英超講場特別篇 丨Project Big Picture 現身!丨英超內戰一觸即發 ?丨Project Big Picture深入資訊

英超講場 於 14/10/2020 發表 收藏文章
國際比賽週嘅呢個禮拜無英超比賽就無賽後報導,留意左成個禮拜原本就想同大家總結下幾支強隊係轉會窗上嘅動作,但後尾發現有樣野係更證得同大家分享。而呢樣野更可以話係令英超同英冠聯賽陷入「內戰」嘅局面,講緊嘅就係Project Big Picture,一個可能改變日後上至英超下至英乙同一啲草根聯賽生態嘅分叉點,所以今次就會想同大家了解翻呢個project,同埋背後一啲持分者支持同反對嘅原因,用中立嘅角度等大家自己諗下呢個Project應唔應該實行。而今次嘅資訊主要來自The Athletic嘅報導,原文我就擺咗喺下面,大家有興趣嘅話可以自己去睇下。
Project Big Picture其實最早係三年前就開始由零傾緊,主要就由一啲較大嘅球會包括曼聯利物浦車路士等等嘅球隊去擬定,當然就包埋英格蘭足球聯賽,亦姐係EFL嘅主席Parry,呢一個計劃主要就有五大重點,亦都可以話係五大改革,大幅改變英國足球主要聯賽嘅生態。
第一,呢個計劃如果正式實行,將會立刻推出2.5億英鎊俾EFL,主要針對就應該係想幫翻喺疫情困境下一啲小型球會,幫助佢哋維持生計,免受破產危機,當中更會有資金去資助佢哋補翻一啲虧蝕,甚或者投資女子足球賽事。

第二,原本英超球會擁有嘅92%收入分成將會減少至75%,其餘25%就會有由EFL所有。從而增加英超下其他級別聯賽嘅收入,預計英冠聯賽將會提升1550萬英鎊收入,英甲同英乙聯賽就分別增加350萬同230萬英鎊收益。但證得留意嘅係係呢條數就只係數字上嘅預計,並唔係保證收入起點。

第三,英超球隊將會由原來20隊球隊減至18隊,每季排行最尾兩對球隊將會自動降班,相反英冠聯賽排名頭二嘅球隊亦將會自動升班,每季英超嘅賽事循環亦因此有38輪減至34輪。另外就係社區盾,以及英聯盃亦將會取消。

第四,呢個計劃將會加大左九間球會嘅投票擁有權同權力,分別係Big 6六支球隊以及喺英超聯賽打滾得最耐嘅三支球會,修咸頓,韋斯咸,以及愛華頓。係一啲決策上只要三分之二嘅球會贊成,亦姐係六票,議案及決策就能夠獲得通過,包括球賽上嘅規例,英超CEO嘅人選,球會新班主,電視廣播收益分成等等。

第五,計劃亦建議英格蘭足球聯賽嘅球會參考歐洲足總嘅財政薪金指引以及風格,以維持財政公平競技,將會加上薪金上限。而英超球會亦只能租借15位球員出去,當中最多租借四位球員去同一間球會。
以上就係呢個計劃最著眼嘅要點,但計劃曝光之後就即刻引起極大嘅迴響,亦成為左所謂英國足球上內戰嘅原因。
支持嘅持分者就包括一啲規模相對比較細嘅球會,特別係疫情之下,財政要勒緊褲頭,徘徊喺破產邊緣嘅球會,要明白到過往門票收益係佢哋收入上佔有幾大嘅比例,喺疫情仲未明朗下,佢哋就只能夠盼望一場及時雨,雖然英國政府亦有同英超去溝通嘗試建立銀碼大概係1億英鎊嘅財政支援嘅政策,但係有得揀之下,佢哋認為呢個計劃既2.5億英鎊資金先至係理想嘅銀碼,係維持球會生計為前提又唔洗破產之下就當然選擇支持。值得留意嘅係,其實英甲聯賽唔少球隊即使係冇疫情底下每一季嘅財政都係處於非常唔樂觀嘅狀態。另外,雖然計劃未能夠百分百保證英超級別下聯賽收入,但相信有極大機會可以改善提高佢哋嘅收入,能夠令到低組別聯賽嘅球會有較長嘅可持續性。
而持反對意見嘅就當然有英超管理層同英國政府,皆因佢地近排已着手溝通關於援助金嘅議題,呢個計劃可以話係直接架空左兩者係決策上嘅參與,就算唔反對都會不滿,更何況計劃下英超管理層更可以話係一啲話事權都無。除咗佢哋之外,當然都有唔少球會特別係中型班係唔贊成呢一行計劃,佢哋擔憂新計劃下會令傳統強隊權力進一步壯大,造成權力過大嘅局面。而家喺每一項決議上,若要通過就需要14支或者以上嘅英超球會投贊成票,就好似早前聯賽停擺之後會唔會採納中立場復賽嘅建議就係用咗相同嘅方法去決定。而新計劃之下擁有話事權就只有九支英超歷史相對較長嘅球隊,中型班下遊份子可以話係會議上無哂代表自己嘅聲音,令不利於自己嘅議案亦無得say no。最簡單嘅例子就係增加換人名額上,強隊相對會傾向支持,因為佢哋擁有比較雄厚嘅班底,喺賽事密集之下能夠使用較多嘅人腳去輪換,同時獲得實力同體能上嘅優勢,相反中下游分子即使比多幾個換人名額佢亦只有青年軍可以頂上,更難拉近同強隊實力嘅距離。而跟隨歐足總嘅財政指引就有機會限制其他球會係有資金入股後嘅成長,變相幫助Big6球隊維持強勢嘅局面,亦係佢地反對呢個計劃原因。

呢個計劃嘅岀現就引起左當地唔少球迷,球會嘅迴響,相信需要一段時間嘅協調同溝通先能夠去到推行嘅日子,但同時又需要加快溝通步伐,皆因唔少球會係等緊計劃當中嘅及時雨去續命。一齊關注呢個計劃未來走勢,皆因決策嘅好壞係會大幅影響英超嘅生態,冇得草草了事,日後有進一步消息再同大家分享!

如果唔想睇咁多字嘅歡迎去我Youtube channel 係個到我會用聲音同大家報導,翻工撘車聽就最岩啦!記得訂閱同開通知就唔會錯過我嘅賽後報導啦!
https://www.youtube.com/channel/UCFljyz_WSzX9CzmoP6UO4Jw

原文參考 The Athletic [Explained: United, Liverpool and Parry spark ‘nuclear war’ in English football]: https://theathletic.com/2130676/2020/10/12/nuclear-war-liverpool-manchester-united-rick-parry-premier-league-project-big-picture/

由於《THE ATHLETIC》 為付費平台,大家有興趣試用可以用以下享有30日免費試用:
https://theathletic.com/gp/bj87duzfr1

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→