聖誕快車戰情速報

英超講場 於 29/12/2019 發表 收藏文章
首先小編係到祝大家聖誕同新年快樂,希望大家有係假期同朋友過得開開心心!至於英超球迷們都有係Boxing day收到禮物,就係一晚九場嘅英超賽事啦,所以遇上快車期,我都轉一轉模式抽幾場同大家做翻個簡短快訊同分析。
第一場: 熱刺2:1反勝白禮頓
受制於上場孫大人自己魯莽申請張紅牌下,佢就需要由今場停賽三場,而熱刺又咁啱要分別對住白禮頓,諾域治同修咸頓。對住呢三隊球隊都好大機會要陣地戰,幾需要孫仔嘅個人能力破防同屈人機。至於今場,摩奴就繼續用翻4231,以19歲嘅薛斯隆做孫大人代替品,當然19歲經驗唔太夠嘅佢就略顯緊張,係傳射嘅機會把握上都有進步空間,不過咁後生嘅佢就幾夠速度,上半場曾經差啲尾柱殺上黎撞入傳中波,只可惜就差少少無得為球隊先開紀錄。係上半場大部分時間,熱刺進攻比較多沙下,白禮頓以死球及防反造成嘅威脅其實仲大,更以一次嘅死球情況下先攻破大門。呢個失球其實反映左好多球隊現今成日盲目使用區域聯防嘅問題,企死一個範圍去跳頂又點可以同對方衝埋黎爭頂嘅勢能抗衡?呢啲細節位大部分球隊都唔會留意,但往往呢個細節亦係失分嘅原因,加上對面仲有身高接近2m嘅丹般殺埋黎,區域聯防又係咪真係唯一而又最好嘅選擇?慶幸摩帥調動正確,下半場係洛希素頂替替薛斯隆之後,控球進攻開始流暢,多次製造威脅後成功用球員個人能力同少少運氣反勝。呢到最尾要一讚熱刺前場最後時刻即使已經無哂體力都用奶力壓迫對手,更差啲拉開差距,只可惜體力下滑嘅問題亦影響球員射門質素。不過見到熱刺球員最尾耗盡體力都咪話唔擔心呀,得兩日休息仲要下場作客,我認為摩奴需要輪換下,特別哈利仔最為需要,因為留意到佢呢幾場表現跌watt,體能問題相信係幾大嘅因素,處理得唔好好大機會令熱刺係快車期失分架!
第二場:阿迪達首場般尼茅夫1:1阿仙奴
新官上任阿迪達第一場就帶隊作客對住近排輸多過贏嘅般尼茅夫,陣容就以4231嘗試透過接近曼城嘅進攻模式,為阿仙奴帶黎左新嘅進攻套路。就咁睇第一場,小編認為阿迪達上任時間始終唔耐,難以同全部球員交代每個位置係變形進攻防守時候嘅走位,好難就話第一場就可以用上相關戰術。相反,呢位年輕主帥應該係有語重心長同球員們講解整體意識,現身幫隊友嘅重要性,所以我地可以見到今場阿仙奴係防守上嘅包夾,企位同埋進攻上球員係有積極左,而進攻上都成功製造到機會,只係天雨路滑下近排因為成日後備而無狀態拿卡把握唔到。無論如何,就咁睇阿迪達執教第一場,佢的確有為阿仙奴帶入新元素,令隊波有少少起色,詳細戰術分析就等佢地踢多幾場再同大家分享下。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→