場死球,特別龍門大腳斬上去搵Lewin做頂點去set波俾隊友接應,而Lewin就會係呢啲時候走去靠邊爭頂或者搵Lindelof去同自己爭,為嘅就係想增加自己嘅爭頂成功率,佢地係18分鐘就已經成功用呢個方法搵到入波,Lewin就正正係爭贏Lindelof後俾Bernard接應後自己用高把握力地波征服左De gea。但可惜呢球之後愛華頓全場整體做到岀黎嘅效果就變有限公司,進攻上就因為係中場上面,面對Bruno同佢身後兩位覆蓋率高且高頻率嘅中場就迫到好難有所突破加上Mata呢位老將亦不時係需要嘅時候係中路帶嚟封線企位作用令拖肥進攻運唔到上去,只可以靠左路Digne擺脫速度慢收入中間嘅Mata上前加入攻勢,亦只有呢個突破點較為有效,間接令James今場隱左形,呢位咁關鍵嘅人物隱得形就係愛華頓表現嘅一個指標,最終再無入球進帳。進攻雖然打唔響,但係愛華頓防守上嘅問題先係落敗嘅主要原因,中場線上亦係關鍵所在。係頭兩球失波入面,我地可以留意到曼聯係呢兩球係禁區都係傳得輕鬆,射得輕鬆。Bruno第一球可以係接近無人mark之下夠哂時間攞到盡嚟頂,呢球當然中堅有責任,無做好溝通俾Bruno係兩位之間嘅位置霸到個靚位,但睇翻會留意到應該要追翻佢嘅中場係無左影,係中堅失誤同中場脫節造成咁大空位俾佢嘅局面。講到呢到就要數到今場安帥嘅中場用人啦,Allan,Doucoure,同Sigurdsson,三位都唔算有速度回追,Sigurdsson更唔係一位防守型中場,責任就變得更重,面對活力較高嘅對手就無辦法保持住一定嘅防守壓力,最終導致失位,令曼聯多次係自己禁區想點就點,攻守不善下招致敗局。
至於曼聯,蘇B揀翻呢個陣容都有唔少好處嘅,令佢地可以擺脫呢季失誤頻頻嘅Pogba,但同時mata又可以同Bruno互相呼應做第二個雙核組合,防中孖賽Fred同McTom就能夠用活力去覆蓋球場。加上曼聯整體取向比愛華頓更願意上前做迫搶封線,相信唔多唔少都因為聽到好多批評後,成隊都想做翻場好戲。但若果要評價佢地嘅表現,我個人會傾向支持佢地成功把握到對手今場嘅缺撼而贏波,但因整體嘅進步而贏波呢個講法我就有所保留。始終我認為曼聯仲係欠缺一種說服力嘅入球,把握對手犯錯固然係一個好表現,但唔係場場都有嘅情況。今次頭兩球都係對手防守上失誤,最後一球就因對手最後時刻大舉進攻先有反擊機會俾Cavani開齋,仲係差咁一啲以配合組織打穿對手嘅攻勢,畢竟作為強隊好多時間都要面對密集,無呢啲路數又點能夠確保係啲比自己弱嘅球隊身上搶分?希望紅魔們唔好咁易滿足,仍然要努力!
如果唔想睇咁多字嘅歡迎去我Youtube channel 係個到我會用聲音同大家報導,翻工撘車聽就最岩啦!記得訂閱同開通知就唔會錯過我嘅賽後報導啦!
https://www.youtube.com/channel/UCFljyz_WSzX9CzmoP6UO4Jw

如果喜歡我們的文章,請即分享到︰

標籤: 愛華頓  曼聯  英超講場  英超  Cavani  蘇B  Pogba  

留言


請按此登錄後留言。未成為會員? 立即註冊
    快捷鍵:←
    快捷鍵:→