英超講場丨曼聯 VS 熱刺丨賽前報導&預測丨摩佬食老本可能有得威翻次 ?

英超講場 於 02/10/2020 發表 收藏文章
中秋過後嘅星期五!準時為大家送上第四輪大戰賽前報導,今輪大戰就會係10月4號,禮拜日23:30開打,時間上都叫幾靚仔算係早場啦!曼聯會係主場招呼由舊東家帶隊嘅熱刺。雙方上輪比賽都有分數落袋,只係熱刺因為補時階段無辜手球輸十二碼,令3分變1分,而曼聯就名義上帶走今季第一次嘅3分,過程有幾咁有說服力大家都知啦,唔知發生咩事嘅可以去聽下三期嘅上集,但就以近期比賽黎計,雙方都可以話未十足上力,狀態上無邊一方有絕對嘅優勢。
係講陣容預測前先同大家匯報下雙方傷兵資訊先。曼聯方面,普遍無咩關鍵球員因傷未能上陣或者需要執行停賽。只係關於麥佳亞,蘇B係英聯盃賽後表示佢因為有輕傷在身,所以週中對住白禮頓就無上陣。我相信只係預防性措施,畢竟如果週中強行岀佢加劇傷勢而輸波,禮拜日呢場點同球迷交代呀?我認為應該就唔洗太擔心佢禮拜日都會缺陣,畢竟佢係李城過黎之後從未缺陣過英超賽事,相信紅魔鬼球迷可以放心。至於熱刺,最大影響就係Son係紐卡素個場受傷,半場被迫退下火線,而個陣摩佬就話相信佢會休息一段時間。但係有趣嘅係,幾日之週中贏波之後佢再接受訪問,就一改口風,話唔會肯定佢唔岀,可能Son都會準備好,抱觀望態度,情況180度轉變。係呢一點上,我地可以見識到佢做領隊面對記者經驗有幾咁豐富,又展現左種言語藝術,令對手甚至我地球迷都唔知實際係點但實際上又答左你問題。對手亦都因為無咁易估到佢手中可以用嘅棋黎預測打法,避免俾人有針對性部署。不過相信Son就算可以參與比賽都好,都只會坐後備,寧願呢場搵個替工從而俾Son借助國際賽期直接休息兩個禮拜效果可能仲好,勉強岀佢到時頂唔順隨時浪費一個換人名額。而至於回巢嘅Bale摩佬就話仲未岀得。
企位戰術上,曼聯以往大戰都有用3中堅習慣,亦試過收到奇招,但係買入Bruno同上季復賽之後3中堅就變得罕見,唔好話轉陣式就連用人都無咩改變,的確依家曼聯中場就最多人用,3中堅就令中場立體性無咁高,Bruno等人嘅速度亦唔係呢個陣式理想人選再加埋蘇B諗法上感覺轉得慢無新意,有少少睇死佢都係用翻4231,而唔會好似上季咁以所謂奇陣岀戰,睇下佢會唔會Surprise 翻一次先。中堅上如果4後衛,希望可以俾下機會Bailly啦,有啲擔心Lindelof對住Kane會俾人打爆又失波,到時又俾人問候就唔好啦。前鋒線上就唔洗估啦,福仔馬仔木仔就必然,就唔詳細講啦。
至於熱刺,睇佢地賽程都覺得癲,短短上輪之後到今場之間一個禮拜踢四場咁濟,難以想像對球員體力消耗有幾大。週中英聯盃後防上都要用翻正選Dier, Alderweireld, Sissoko等人,而歐霸外圍Kane, Moura, Lo celso等人都有份正選,輪換幅度就一定比接近全副選同少踢一場嘅曼聯少,要知道曼聯週中福仔,pogba都只係踢左20分鐘,其他主力大部分都獲得休息機會,體力上係一大劣勢。但對熱刺黎講都有好消息嘅,就係摩佬做翻自己老本行可能有意外收獲喎!週中對車仔用上3中堅嘅佢地成功抵擋8成功力嘅車仔,更拖到入十二碼再淘汰佢地。而曼聯開季到依家都未有翻上季尾組織上較好嘅表現,用下自己招牌大巴,特別針對性用中場限制Bruno,相信曼聯輸岀就變有限公司。人選上前面就要敢唔用慢嘅Kane,唔係快攻打翻上去好易拖慢哂打唔岀,Moura, Bergwijn等人就係可考慮人選。係呢個選擇下就得翻兩樣需要怕,就係球員因為體力下降表現大跌Watt犯錯,不過呢個都仲叫可以透過摩佬因應情況用人同比賽途中換人避免同控制。第二要驚嘅就係因為死球鴨仔波先失球,到時被迫壓前就到曼聯大巴反擊,場面就難搞。
一齊睇下摩佬有無辦法係體力同陣容深度都處於劣勢下仍然可以係舊東家面前威翻次,皆因上季就只有一和一負嘅成績咋,相信佢內心都好期待贏波然後賽後訪問可以牙刷翻次。下個禮拜賽後報導再見大家!

如果唔想睇咁多字嘅歡迎去我Youtube channel 係個到我會用聲音同大家報導,翻工撘車聽就最岩啦!記得訂閱同開通知就唔會錯過我嘅賽後報導啦!
https://www.youtube.com/channel/UCFljyz_WSzX9CzmoP6UO4Jw

如果喜歡我們的文章,請即分享到︰

標籤: 熱刺  曼聯  麥佳亞  Dier  英超講場  賽後報導  摩佬  3中堅  

留言


請按此登錄後留言。未成為會員? 立即註冊
    快捷鍵:←
    快捷鍵:→